വിമാനതയാത്രയ്ക്കിടെ അമ്പരപ്പിക്കുന്ന പല സംഭവങ്ങളും വാർത്തയായി മാറാറുണ്ട്. ചിലപ്പോഴൊക്കെ കൗതുകം ഉണർത്തുമെങ്കിലും ചിലപ്പോൾ ഞെട്ടലും ഉളവാക്കുന്ന പല വിഡിയോകളും വൈറലായി മാറാറുണ്ട്. അത്തരത്തിൽ ഒരു വാർത്തയാണ് ഇപ്പോൾ പുറത്ത് വരുന്നത്. അതും നമ്മുടെ ഇൻഡിഗോ വിമാനത്തിൽ...

മുംബൈയിൽ നിന്നും പുറപ്പെട്ട വിമാനത്തിന്റെ കാർഗോ കംപാർട്ട്മെന്റിൽ ഉറങ്ങിപ്പോയ ലോഡിങ് തൊഴിലാളി ചെന്നിറങ്ങിയത് അബുദാബിയിലായിരുന്നു. ഞായറാഴ്ച പുറപ്പെട്ട ഇൻഡിഗോയുടെ മുംബൈ–അബുദാബി വിമാനത്തിലാണ് സംഭവം നടന്നിരിക്കുന്നത്. യുഎഇയുടെ തലസ്ഥാനമായ അബുദാബിയിൽ ഇദ്ദേഹം സുരക്ഷിതനായി എത്തിയെന്ന് ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അധികൃതർ അറിയിക്കുകയായിരുന്നു.

ഇൻഡിഗോ വിമാനത്തിലേക്ക് സാധനങ്ങൾ കയറ്റിയ ശേഷം ഇയാൾ അതിനകത്ത് തന്നെ വിശ്രമിക്കുകയായിരുന്നു. അങ്ങനെ ക്ഷീണംകൊണ്ട് ഉറങ്ങിപ്പോയ ഇദ്ദേഹം അകത്തുള്ളത് ശ്രദ്ധിക്കാതെ കാർഗോയുടെ വാതിൽ അടയ്ക്കുകയായിരുന്നു മറ്റുള്ളവർ. കൂടാതെ വിമാനം മുംബൈ വിമാനത്താവളത്തിൽ നിന്നും ടേക്ക് ഓഫ് ചെയ്യുമ്പോഴാണ് തൊഴിലാളി ഉണരുന്നതെന്നും അധികൃതർ വ്യക്തമാക്കി.

അബുദാബിയില്‍ ഇറങ്ങിയ ശേഷം അവിടുത്തെ അധികൃതര്‍ ലോഡിങ് തൊഴിലാളിയെ മെഡിക്കൽ പരിശോധന നടത്തിയെന്നും അദ്ദേഹത്തിന്റെ ആരോഗ്യനില തൃപ്തികരമാണെന്നും ഉദ്യോഗസ്ഥര്‍ പറയുകയുണ്ടായി. പരിശോധനയ്ക്ക് ശേഷം അബുദാബി അധികൃതരുടെ അനുമതിയോടെ അതേ വിമാനത്തില്‍ തന്നെ യാത്രക്കാരനായി അദ്ദേഹത്തെ മുംബൈയിലേയ്ക്ക് തിരിച്ചയയ്ക്കുകയായിരുന്നെന്നും ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ ഉദ്യോഗസ്ഥര്‍ അറിയിക്കുകയുണ്ടായി.

അതേസമയം സംഭവത്തെക്കുറിച്ച് അന്വേഷണം നടക്കുകയാണെന്ന് ഡിസിജിഎ ഉദ്യോഗസ്ഥരും ഇന്‍ഡിഗോ എയര്‍ലൈന്‍സ് വക്താവും അറിയിച്ചു.