യുഎഇയില് പല സ്ഥലങ്ങളിലും കനത്ത മഴ; ഷാര്ജയിലെ മെലീഹ റോഡ് താത്കാലികമായി അടച്ചിടും! മഹാഫില് എരിയയില് നിന്ന് കല്ബയിലേക്കും ഫുജൈറയിലേക്കുമുള്ള രണ്ട് ദിശകളിലേയും റോഡ് അടയ്ക്കുമെന്ന് മുന്നറിയിപ്പ്
കഴിഞ്ഞ ദിവസങ്ങളിൽ യുഎഇയില് പല സ്ഥലങ്ങളിലും കനത്ത മഴ പെയ്ത സാഹചര്യത്തില് ഷാര്ജയിലെ മെലീഹ റോഡ് താത്കാലികമായി അടച്ചിടുമെന്ന് മുന്നറിയിപ്പ്. ശനിയാഴ്ച രാത്രിയാണ് ഷാര്ജ പൊലീസ് ഇത് സംബന്ധിച്ച അറിയിപ്പ് നല്കിയിരുന്നത്. മഹാഫില് എരിയയില് നിന്ന് കല്ബയിലേക്കും ഫുജൈറയിലേക്കുമുള്ള രണ്ട് ദിശകളിലേയും റോഡ് അടയ്ക്കുമെന്നാണ് അറിയിപ്പിൽ വ്യക്തമാക്കിയിട്ടുള്ളത്.
അതോടൊപ്പം തന്നെ കനത്ത മഴയെ തുടര്ന്ന് തൊട്ടടുത്ത വാദിയില് നിന്നുള്ള വെള്ളം റോഡില് നിറഞ്ഞതാണ് നിയന്ത്രണത്തിന് കാരണമായി മാറിയത്. പകരം ഷാര്ജ - അല് ദൈത് റോഡോ അല്ലെങ്കില് ഖോര്ഫകാന് റോഡോ ഉപയോഗിക്കണമെന്ന് അധികൃതര് നിര്ദേശം നൽകിയിട്ടുണ്ട്. വെള്ളിയാഴ്ച മുതല് യുഎഇയിലെ വിവിധ ഭാഗങ്ങളില് കനത്ത മഴ പെയ്തുകൊണ്ടിരിക്കുന്നതായാണ് റിപ്പോർട്ടുകൾ ചൂണ്ടിക്കാണിക്കുന്നത്.
കൂടത്തെ രാജ്യത്തെ പ്രധാന വിനോദ സഞ്ചാര മേഖലയായ ജബല് ജെയ്സിലെ സിപ്ലൈന് ഞായറാഴ്ചയും അടച്ചിടുമെന്നും അറിയിച്ചിട്ടുണ്ട്. ഷാര്ജ, ദുബൈ, റാസല്ഖൈമ, അല് ഐന് എന്നിവിടങ്ങളിലെല്ലാം മഴ ലഭിച്ചതായി യുഎഇ ദേശീയ കാലാവസ്ഥാ നിരീക്ഷണ കേന്ദ്രം പുറത്തിറക്കിയ അറിയിപ്പില് പറയുന്നു.
അതേസമയം, വെള്ളപ്പാച്ചിലില് കുടുങ്ങിയ മൂന്ന് പേരെ സിവില് ഡിഫന്സ് സേന രക്ഷപ്പെടുത്തിയിരിക്കുകയാണ്. ഒമാനിലെ തെക്കന് ബാത്തിന ഗവര്ണറേറ്റിലായിരുന്നു സംഭവം. മഴമൂലം വാദിയില് രൂപപ്പെട്ട വെള്ളപ്പാച്ചിലില് അകപെട്ടവരെയാണ് രക്ഷാപ്രവര്ത്തകര് രക്ഷപ്പെടുത്തിയത്.
ബര്ഖാ വിലായത്തിലെ വാദി അല്-സലാഹ കുടുങ്ങിയ മൂന്ന് പേരെയാണ് തെക്കന് അല് ബത്തിന ഗവര്ണറേറ്റിലെ സിവില് ഡിഫന്സ് സേനയുടെ ഇടപെടലിലൂടെ അപകടത്തില് നിന്നും രക്ഷപെടുത്തിയത്. മൂന്നുപേരുടെയും ആരോഗ്യനില തൃപ്തികരമാണെന്നും സിവില് ഡിഫന്സ് അതോറിറ്റി പുറത്തിറക്കിയ പ്രസ്താവനയില് വ്യക്തമാക്കുന്നു. ബുധനാഴ്ച വരെ മഴ തുടരുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പില് പറയുന്നത്. വാദികള് മുറിച്ചുകടക്കരുതെന്നും താഴ്ന്ന പ്രദേശങ്ങളില് നിന്ന് മാറി നില്ക്കണമെന്നും അധികൃതര് ആവശ്യപ്പെടുകയും ചെയ്തിട്ടുണ്ട്.
https://www.facebook.com/Malayalivartha
