പുതുവർഷം ആരംഭിച്ചുകഴിഞ്ഞു. പുതിയ തുടക്കത്തിലേക്ക് ലോകം കാലെടുത്തുവയ്ക്കുമ്പോൾ അമ്പത് വര്ഷം പൂർത്തീകരിച്ചതിന്റെ നിറവിൽ യുഎഇ ചരിത്ര പ്രഖ്യാപനങ്ങളാണ് നടത്തിയത്. അടുത്ത അമ്പത് വർഷത്തെ പദ്ധതികൾ ആരംഭിക്കാൻ ഒരുങ്ങുമ്പോൾ ലോകത്തെ തന്നെ അമ്പരപ്പിലാഴ്ത്തിയ ആ പ്രഖ്യാപനം പ്രാബല്യത്തിൽ വന്നിരിക്കുകയാണ്.

ഈ വർഷം മുതൽ യുഎഇ പുതിയ വാരാന്ത്യത്തിലേയ്ക്ക് മാറുകയാണ്. ഇതുമൂലം രണ്ടര ദിവസത്തെ അവധിയാണ് ഓരോ ആഴ്ചയിലും ഗവണ്മെന്റ് ജീവനക്കാരെ കാത്തിരിക്കുന്നത്. ഇത് പതിയെ സ്വകാര്യ മേഖലയിലേക്ക് എത്തുമെന്ന സൂചന. ഇപ്പോഴിതാ പുതിയ മാറ്റങ്ങൾക്ക് അനുസൃതമായി ദുബായ് എമിഗ്രേഷൻ (ജിഡിആർഎഫ്എ ദുബായ്) തങ്ങളുടെ ഓഫീസുകളുടെ പുതിയ പ്രവൃത്തി സമയം പ്രഖ്യാപിച്ചു. രണ്ടു ഷെഡ്യൂളുകളിലായി രാവിലെ 7.30 മുതൽ വൈകിട്ട് ഏഴു വരെയാണ് ജിഡിആർഎഫ്എ ദുബായ് ഓഫീസുകളുടെ സേവനം ലഭ്യമാവുകയെന്ന് മേധാവി ലഫ്. ജനറൽ മുഹമ്മദ്‌ അഹ്‌മദ്‌ അൽ മർറി അറിയിക്കുകയുണ്ടായി.

അതായത് തിങ്കൾ മുതൽ വ്യാഴം വരെയുള്ള ദിവസങ്ങളിൽ രാവിലെ 7.30 മുതൽ 3.30 വരെയാണ് ആദ്യ സമയക്രമം എന്നത്. രാവിലെ 11 മുതൽ വൈകിട്ട് ഏഴു വരെയാണ് രണ്ടാം ഷിഫ്റ്റ്. എന്നാൽ വെള്ളിയാഴ്ച ആദ്യസമയക്രമം രാവിലെ 7.30ന് തുടങ്ങി 12ന് അവസാനിക്കുന്നതാണ്. തുടർന്ന് ഉച്ചയ്ക്ക് 2:30 മുതൽ വൈകിട്ട് ഏഴു വരെയാണ് ജിഡിആർഎഫ്എ പ്രധാന ഓഫീസ് സേവനം ലഭ്യമാവുകയെന്നും അദ്ദേഹം വ്യക്തമാക്കി. ശനിയാഴ്ചയും ഞായറാഴ്ചയും ഓഫീസിന് വാരാന്ത്യ അവധിയായിരിക്കു ഉണ്ടാകുക.

കൂടാതെ കഴിഞ്ഞ വർഷം വരെ സര്‍ക്കാര്‍ മേഖലയില്‍ ആഴ്‍ചയില്‍ അഞ്ചു ദിവസമാണ് പ്രവൃത്തി ദിനമെങ്കില്‍ ഈ വര്‍ഷം അത് നാലര ദിവസമായി കുറയുന്നതാണ്. ലോകത്തുതന്നെ ഇത്തരത്തില്‍ പ്രതിവാര പ്രവൃത്തി ദിനം അഞ്ച് ദിവസത്തില്‍ താഴെയാക്കി കുറയ്‍ക്കുന്ന ആദ്യത്തെ രാജ്യം കൂടിയാകുകയാണ്യുഎഇ. ശനിയും ഞായറും അവധി ദിനങ്ങളായ ലോകരാജ്യങ്ങളുമായുള്ള സാമ്പത്തിക ഇടപാടുകള്‍ പുതിയ തീരുമാനത്തിലൂടെ കൂടുതല്‍ സുഗമമാവുന്നതാണ്. യുഎഇ ആസ്ഥാനമായി പ്രവര്‍ത്തിക്കുന്ന ആയിരക്കണക്കിന് ബഹുരാഷ്‍ട്ര കമ്പനികള്‍ക്ക് കൂടുതല്‍ ശക്തമായ ബിസിനസ് ബന്ധങ്ങളും അവസരങ്ങളും ഇതിലൂടെ കൈവരുകയും ചെയ്യും.

അതേസമയം വീസാ സംബന്ധമായ ജിഡിആർഎഫ്എ സേവനങ്ങൾക്ക് വകുപ്പിന്റെ സ്മാർട്ട്‌ ചാനലുകൾ ഉപയോഗപ്പെടുത്തണമെന്ന് അധികൃതർ അറിയിച്ചു. വെബ്സൈറ്റ്, GDRFA -dubai എന്ന മൊബൈൽ ആപ്ലിക്കേഷൻ മുഖേന സേവനം തേടാനാകും. നിലവിൽ വകുപ്പിന്റെ ഒട്ടുമിക്ക എല്ലാ വീസാ സേവനങ്ങളും സ്മാർട് ചാനൽ വഴി ലഭ്യമാക്കിയിട്ടുണ്ട്.

ദുബയിലെ എല്ലാം വീസാ സേവന നടപടികളുമായ ബന്ധപ്പെട്ട അന്വേഷണങ്ങൾക്ക് ടോൾഫ്രീ നമ്പറായ 8005111 നമ്പറിൽ ബന്ധപ്പെടണം എന്നും അധികൃതർ വ്യക്തമാക്കി. എന്നാൽ, യുഎഇ യ്ക്ക് പുറത്തുള്ള ആളുകൾ 0097143139999 എന്ന നമ്പറിലാണ് വിളിക്കേണ്ടത്. gdrfa@dnrd.ae, amer@dnrd.ae, എന്നീ ഇമെയിൽ വഴിയും ലഭിക്കുന്നതാണ്.