യുഎഇയിൽ കഴിഞ്ഞ കുറച്ച് ദിവസങ്ങളായി കോവിഡ് കേസുകൾ വർധിച്ചുവരികയാണ്. കഴിഞ്ഞ 24 മണിക്കൂറിനിടെ മാത്രം കോവിഡ് ബാധിച്ചവരുടെ എണ്ണം മൂവായിരം പിന്നിട്ടിരിക്കുകയാണ്. രാജ്യത്ത് പുതുതായി 3068 പേർക്കു കൂടി കോവിഡ് ബാധിച്ചതായി ആരോഗ്യ–രോഗപ്രതിരോധ മന്ത്രാലയം അറിയിക്കുകയുണ്ടായി. 1226 പേർ രോഗമുക്തി നേടിയിട്ടുണ്ട്. മൂന്നു മരണം റിപ്പോർട്ട് ചെയ്തു. ആകെ രോഗികൾ: 799,065. രോഗമുക്തി നേടിയവർ: 758,031. ആകെ കോവി‍ഡ് മരണം: 2185. നിലവിൽ ചികിൽസയിലുള്ളവർ 38,849 പേരാണ്.

അതോടൊപ്പം തന്നെ വിവിധ രാജ്യക്കാരാണു രോഗബാധിതരെന്നും ഇവർക്ക് മികച്ച ചികിത്സയാണ് നൽകുന്നതെന്നും അധികൃതർ വ്യക്തമാക്കി. 24 മണിക്കൂറിനിടെ 424,861 പേരെയാണു പരിശോധനയ്ക്ക് വിധേയരാക്കിയത്. ജനങ്ങളുടെ ആരോഗ്യവും സുരക്ഷയും ഉറപ്പാക്കാൻ നിർദ്ദേശങ്ങള്‍ പാലിച്ച് അധികൃതരുമായി സഹകരിക്കാനും ശാരീരിക അകലം പാലിക്കാനും ആരോഗ്യ–രോഗപ്രതിരോധ മന്ത്രാലയം ആഹ്വാനം ചെയ്യുകയുണ്ടായി.

കൊറോണ വൈറസ് കേസുകൾ നേരത്തെ കണ്ടെത്തുന്നതിനും ആവശ്യമായ ചികിത്സ നടത്തുന്നതിനും രാജ്യവ്യാപകമായി പരിശോധന തുടരുകയാണ്. ഒട്ടുമിക്കയിടങ്ങളിലും സൗജന്യ പരിശോധനയാണ് നടത്തിവരുന്നത്. കൂടാതെ രാജ്യത്ത് അനുദിനം കോവിഡ് രോഗികളുടെ എണ്ണം വർധിക്കുകയാണ്. കനത്ത ജാഗ്രത കാണിക്കണം. എല്ലാവരും മാസ്ക് ധരിക്കുകയും സാമൂഹിക അകലം പാലിക്കുകയും വേണമെന്നും അധികൃതർ ആവശ്യപ്പെടുകയുണ്ടായി.