ഖത്തറില്‍ 4,021 പേര്‍ക്ക് കൂടി കൊവിഡ് സ്ഥിരീകരിച്ചതായി റിപ്പോർട്ട്. പൊതുജനാരോഗ്യ മന്ത്രാലയമാണ് ഞായറാഴ്ച അറിയിച്ചത്. ചികിത്സയിലായിരുന്ന 2,586 പേര്‍ കൂടി രാജ്യത്ത് രോഗമുക്തി നേടിയതായി അധികൃതർ അറിയിച്ചു. അതോടൊപ്പം തന്നെ ആകെ 2,58,017 പേരാണ് ഇതുവരെ രോഗമുക്തരായിട്ടുള്ളത്.

ലഭ്യമാകുന്ന കണക്കുകൾ അനുസരിച്ച് പുതിയതായി സ്ഥിരീകരിച്ച കൊവിഡ് കേസുകളില്‍ 3,518 പേര്‍ക്ക് സമ്പര്‍ക്കത്തിലൂടെയും 503 പേര്‍ വിദേശത്ത് നിന്ന് മടങ്ങിയെത്തിയവരാണ്. കൊവിഡ് ബാധിച്ച് ഒരു കുഞ്ഞ് ഉള്‍പ്പെടെ പുതിയതായി രണ്ടു മരണങ്ങളാണ് നിലവിൽ റിപ്പോര്‍ട്ട് ചെയ്തത്. 626 പേരാണ് ഖത്തറില്‍ ആകെ കൊവിഡ് ബാധിച്ച് മരിച്ചത്. ആകെ 2,99,242 പേര്‍ക്കാണ് രാജ്യത്ത് കൊവിഡ് സ്ഥിരീകരിച്ചിരിക്കുന്നത്.

അതേസമയം നിലവില്‍ 40,600 പേര്‍ കൊവിഡ് ബാധിച്ച് ചികിത്സയിൽ കഴിയുന്നു. 39,432 കൊവിഡ് പരിശോധനകള്‍ കൂടി പുതിയതായി നടത്തി. ഇതുവരെ 3,264,723 കൊവിഡ് പരിശോധനകളാണ് ഖത്തറില്‍ നടത്തിയിരിക്കുന്നത്. കഴിഞ്ഞ 24 മണിക്കൂറിനിടെ കൊവിഡ് ബാധിച്ച് 11 പേരെ കൂടി തീവ്രപരിചരണ വിഭാഗത്തില്‍ പ്രവേശിപ്പിക്കുകയുണ്ടായി. നിലവില്‍ 91 പേരാണ് തീവ്രപരിചരണ വിഭാഗങ്ങളില്‍ കഴിയുന്നത്.