വർഷാരംഭത്തിൽ തന്നെ യുഎഇ ഏവർക്കും പുത്തൻ ആശയങ്ങളാണ് നൽകിയത്. അങ്ങനെ പുതിയ അറിയിപ്പിലൂടെ പ്രവാസികളെ കയ്യിലെടുക്കാൻ അവർ മറന്നില്ല. അതായത് പുതിയ തൊഴിൽ നിയമപ്രകാരം ശമ്പളത്തോടു കൂടിയ ആറുതരം അവധികൾക്ക് യുഎഇയിലെ ജീവനക്കാർ അർഹരാണെന്ന് നിയമവൃത്തങ്ങൾ അറിയിച്ചിരിക്കുകയാണ്. വാർഷിക അവധി, രോഗം, പ്രസവം, ബന്ധുക്കളുടെ മരണം, പഠനം എന്നിവയാണ് അർഹമായ അവധികൾ എന്നത്.

∙ ഒരു വർഷം സേവനം പൂർത്തിയാക്കിയ ജീവനക്കാരന് 30 ദിവസത്തെ വാർഷിക അവധിക്ക് അവകാശമുണ്ട്

∙ആറു മാസത്തിൽ കൂടുതലോ ഒരു വർഷത്തിൽ താഴെയോ സർവീസുള്ള ആൾക്ക് മാസത്തിൽ രണ്ടുദിവസം വീതം അവധിക്ക് അർഹതയുണ്ട്

∙ ജീവനക്കാരിക്ക് ഗർഭത്തിന്റെ ആറു മാസം കഴിയുമ്പോൾ 60 ദിവസം അവധിയെടുക്കാം

∙ രോഗവുമായി ബന്ധപ്പെട്ട് 45 ദിവസം അവധിക്ക് അർഹതയുണ്ട്

∙ പങ്കാളി, മാതാപിതാക്കൾ,കുട്ടികൾ, സഹോദരങ്ങൾ, മുത്തച്ഛൻ, മുത്തശ്ശി, ചെറുമക്കൾ തുടങ്ങിയവരുടെ മരണവുമായി ബന്ധപ്പെട്ട് അഞ്ചു ദിവസം അവധിയെടുക്കാം (ബെറീവ്മെന്റ് ലീവ്)

∙ കുഞ്ഞ് ജനിച്ച് ആറു മാസത്തിനുള്ളിൽ അഞ്ചുദിവസത്തെ അവധിക്ക് (പേരന്റൽ ലീവ്) അർഹതയുണ്ട്

∙ ഒരേ സ്ഥാപനത്തിൽ രണ്ടു വർഷം പൂർത്തിയാക്കിയ ജീവനക്കാർക്ക് അവർ യുഎഇയിലെ വിദ്യാഭ്യാസ സ്ഥാപനത്തിൽ പഠിതാവാണെങ്കിൽ വർഷത്തിൽ 10 ദിവസത്തെ അവധിക്ക് അർഹതയുണ്ട്.

അതോടൊപ്പം തന്നെ തൊഴിൽദാതാവിന്റെ അനുമതിയോടെ ഈ അവധികളെടുക്കാം. മരണവുമായി ബന്ധപ്പെട്ട അവധി, പേരന്റൽ ലീവ്, വാർഷിക അവധി എന്നിവ ശമ്പളരഹിത അവധിയോടു ചേർത്തെടുക്കാനും ജീവനക്കാരന് അവകാശം നൽകിയിട്ടുണ്ട്.

തൊഴിൽദാതാവിന്റെ അനുമതിയോടെ തന്നെ നേടിയ അവധി ദിനങ്ങളുടെ പേരിൽ നിങ്ങളെ ജോലിയിൽ നിന്ന് പിരിച്ചുവിടാനാകില്ല. കൂടാതെ അവധിതീരുമ്പോൾ ജോലിയിൽ തിരികെ പ്രവേശിക്കേണ്ടതാണ്. ഉഭയകക്ഷി സമ്മതത്തോടെ നേടിയ നീണ്ട അവധിക്കു ശേഷം ഏഴുദിവസത്തിനകം തിരികെ ജോലിയിൽ പ്രവേശിച്ചില്ലെങ്കിൽ നോട്ടിസ് നൽകാതെ തന്നെ പിരിച്ചുവിടാനും തൊഴിൽദാതാവിന് അധികാരമുണ്ട്.