ഗൾഫ് രാഷ്ട്രങ്ങളെ പ്രതിസന്ധിയിലാക്കി കോവിഡ് വ്യാപനം റിപ്പോർട്ട് ചെയ്തപ്പോൾ അതിൽ നിന്നെല്ലാം വേഗം കരകയറാൻ യുഎഇയ്ക്കായി എന്നത് പല റിപ്പോർട്ടുകളിലൂടെ നമുക്ക് കാണുവാൻ സാധിക്കും. മറ്റൊന്നുമല്ല ദുബായ് എക്സ്പോ തന്നെ അതിന് വലിയ ഉദാഹരണമാണ്. ആറ് മാസത്തെ ആറാട്ട് കഴിഞ്ഞപ്പോൾ ഉത്സവങ്ങൾ പാതി അവസാനിക്കുകയാണ് ഉണ്ടായത്. എന്നിരുന്നാലും കോവിഡിൽനിന്ന് കരകയറാൻ എക്സ്‌പോ 2020 സഹായിച്ചതായി യു.എ.ഇ തന്നെ വ്യക്തമാക്കുകയാണ്

വിദേശവ്യാപാര സഹമന്ത്രി ഡോ. താനി ബിൻ അഹമ്മദ് അൽ സെയൂദി പറഞ്ഞത് ഇപ്രകാരമായിരുന്നു. എക്സ്‌പോ 2020 നടന്ന ആറുമാസക്കാലം തന്നെ യു.എ.ഇ.യിലെ സർക്കാർ സ്ഥാപനങ്ങൾക്കും സ്വകാര്യകമ്പനികൾക്കും അക്കാദമിക് സ്ഥാപനങ്ങൾക്കും ഭാവി അജൻഡകൾ ഉയർത്താനുള്ള അവസരമുണ്ടായിരിക്കുകയാണ്. ദുബായ് എക്സ്‌പോ നഗരി അതുപോലെ തന്നെ നിലനിർത്താനും ഭാവി നഗരമാക്കി മാറ്റാനുമുള്ള പദ്ധതികളുമായി യു.എ.ഇ. നിലവിൽ മുന്നോട്ടുപോകുകയാണ്.

എക്സ്‌പോയുടെ വിജയത്തോടെ യു.എ.ഇ.യുടെ വിദേശ വ്യാപാര മേഖലയ്ക്കുണ്ടായ നേട്ടങ്ങൾ വിലമതിക്കാനാവാത്തതാണ് എന്നും അദ്ദേഹം വ്യക്തമാക്കുകയുണ്ടായി. ലോകത്തെ തന്നെ ഏറ്റവും പ്രധാനപ്പെട്ട വ്യാപാര ലക്ഷ്യസ്ഥാനങ്ങളിലൊന്ന് എന്നനിലയിൽ ദുബായുടെ സ്ഥാനം കൂടുതൽ മെച്ചപ്പെടുത്താൻ കഴിഞ്ഞിരുന്നു. അന്താരാഷ്ട്ര തലത്തിലേക്ക് കൂടുതൽ വാതിലുകൾ തുറക്കപ്പെടുകയുണ്ടായി. നയതന്ത്ര, വ്യാപാര മേഖലകളിലടക്കം പുതിയ കൂട്ടായ്മകൾക്ക് വഴിയൊരുക്കിയതായും അൽ സെയൂദി വിശദീകരിക്കുകയും ചെയ്തു.

അതോടൊപ്പം തന്നെ യു.എ.ഇ.യിലെ സാധ്യതകൾ ബോധ്യപ്പെട്ടതോടെ ആഫ്രിക്കയിലെയും പെസഫിക് ദ്വീപ് സമൂഹങ്ങളിലെയും രാജ്യങ്ങൾ വൻകിട സംരംഭങ്ങൾക്ക് തയ്യാറെടുക്കുന്നുവെന്നാണ് ലഭ്യമാകുന്ന വിവരം. ഇതുകൂടാതെ യു.എ.ഇ.യിൽ എംബസിയോ കോൺസുലേറ്റോ ഇല്ലാതിരുന്ന 60 രാജ്യങ്ങൾ കാര്യാലയങ്ങൾ സ്ഥാപിക്കാൻ ഒരുങ്ങുന്നതായും സ്ഥിരീകരിക്കാത്ത വിവരമുണ്ട്.

അതേസമയം എക്സ്പോ 2020 വിജയത്തിൽ നിർണായക പങ്കുവഹിച്ചവരാണ് വിവിധ വിഭാഗങ്ങളിലായി ആറുമാസക്കാലം സേവനമനുഷ്ഠിച്ച ജീവനക്കാർ. അവരിൽ മൂന്നിലൊന്നും സ്വദേശികളായതിന്റെ അഭിമാണ് യു.എ.ഇയ്ക്ക് ഉള്ളത്. ഇവരിൽ ഭൂരിഭാഗവും വനിതകളാണെന്ന പ്രത്യേകതയുമുണ്ട്.