നീണ്ട രണ്ടരവര്ഷത്തെ കാത്തിരിപ്പിന് ശേഷം ഗൾഫിൽ റമദാൻ നോമ്പ് ആരംഭിച്ചിരിക്കുകയാണ്. ഇപ്പോഴിതാ ചെറിയ പെരുന്നാളി അവധി പ്രഖ്യാപിച്ച് കുവൈറ്റ് രംഗത്ത് എത്തിയിരിക്കുകയാണ്. അടുത്ത മാസം തന്നെ മെയ് ഒന്ന് മുതൽ മെയ് അഞ്ച് വരെ അവധിയായിരിക്കുമെന്ന് സിവിൽ സർവീസ് കമ്മീഷൻ അറിയിക്കുകയുണ്ടായി. പെരുന്നാൾ അവധിക്ക് ശേഷം എല്ലാ മന്ത്രാലയങ്ങളും മറ്റ് സർക്കാർ സ്ഥാപനങ്ങളും മെയ് 8 ന് തുറക്കുന്നതായിരിക്കും.

ഈദുൽ ഫിതറിനോടനുബന്ധിച്ചുളള അവധി ദിവസങ്ങളിൽ സർക്കാർ ഉദ്യോ​ഗസ്ഥർ അവരുടെ ജോലി സമയം പൊതുതാൽപ്പര്യം മാനിച്ച് ക്രമീകരിക്കണമെന്നും സിവിൽ സർവീസ് കമ്മീഷൻ മാധ്യമങ്ങളോട് വ്യക്തമാക്കി.

അതോടൊപ്പം തന്നെ കുവൈത്ത് ആഭ്യന്തര മന്ത്രാലയം ചില സേവനങ്ങൾക്ക് ഫീസ് നിരക്ക് വർധിപ്പിക്കാൻ ഒരുങ്ങുന്നതായുള്ള റിപ്പോർട്ടുകളും പുറത്ത് വരികയുണ്ടായി. ഗതാഗത വകുപ്പിെൻറയും താമസകാര്യ വകുപ്പിന്‍റെയും ഫീസ് നിരക്കുകളിൽ വർധന അഭ്യർഥിച്ചുള്ള മെമ്മോറാണ്ടം ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ശൈഖ് അഹമ്മദ് നവാഫ് അസ്സബാഹിന് ഉടൻ സമർപ്പിക്കുമെന്ന് മന്ത്രാലയ വൃത്തങ്ങൾ വെളിപ്പെടുത്തുകയുണ്ടായി.

അങ്ങനെ സന്ദർശക വിസ ഉൾപ്പെടെയുള്ള സേവനങ്ങൾ ഇക്കൂട്ടത്തിൽപെടും എന്നാണ് ലഭ്യമാകുന്ന വിവരം. എന്നാൽ മെമ്മോറാണ്ടത്തിൽ പുതിയ ഫീസ് ഘടന ഉൾപ്പെടുത്തിയിട്ടില്ല. ഫീസ് വർധനക്ക് മന്ത്രി തത്ത്വത്തിൽ അംഗീകാരം നൽകിയാൽ തന്നെ പുതിയനിരക്ക് ഉൾപ്പെടുത്തി വിശദമായ നിർദേശം സമർപ്പിക്കുമെന്നും ഉന്നത ഉദ്യോഗസ്ഥരെ ഉദ്ധരിച്ച് അൽ അൻബ ദിനപത്രം പ്രസിദ്ധീകരിച്ച റിപ്പോർട്ടിൽ ചൂണ്ടിക്കാണിക്കുന്നു.

ബജറ്റ് കമ്മിയും വരുമാനം കുറഞ്ഞതുമാണ് സർക്കാറിനെ ഫീസ് വർധനക്ക് പ്രേരിപ്പിക്കുന്നത് തന്നെ. ചില മന്ത്രാലയങ്ങളിൽ ഇതിനകം സേവനഫീസ് നിരക്ക് വർധന നടപ്പാക്കിയിട്ടുമുണ്ട്. കൂടാതെ മറ്റു മന്ത്രാലയങ്ങളും ഇതി‍െൻറ ആലോചനയിലാണ്.