രണ്ടുവർഷത്തെ ഇടവേളയ്ക്ക് ശേഷം പ്രവാസികൾക്ക് പുതിയ സന്തോഷം; നിര്ത്തിവച്ച ഫാമിലി വിസിറ്റ് വിസ പുനരാരംഭിക്കാനുള്ള തീരുമാനവുമായി കുവൈറ്റ്, മേയ് 9 മുതൽ അപേക്ഷകൾ നല്കാൻ ആരംഭിച്ചു, അനുവദിച്ചിരുന്നത് കമേഴ്സ്യല് വിസിറ്റ് വിസകളും ടൂറിസ്റ്റ് വിസിറ്റ് വിസകളും മാത്രം
കൊവിഡ് വ്യാപനത്തെ തുടര്ന്നുണ്ടായ പ്രതിസന്ധിയുടെ പശ്ചാത്തലത്തില് നീണ്ട രണ്ട് വര്ഷമായി നിര്ത്തിവച്ച ഫാമിലി വിസിറ്റ് വിസ പുനരാരംഭിക്കാനുള്ള തീരുമാനവുമായി കുവൈറ്റ് രംഗത്ത് എത്തിയിരിക്കുകയാണ്. രണ്ടു വര്ഷത്തിലേറെയായി നിരോധനം ഏര്പ്പെടുത്തിയിരുന്ന വിസിറ്റ് വിസകള്ക്കാണ് മെയ് ഒന്പത് മുതല് അപേക്ഷ നല്കാമെന്ന് അധികൃതര് അറിയിച്ചിരിക്കുന്നത്.
നേരത്തെ തന്നെ കമേഴ്സ്യല് വിസിറ്റ് വിസകളും ടൂറിസ്റ്റ് വിസിറ്റ് വിസകളും മാത്രമാണ് അനുവദിച്ചിരുന്നത്. എന്നാല്, ഈദ് അല് ഫിത്ര് പ്രമാണിച്ച് കൊവിഡ് നിയന്ത്രണങ്ങള് പൂര്ണമായും ഒഴിവാക്കാന് മന്ത്രിസഭാ യോഗം തീരുമാനം കൈക്കൊണ്ട പശ്ചാത്തലത്തിലാണ് ഫാമിലി വിസിറ്റ് വിസകള്ക്കും അനുവാദം നല്കാന് അധികൃതര് നടപടി സ്വീകരിച്ചതെന്ന് പ്രാദേശിക അറബ് പത്രം റിപ്പോര്ട്ട് ചെയ്യുകയുണ്ടായി.
അതോടൊപ്പം തന്നെ മലയാളികള് ഉള്പ്പെടെയുള്ള പ്രവാസികള്ക്ക് ഏറെ അനുഗ്രഹമാവുന്ന തീരുമാനമാണ് ഇതെന്നാണ് പൊതുവെയുള്ള വിലയിരുത്തൽ. കൊവിഡ് കാരണം നാട്ടിലേക്ക് വരാനോ കുടുംബാംഗങ്ങളെ കുവൈറ്റിലേക്ക് കൊണ്ടുവരാനോ കഴിയാതെ നിരവധി പേര് ദുരിതത്തിൽ കഴിഞ്ഞിരുന്നു. വേനലവധി അവസാനിക്കുന്നതിന് മുമ്പ് തന്നെ വിസിറ്റ് വിസ അനുവദിക്കാനുള്ള തീരുമാനം പ്രവാസികള്ക്ക് ഏറെ അനുഗ്രഹമാകുന്നതായിരിക്കും.
കൂടാതെ വിസ അപേക്ഷിക്കുന്ന വ്യക്തിയുടെ യോഗ്യത അനുസരിച്ചായിരിക്കും കുടുംബ വിസിറ്റ് വിസ അനുവദിക്കുന്നത്. അപേക്ഷകന്റെ ശമ്പളം, ജോലി, രാജ്യം തുടങ്ങിയ മാനദണ്ഡങ്ങള് പരിഗണിച്ചായിരിക്കും അപേക്ഷകള് സ്വീകരിക്കുക തന്നെ. നിലവില് അഫ്ഗാനിസ്ഥാന്, ഇറാന്, ഇറാഖ്, ഉത്തര കൊറിയ, പാകിസ്ഥാന്, സിറിയ, യമന് എന്നീ രാജ്യക്കാര്ക്ക് ഫാമിലി വിസിറ്റ് വിസയ്ക്ക് അപേക്ഷിക്കുന്നതിന് നിയന്ത്രണം ഏർപ്പെടുത്തിയിട്ടുണ്ട്. മുന്കൂര് അനുമതി എടുത്ത ശേഷം മാത്രമേ ഇവര് വിസിറ്റ് വിസയ്ക്ക് അപേക്ഷിക്കാവൂ എന്നാണ് വ്യവസ്ഥ നൽകിയിരിക്കുന്നത്.
https://www.facebook.com/Malayalivartha