ഗൾഫ് രാഷ്ട്രങ്ങളെ ബന്ധിപ്പിച്ച് ഇനി റെയിൽവേ പാളങ്ങൾ. കുവെറ്റിൽ നിന്ന് അബുദാബി വഴി മസ്‌കറ്റിലേക്കുള്ള യാത്രകൾ ബന്ധിപ്പിക്കുന്നതിനായി ജിസിസി-വൈഡ് റെയിൽവേ തയ്യാറെടുക്കുന്നതായി റിപ്പോർട്ടുകൾ പുറത്ത് വന്നിരിക്കുകയാണ്. എല്ലാ ഗൾഫ് രാജ്യങ്ങളും അവരുടേതായ ശൃംഖലകൾ നിർമ്മിക്കുന്നതോടൊപ്പം തന്നെ ജിസിസി-വൈഡ് റെയിൽവേയുടെ നിർമ്മാണവും പുരോ​ഗമിച്ചുകൊണ്ടിരിക്കുന്നതായി കാണുവാൻ സാധിക്കും.

ലഭ്യമാകുന്ന വിവരങ്ങൾ അനുസരിച്ച് 2,177 കിലോമീറ്റർ ജിസിസി റെയിൽവേ ശൃംഖല അറബ് രാജ്യങ്ങളുമായി ബന്ധിപ്പിക്കാൻ കഴിയുമെന്നാണ് വിലയിരുത്തൽ. ഇതുകൂടാതെ ജിസിസി രാജ്യങ്ങൾ റെയിൽവേ ശൃംഖലയുടെ നിർമ്മാണത്തിൽ പുരോഗതി പ്രാപിച്ചുകൊണ്ടിരിക്കുകയാണെന്ന് മിഡിൽ ഈസ്റ്റ് റെയിലിന്റെ 16-ാമത് എഡിഷൻ ഉദ്ഘാടനം ചെയ്തുകൊണ്ട് യുഎഇയുടെ ഊർജ-അടിസ്ഥാന സൗകര്യ വികസന വകുപ്പ് മന്ത്രി സുഹൈൽ അൽ മസ്‌റൂയി വ്യക്തമാക്കുകയുണ്ടായി.

അങ്ങനെ 2050 ഓടേ 70 ശതമാനത്തോളം വരെ കാർബൺ വാതകം കുറക്കുക എന്ന ലക്ഷ്യത്തോടെയാണ് ജിസിസി-വൈഡ് റെയിൽവേ നിർമ്മിക്കാൻ ഒരുങ്ങുന്നത്. എന്നാൽ തന്നെയും ഇന്ധനം ഉൾപ്പെടെയുള്ള ആഗോള ഊർജ വില കുതിച്ചുയരുന്നത് പദ്ധതി നേരിടുന്ന പ്രധാന വെല്ലുവിലികളിൽ ഒന്നാണെന്ന് സുഹൈൽ അൽ മസ്‌റൂയി ചൂണ്ടികാട്ടുകയുണ്ടായി. ഇതിനായി തന്നെ രാജ്യങ്ങൾ സുസ്ഥിരതയും കാര്യക്ഷമതയും ഉറപ്പാക്കേണ്ടതുണ്ടെന്ന് മന്ത്രി കൂട്ടിചേർക്കുകയും ചെയ്തു.