ദുബായ് കരുതുമ്പോലെ അല്ല. വലിയ മാറ്റങ്ങളാണ് ദിനംപ്രതി കൊണ്ടുവരുന്നത്. എക്സ്പോ ഔദ്യോഗികമായി അവസാനിച്ചെങ്കിലും അങ്ങനെ അത് അവസാനിപ്പിക്കാൻ അധികൃതർ തയ്യാറല്ല. അതേ, ഓരോ വർഷവും 1,000 കോടി ദിർഹം മൂല്യമുള്ള വാണിജ്യ-വ്യവസായ സംരംഭങ്ങൾക്കു തുടക്കമിടാൻ ദുബായ് ഒരുങ്ങുന്നു. എക്സ്പോയ്ക്കു ശേഷമുണ്ടായ ഉണർവ് ഉപയോഗപ്പെടുത്തി കാർഷിക മേഖലയിലടക്കം ഉൽപാദനക്ഷമത വർധിപ്പിക്കുകയും തൊഴിലവസരങ്ങൾ സൃഷ്ടിക്കുകയും ചെയ്യുന്നതാണ്.

ദുബായ് മുനിസിപ്പാലിറ്റി, ലാൻഡ് ഡിപ്പാർട്മെന്റ് എന്നിവയുടെ അധികാരപരിധി വിപുലമാക്കിയതോടെ തന്നെ നടപടിക്രമങ്ങൾ കൂടുതൽ ലളിതവും സുതാര്യവുമാകുന്നതാണ്. കൂടാതെ പ്രവർത്തനച്ചെലവ് 10% കുറയ്ക്കാനും സേവന മികവ് 20% വർധിപ്പിക്കാനും കഴിയുമെന്നാണ് പ്രതീക്ഷ.

ഇത്തരത്തിൽ പദ്ധതികളുടെ അന്തിമരൂപരേഖ ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമും യുഎഇ ഉപപ്രധാനമന്ത്രിയും ധനമന്ത്രിയും ദുബായ് ഉപഭരണാധികാരിയുമായ ഷെയ്ഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂം എന്നിവരുടെ നേതൃത്വത്തിലുള്ള ഉന്നതതല സമിതി വിലയിരുത്തുകയുണ്ടായി. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ അധ്യക്ഷതയിൽ ചേർന്ന ദുബായ് കൗൺസിൽ യോഗം കഴിഞ്ഞദിവസമാണ് മുനിസിപ്പാലിറ്റി, ലാൻഡ് ഡിപാർട്മെന്റുകൾക്ക് കൂടുതൽ ചുമതലകൾ കൈമാറിയിരിക്കുന്നത്.

അങ്ങനെ അതിവേഗം നടപ്പിലാക്കാവുന്ന വികസന പദ്ധതികളുടെ തുടർഘട്ടത്തിനാണ് തുടക്കമാകുന്നതെന്ന് ഷെയ്ഖ് ഹംദാൻ ചൂണ്ടിക്കാണിക്കുകയുണ്ടായി. ആരോഗ്യം, നിക്ഷേപം, കാർഷികം തുടങ്ങിയ മേഖലകളിൽ കൂടുതൽ സംരംഭങ്ങൾ ആരംഭിക്കുകയും ചെയ്യുന്നതാണ്. രാജ്യത്തിന്റെ വളർച്ചയ്ക്കനുസരിച്ച് തന്നെ സേവനമികവ് വർധിപ്പിക്കുന്നതായിരിക്കും.

അതോടൊപ്പം തന്നെ രാജ്യാന്തര നിക്ഷേപകർക്ക് അവസരങ്ങളൊരുക്കും. സ്വകാര്യ മേഖലയുടെ പങ്കാളിത്തത്തോടെ സമയബന്ധിതമായി പദ്ധതികൾ പൂർത്തിയാക്കുമെന്നും വ്യക്തമാക്കുകയുണ്ടായി.

അൽ ഫഖ, അൽ ലുസൈലി, അൽ ഹബാബ്, അൽ മർമൂം, അൽ അവീർ, മർഗ്ഹം തുടങ്ങിയ ഗ്രാമീണ മേഖലകൾ വിനോദസഞ്ചാര കേന്ദ്രങ്ങളായി വികസിപ്പിക്കാനും പദ്ധതിയിട്ടിരിക്കുകയാണ്. പുതിയ വീസകളും നിലവിലുള്ള വീസകളിൽ വൻ ഇളവുകളും പ്രഖ്യാപിച്ചതോടെ തന്നെ വിനോദസഞ്ചാരികളുടെ എണ്ണം കൂടുമെന്നാണ് അധികൃതരുടെ പ്രതീക്ഷ. വേനൽക്കാലത്തും സന്ദർശകരെ ആകർഷിക്കാൻ പദ്ധതികൾ തുടങ്ങുന്നതാണ്.

ഇതുവഴി ബിസിനസ് ടൂറിസത്തിനും സാധ്യതയേറെയാണ്. സന്ദർശനത്തിനൊപ്പം തന്നെ സംരംഭങ്ങൾക്ക് തുടക്കമിടാനും കഴിയുന്നതാണ്. വെർച്വൽ ഓഫിസ് തുടങ്ങാനാകുമെന്നതിനാൽ സംരംഭകർ സ്ഥിരമായി യുഎഇയിൽ ഉണ്ടാകണമെന്നുമില്ല എന്നും അധികൃതർ ചൂണ്ടിക്കാണിക്കുകയാണ്.