അബുദാബിയിലെ അല് സഹിയയില് തീപിടിത്തം... അബുദാബി പോലീസിന്റെയും അബുദാബി സിവില് ഡിഫന്സിന്റെയും ഏറെനേരത്തെ ശ്രമഫലമായി തീ അണച്ചു.... ആളപായമില്ല!!
അബുദാബിയിലെ അല് സഹിയയില് തീപിടിത്തം. ഒരു അപ്പാര്ട്ട്മെന്റിലാണ് തീപിടിത്തമുണ്ടായത്. അബുദാബി പോലീസിന്റെയും അബുദാബി സിവില് ഡിഫന്സിന്റെയും ഏറെനേരത്തെ ശ്രമഫലമായി തീ അണച്ചു. ആളപായമില്ല. തീപിടിത്തത്തിന്റെ കാരണം കണ്ടെത്താന് അധികൃതര് ശ്രമം തുടങ്ങിയിട്ടുണ്ട്. സംഭവത്തെ കുറിച്ചുള്ള വിവരങ്ങള് ഔദ്യോഗിക സ്രോതസ്സുകളില് നിന്ന് മാത്രം സ്വീകരിക്കണമെന്ന് അധികൃതര് പൊതുജനങ്ങളോട് ആവശ്യപ്പെട്ടിട്ടുണ്ട്.
കഴിഞ്ഞ മാസം അല് സഹിയ ഏരിയയിലെ 30 നില കെട്ടിടത്തില് തീപിടിത്തമുണ്ടായിരുന്നു. അന്നും അബുദാബി പോലീസും അബുദാബി സിവില് ഡിഫന്സ് ടീമുകളും ചേര്ന്ന് വിജയകരമായി രക്ഷാപ്രവര്ത്തനം നടത്തിയിരുന്നു. സംഭവത്തില് 19 പേര്ക്ക് നിസാര പരിക്കേറ്റു. സുരക്ഷാ മുന്കരുതലെന്ന നിലയില് ഒഴിപ്പിച്ച താമസക്കാര്ക്ക് താത്കാലിക താമസ സൗകര്യവും ഒരുക്കി.
അബുദാബി എമിറേറ്റിലെ പൊതു പാര്ക്കിംഗ്, ഡാര്ബ് ടോള് എന്നിവ ഇനി ഞായറാഴ്ചകളില് സൗജന്യമാക്കും. പ്രവര്ത്തിദിനങ്ങളില് റോഡിലെ തിരക്ക് ക്രമീകരിക്കുന്നതിനും, റോഡ് സുരക്ഷ ഉറപ്പ് വരുത്തുന്നതിനും ലക്ഷ്യമിട്ടാണ് ഈ നടപടി. ആഴ്ചയില് ഒരു ദിവസം സൗജന്യമാക്കുന്ന സേവനം ഇതുവരെ വെള്ളിയാഴ്ചകളിലാണ് നടപ്പാക്കിയിരുന്നത്. പുതിയ തീരുമാനം ജൂലൈ 15 മുതല് നിലവില് വരും. അബുദാബി ഇന്റഗ്രേറ്റഡ് ട്രാന്സ്പോര്ട്ട് സെന്റര് (ഐടിസി) ആണ് ഇക്കാര്യം അറിയിച്ചത്.
പുതിയ തീരുമാനം നടപ്പാക്കുന്നതോടെ തിങ്കള് മുതല് ശനി വരെയുള്ള ദിനങ്ങളില് പൊതു പാര്ക്കിംഗ്, ഡാര്ബ് ടോള് ഗേറ്റ് എന്നിവയുമായി ബന്ധപ്പെട്ട ഫീസ് ഈടാക്കുന്നതാണ്. ഞായറാഴ്ച്ചകളിലും പൊതു അവധിദിനങ്ങളിലും മാത്രമാകും ഈ ഫീസ് ഒഴിവാക്കുക.
കഴിഞ്ഞ ജനുവരി ആദ്യം മുതല് എമിറേറ്റിലെ വാരാന്ത്യദിനങ്ങളില് മാറ്റം വരുത്താനുമുള്ള തീരുമാനത്തിന്റെ പശ്ചാത്തലത്തില് പൊതുഗതാഗത സംവിധാനങ്ങളുടെ പ്രവര്ത്തന സമയക്രമം മാറ്റിയിരുന്നു. എന്നാല് പൊതു പാര്ക്കിങ്ങുമായി ബന്ധപ്പെട്ട് തീരുമാനങ്ങള് എടുത്തിരുന്നില്ല. അവധി ദിനമായ ഞായറാഴ്ചകളിലെ തിരക്ക് കൂടി പരിഗണിച്ചാണ് പുതിയ നീക്കം.
ഒമാനില് കനത്ത മഴ തുടരുന്നു. മോശം കാലാവസ്ഥ പരിഗണിച്ച് രാജ്യത്തെ മുഴുവന് വിനോദസഞ്ചാര കേന്ദ്രങ്ങളും താത്കാലികമായി അടച്ചു. ദോഫാര് ഗവര്ണറേറ്റ് ഉള്പ്പടെയുള്ള ടൂറിസ്റ്റ് മേഖലകളില് വ്യാപക മഴക്കെടുതികള് റിപ്പോര്ട്ട് ചെയ്തിരുന്നു. ഇതിന്റെ കൂടി പശ്ചാത്തലത്തിലാണ് തീരുമാനം. ഒമാന് സിവില് ഡിഫെന്സ് ആന്ഡ് ആംബുലന്സ് അതോറിറ്റി (CDAA) ആണ് ഇക്കാര്യം അറിയിച്ചത്.
ഒമാനിലെ വിവിധ ഇടങ്ങളില് അതിശക്തമായ മഴയെ തുടര്ന്ന് പലയിടത്തും വെള്ളപ്പൊക്കമാണ്. അപകട സാധ്യതാ മേഖലകളില് നിന്ന് ജനങ്ങളെ ഒഴിപ്പിച്ച് സുരക്ഷിത സ്ഥാനങ്ങളിലേക്ക് മാറ്റുകയാണ്. ഈ സാഹചര്യത്തില് കാലാവസ്ഥ അനുകൂലമാകുന്നത് വരെ വിനോദ സഞ്ചാര മേഖലകള് അടച്ചിടാന് തീരുമാനിക്കുകയായിരുന്നു. ഇത്തരം ഇടങ്ങളിലേക്ക് ആര്ക്കും പ്രവേശനം അനുവദിക്കില്ലെന്നും സിഡിഎഎ വ്യക്തമാക്കിയിട്ടുണ്ട്. സുരക്ഷാ നിര്ദേശങ്ങള് കര്ശനമായി പാലിക്കാന് ജനങ്ങള്ക്ക് നിര്ദ്ദേശം നല്കി.
https://www.facebook.com/Malayalivartha
