കുവൈത്തില്‍ ജൂത മത ചിഹ്നങ്ങള്‍ ആലേഖനം ചെയ്‍ത ആഭരണങ്ങള്‍ വിറ്റതിനെ തുടര്‍ന്ന് വ്യാപാര സ്ഥാപനം അടച്ചുപൂട്ടിയതായി റിപ്പോർട്ട്. സാല്‍മിയയിലായിരുന്നു സംഭവം. കുവൈത്ത് വാണിജ്യ വ്യവസായ മന്ത്രാലയമാണ് നടപടിയെടുത്തതെന്ന് പ്രാദേശിക മാധ്യമമായ 'അല്‍ ഖബസ് ദിനപ്പത്രം' റിപ്പോര്‍ട്ട് ചെയ്യുകയുണ്ടായി.

അതേസമയം ജൂത മുദ്രാവാക്യങ്ങളും ചിഹ്നങ്ങളും ആലേഖനം ചെയ്‍ത ആഭരണങ്ങള്‍ വില്‍പന നടത്തുന്നത് കുവൈത്തില്‍ ക്രമ സമാധാനത്തിന് വിരുദ്ധമായ പ്രവൃത്തിയാണെന്ന് കണക്കാക്കുന്നതെന്നും പ്രാദേശിക മാധ്യമങ്ങളുടെ റിപ്പോര്‍ട്ട് ചൂണ്ടിക്കാണിക്കുന്നു. വാണിജ്യ വ്യവസായ മന്ത്രാലയത്തിലെ എമര്‍ജന്‍സി ടീം, നിയമലംഘനത്തിനെതിരെ നടപടി സ്വീകരിക്കുകയും ഇത് സംബന്ധിച്ച റിപ്പോര്‍ട്ട് നല്‍കുകയും ചെയ്‍തു. നിലവിൽ കടയുടമയ്‍ക്കെതിരെ നിയമപരമായ നടപടികള്‍ സ്വീകരിച്ചുവരികയാണ്.