സൗദി അറേബ്യയിൽ വീണ്ടും ഭൂചലനം അനുഭവപ്പെട്ടു. സൗദിയിലെ അല്‍ ബാഹ മേഖലയിലാണ് ഭൂചലനം അനുഭവപ്പെട്ടിരിക്കുന്നത്. ഒരാഴ്ചയ്ക്കിടെ ഇത് രണ്ടാം തവണയാണ് ഈ മേഖലയിൽ ഭൂചലനം അനുഭവപ്പെട്ടത് എന്നാണ് റിപ്പോർട്ട്. ഞായറാഴ്ച വൈകുന്നേരമുണ്ടായ ഭൂചലനം റിക്ടര്‍ സ്‍കെയിലില്‍ 1.95 തീവ്രത രേഖപ്പെടുത്തിയിരുന്നു. സൗദി ജിയോളജിക്കല്‍ സര്‍വേ അതോറിറ്റി വക്താവ് താരിഖ് അബാ ഖൈല്‍ ആണ് ഭൂചലനം ഉണ്ടായ വിവരം അറിയിച്ചിരുന്നത്.

അഞ്ച് കിലോമീറ്റര്‍ ആഴത്തിലായാണ് ഭൂചലനം രേഖപ്പെടുത്തിയിരിക്കുന്നത്. ഉപരിതലവുമായി താരതമ്യേനെ അടുത്തായതിനാല്‍ തന്നെ ചില പ്രദേശങ്ങളിലെ ജനങ്ങള്‍ക്ക് ചലനം അനുഭവപ്പെടുകയുണ്ടായി. വളരെ ചെറിയ ഭൂചലനമാണ് ഉണ്ടായതെന്നും രാജ്യത്ത് എവിടെയും നാശനഷ്ടങ്ങളുണ്ടായിട്ടില്ലെന്ന് ജിയോളജിക്കല്‍ സര്‍വേ അതോറിറ്റി വക്താവ് അറിയിക്കുകയുണ്ടായി.

അതേസമയം ഭൂമിശാസ്‍ത്രപരമായ പ്രത്യേകതകള്‍ കാരണം ആണ് സൗദിയിൽ ചെറിയ ഭൂചലനങ്ങൾ ഉണ്ടാകുന്നത്. ഭൂചലനം നിരീക്ഷിക്കാനായി രാജ്യത്തുടനീളം മൂന്നൂറിലധികം നിരീക്ഷണ കേന്ദ്രങ്ങളുണ്ടെന്ന് ജിയോളജിക്കല്‍ സര്‍വേ അതോറിറ്റി വക്താവ് പറയുകയുണ്ടായി. കഴിഞ്ഞ ബുധനാഴ്ച രാവിലെയാണ് അല്‍ ബാഹയുടെ തെക്ക്-പടിഞ്ഞാറന്‍ മേഖലയില്‍ ചെറിയ ഭൂചലനമുണ്ടായിരുന്നു. റിക്ടര്‍ സ്‍കെയിലില്‍ 3.62 ആണ് തീവ്രത രേഖപ്പെടുത്തിയിരുന്നത്.