യു.എ.ഇയിൽ ഡസ്റ്റ് ഡെവിൾ എന്നറിയപ്പെടുന്ന കാലാവസ്ഥാ പ്രതിഭാസത്തിന്റെ വീഡിയോ പങ്കുവെച്ച് കാലാവസ്ഥാ നിരീക്ഷണ കേന്ദ്രം രംഗത്ത് എത്തിയിരിക്കുകയാണ്. ചുഴലിക്കാറ്റിൽ പൊടി ഫണൽ രൂപത്തിൽ ആകാശത്തേക്ക് ഉയരുന്ന കാഴ്ചയാണ് ഇതിലൂടെ കാണുവാൻ സാധിക്കുന്നത്. ഷാർജയിലെ മദാം മേഖലയിൽനിന്നാണ് ഈ കാഴ്ച്ച കാമറയിൽ പകർത്തിയിരിക്കുന്നത്.

അതോടൊപ്പം തന്നെ യു.എ.ഇയുടെ പലഭാഗങ്ങളിലും ഇന്നലെ മഴയും ആലിപ്പഴ വർഷവും റിപ്പോർട്ട് ചെയ്തിരുന്നു. ഡസ്റ്റ് ഡെവിൾ യു.എ.ഇയിൽ അപൂർവ കാഴ്ചയാണെങ്കിലും കഴിഞ്ഞദിവസവും സമാനമായ വീഡിയോ സമൂഹിക മാധ്യമങ്ങളിൽ പ്രചരിച്ചിരുന്നു. അബൂദബി എമിറേറ്റിന്റെ കിഴക്കൻ മേഖലയിൽ ഇന്നും മഴക്കും പൊടിക്കാറ്റിനും സാധ്യതയുണ്ടെന്നാണ് മുന്നറിയിപ്പ്.

അതേസമയം കഴിഞ്ഞ ഞായറാഴ്ച പുലർച്ചെ യുഎഇയുടെ വിവിധ ഭാഗങ്ങളിൽ കനത്ത മൂടൽ മഞ്ഞ് അനുഭവപ്പെട്ടത്. ഇതേതുടർന്ന് തീരപ്രദേശങ്ങളിൽ ഉൾപ്പടെ രാജ്യത്ത് മുന്നറിയിപ്പ് പുറപ്പെടുവിച്ചിട്ടുണ്ടായിരുന്നു. ഉൾപ്രദേശങ്ങളിലും കാലാവസ്ഥാ കേന്ദ്രം മുന്നറിയിപ്പ് പുറപ്പെടുവിച്ചിട്ടുമുണ്ട്.

പിന്നാലെ ദേശീയ കാലാവസ്ഥാ നിരീക്ഷണകേന്ദ്രം റെഡ്, യെല്ലോ അലേർട്ടുകൾ പുറപ്പെടുവിക്കുകയുണ്ടായി. റോഡുകളിലെ പരമാവധി വേഗപരിധി മാറ്റിയിട്ടുണ്ട്. ഇലക്ട്രോണിക് സൈൻ ബോർഡുകളിൽ കാണിക്കുന്ന നിർദേശം കൃത്യമായി പാലിക്കണമെന്നും അതിൽ കാണുന്ന വേഗപരിധി അനുസരിച്ച് വാഹനങ്ങൾ സുരക്ഷിതമായി ഡ്രൈവ് ചെയ്യണമെന്നും പോലീസ് മുന്നറിയിപ്പ് നൽകി. അൽ ഐൻ- ദുബായ് റോഡിൽ ജാഗ്രത പാലിക്കണമെന്ന് ദുബായ് പോലീസ് സമൂഹമാധ്യമങ്ങളിലൂടെ ആവശ്യപ്പെട്ടു. പ്രധാന റോഡുകളില്ലാം ജാഗ്രത പുലർത്തണമെന്നാണ് പോലീസ് നൽക്കിയിരുന്ന നിർദേശം.

അതോടൊപ്പം തന്നെ മൂടൽമഞ്ഞ് കണ്ടു തുടങ്ങിയതിന് പിന്നാലെ യുഎഇയിൽ അനുഭവപ്പെടുന്ന കനത്ത ചൂട് കുറഞ്ഞു. അബുദാബിയിൽ 26 ഡിഗ്രി സെൽഷ്യസ് വരെയും ദുബായിൽ 27 ഡിഗ്രി സെൽഷ്യസ് വരെയും അന്തരീക്ഷ താപനില കുറയുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. അല്‍ ഐന്‍ - ദുബായ് റോഡിലും അല്‍ ബദ - നഹില്‍ റോഡിലും സ്വൈഹാന്‍ റോഡിലും മണിക്കൂറില്‍ 80 കിലോമീറ്ററായിരിക്കും വേഗപരിധിയെന്നും പോലീസ് അറിയിച്ചു.