ഒരു വര്‍ഷം മുഴുവന്‍ സൗജന്യമായി ഇന്ധനം നിറയ്ക്കാന്‍ അവസരം ഒരുങ്ങുന്നു. പുതിയ വാഗ്ദാനവുമായി യുഎഇയിലെ ഇന്ധന വിതരണ കമ്പനിയായ എമറാത്ത് രംഗത്ത് എത്തിയിരിക്കുകയാണ്. ഒക്ടോബര്‍ 29ന് നടക്കാനിരിക്കുന്ന അഡ്‍നോക് പ്രോ ലീഗ് മത്സരം കാണാനെത്തുന്നവര്‍ക്കായിരിക്കും ഈ ആനുകൂല്യം ലഭിക്കുക. കമ്പനി സാമൂഹിക മാധ്യമങ്ങളിലൂടെയാണ് ഇത്തരത്തിൽ അറിയിച്ചിരിക്കുന്നത്.

അതോടൊപ്പം തന്നെ മത്സരം കാണാനെത്തുന്നവരില്‍ നിന്ന് തെരഞ്ഞെടുക്കപ്പെടുന്നവര്‍ക്കായിരിക്കും ഒരു വര്‍ഷത്തേക്ക് സൗജന്യമായി ഇന്ധനം നിറയ്ക്കാനുള്ള 'ലോട്ടറിയടിക്കുക' എന്നാണ് സൂചന. സമ്മാന പദ്ധതികള്‍ക്ക് വ്യവസ്ഥകളും നിബന്ധനകളും ബാധകമായിരിക്കുമെന്ന് അറിയിച്ചിട്ടുമുണ്ട്. ഒക്ടോബര്‍ 29 ശനിയാഴ്ച ദുബൈ റാഷിദ് സ്റ്റേഡിയത്തിലാണ് മത്സരം നടക്കുക.

കൂടാതെ ശബാബ് അല്‍ അഹ്‍ലി എഫ്.സിയും അല്‍ ഐന്‍ എഫ്.സിയും തമ്മിലാണ് അന്ന് ഏറ്റുമുട്ടുന്നത്. ശബാബ് അല്‍ അഹ്‍ലി എഫ്.സിയുടെ 2022-23 വര്‍ഷത്തേക്കുള്ള ഔദ്യോഗിക എനര്‍ജി പാര്‍ട്ണറാണ് എമറാത്ത്.