യുഎഇയിൽ നിന്ന് യാത്രചെയ്യുമ്പോൾ ഇത് കരുതണം, താമസവിസക്കാർ വിദേശ രാജ്യങ്ങളിൽ പോകുമ്പോൾ തിരിച്ചറിയൽ കാർഡായ എമിറേറ്റ്സ് ഐഡി കൈയിൽ കരുതണമെന്ന് മുന്നറിയിപ്പ്
പ്രവാസികളുടെ പാസ്പോർട്ടിൽ താമസവിസ പതിപ്പിക്കുന്ന നിയമം യുഎഇ നിർത്താലാക്കിയിരുന്നു. വിസക്ക് പകരം ഔദ്യോഗിക തിരിച്ചറിയൽ രേഖയായ എമിറേറ്റ്സ് ഐഡി ഉപയോഗിക്കാനുള്ള സംവിധാനമാണ് ഒരുക്കിയിട്ടുള്ളത്. പുതിയ സംവിധാനം നിലവിൽ വന്നതോടെ താമസവിസ കാണിക്കേണ്ട സാഹചര്യങ്ങളില് എമിറേറ്റ്സ് ഐഡിയാണ് ഇപ്പോൾ ഉപയോഗിക്കുന്നത്. ചെറിയ പെരുന്നാൾ അവധി ദിവസങ്ങളിൽ നാട്ടിൽ പോകാത്തവർ വിദേശ രാജ്യങ്ങളിൽ ട്രിപ്പ് പ്ലാൻ ചെയ്തിട്ടുള്ളർ, അതുമല്ലെങ്കിൽ വിദേശ രാജ്യങ്ങളിൽ പോകാനാഗ്രഹിക്കുന്ന യുഎഇ താമസവിസക്കാർക്കുള്ള ഒരു മുന്നറിയിപ്പാണിത്.
യാത്രയ്ക്ക് തയാറെടുക്കുന്നവർ തിരിച്ചറിയൽ കാർഡായ എമിറേറ്റ്സ് ഐഡി കൈയിൽ കരുതണമെന്ന് വിദഗ്ധർ നൽകുന്ന മുന്നറിയിപ്പ്. വിസാ വിവരങ്ങൾ എമിറേറ്റ്സ് ഐഡിയുമായി ബന്ധിപ്പിച്ചതിനാൽ യാത്രാ നടപടികൾ സുഗമമാക്കുന്നതിന് വേണ്ടിയാണിത്. അതിനാൽ എമിറേറ്റ്സ് ഐഡി ഉണ്ടെങ്കിൽ തടസ്സമില്ലാതെ നടപടിക്രമങ്ങൾ പൂർത്തിയാക്കാം. ഇന്ത്യ ഉൾപ്പെടെ വിദേശ രാജ്യങ്ങളിലെ വിമാനത്താവളങ്ങളിലെല്ലാം എമിറേറ്റ്സ് ഐഡി ആവശ്യപ്പെട്ടുതുടങ്ങിയതായും ട്രാവൽ രംഗത്തുള്ളവർ വ്യക്തമാക്കുന്നു.
യാത്ര ചെയ്യുമ്പോള് വിമാനകമ്പനികള്ക്ക് പാസ്പോര്ട്ട് നമ്പറും എമിറേറ്റ്സ് ഐഡിയും പരിശോധിച്ചാല് യാത്രക്കാരന്റെ വിസയുടെ വിവരങ്ങള് ലഭ്യമാക്കാന് സൗകര്യമൊരുക്കും. പുതിയ മാറ്റങ്ങളുടെ ഭാഗമായി അടുത്തിടെ യുഎഇ എമിറേറ്റ്സ് ഐഡി, കൂടുതല് വിവരങ്ങള് ചേര്ത്ത് പരിഷ്കരിച്ചിരുന്നു. കൂടാതെ ഐഡി ഇഷ്യു ചെയ്യുന്നതിനുള്ള ഫീസു വര്ദ്ധിപ്പിച്ചിരുന്നു. എമിറേറ്റ്സ് ഐഡി ഇഷ്യൂ ചെയ്യുന്നതിന് നേരത്തെ ഈടാക്കിയിരുന്ന ഫീസ് 270 ദിര്ഹമായിരുന്നു. ഇത് ഇനി മുതല് 370 ദിര്ഹമായിരിക്കും.
അതേസമയം സര്ക്കാര് സേവനങ്ങള് ലഭ്യമാക്കാനും എയര്പോര്ട്ട് സ്മാര്ട്ട് ഗേറ്റുകള് ഉപയോഗിച്ച് എളുപ്പത്തില് ഇമിഗ്രേഷന് കടന്നുപോകാനുമെല്ലാം എമിറേറ്റ്സ് ഐഡി വേണം. എന്നാല് ഈ സുപ്രധാന രേഖ നഷ്ടപ്പെട്ടാലോ? പലരും ഇത്തരം സന്ദര്ഭങ്ങളില് ആകെ പരിഭ്രാന്തരാവുക സ്വാഭാവികം. എന്നാല് 24 മണിക്കൂറിനുള്ളില് പുതിയ എമിറേറ്റ്സ് ഐഡി സ്വന്തമാക്കാന് കഴിയുമെന്ന കാര്യം പലര്ക്കും അറിയില്ല. ഫെഡറല് അതോറിറ്റി ഫോര് ഐഡന്റിറ്റി, സിറ്റിസണ്ഷിപ്പ്, കസ്റ്റംസ് ആന്ഡ് പോര്ട്ട് സെക്യൂരിറ്റി നല്കുന്ന ഫൗരി എന്ന സേവന ആപ്പ് വഴിയാണ് ഇത് ലഭ്യമാവുക.
യുഎഇയില് താമസിക്കുന്ന യുഎഇ, ജിസിസി പൗരന്മാര്ക്കും, എമിറേറ്റ്സ് ഐഡി കാര്ഡുകള് ആദ്യമായി എടുക്കുന്നതിനും കാലഹരണപ്പെട്ട കാര്ഡുകള് പുതുക്കുന്നതിനും നഷ്ടപ്പെട്ടതോ കേടായതോ ആയ കാര്ഡുകള് മാറ്റിസ്ഥാപിക്കുന്നതിനും യുഎഇ, ജിസിസി പൗരന്മാരല്ലാത്ത പ്രവാസികള്ക്ക് അവരുടെ നഷ്ടപ്പെട്ടതോ കേടായതോ ആയ തിരിച്ചറിയല് കാര്ഡുകള് മാറ്റിസ്ഥാപിക്കുന്നതിന് ഫൗരി സേവനം പ്രയോജനപ്പെടുത്താം. എല്ലാ പ്രായക്കാര്ക്കും അപേക്ഷിക്കാമെന്നതാണ് മറ്റൊരു സവിശേഷത. എന്നാല്
എമിറേറ്റ്സ് ഐഡി കാര്ഡ് നഷ്ടപ്പെടുകയോ മോഷ്ടിക്കപ്പെടുകയോ ചെയ്താല് ആദ്യം ചെയ്യേണ്ടത് ഐഡന്റിറ്റി തെളിയിക്കുന്നതിനുള്ള മറ്റേതെങ്കിലും രേഖകളുമായി അടുത്തുള്ള ഫെഡറല് അതോറിറ്റി ഫോര് ഐഡന്റിറ്റി, സിറ്റിസണ്ഷിപ്പ്, കസ്റ്റംസ് ആന്ഡ് പോര്ട്ട് സെക്യൂരിറ്റിയുടെ കസ്റ്റമര് ഹാപ്പിനെസ് സെന്ററില് പോയി സംഭവം റിപ്പോര്ട്ട് ചെയ്യുകയും കാര്ഡ് നിര്ജ്ജീവമാക്കുകയും ചെയ്യുക എന്നതാണ്.
കാര്ഡ് കേടായതാണെങ്കില് പഴയ കാര്ഡും കൂടെ കരുതണം. യുഎഇ പൗരന്മാര് അവരുടെ യഥാര്ത്ഥ പാസ്പോര്ട്ടും ഫാമിലി ബുക്കും ജിസിസി പൗരന്മാര് യുഎഇയിലെ താമസം തെളിയിക്കുന്ന രേഖയുമാണ് ഇതിനായി കൊണ്ടുപോവേണ്ടത്. പ്രവാസി താമസക്കാര് തങ്ങളുടെ സാധുതയുള്ള റസിഡന്സി പെര്മിറ്റ് സ്റ്റാമ്പ് ചെയ്ത യഥാര്ത്ഥ പാസ്പോര്ട്ട് കൈയില് കരുതണം.
https://www.facebook.com/Malayalivartha
