നാട്ടിലേക്ക് പോകാനായി തയ്യാറെടുത്ത പ്രവാസിയെ താമസസ്ഥലത്ത് മരിച്ച നിലയിൽ കണ്ടെത്തി. എറണാകുളം തോപ്പുംപടി കല്ലിങ്ങൽ വീട്ടിൽ പോൾസണെയാണ് റിയാദിലെ താമസസ്ഥലത്ത് മരിച്ച നിലയിൽ കണ്ടെത്തിയത്. 56 വയസായിരുന്നു. റിയാദ് മൻഫുഅയിലെ താമസസ്ഥലത്ത് വെച്ചാണ് മരിച്ച നിലയിൽ കണ്ടെത്തിയത്. ഞായറാഴ്ച രാവിലെ 11-ന് സൗദി എയർലൈൻസ് വിമാനത്തിൽ നാട്ടിലേക്ക് പോകാൻ ടിക്കറ്റ് എടുത്തിരുന്നു ഇദ്ദേഹം.

അന്ന് രാവിലെ സുഹൃത്തുക്കൾ മുറിയിലെത്തിയപ്പോഴാണ് ഇദ്ദേഹത്തെ കിടക്കയിൽ മരിച്ച നിലയിൽ കിടക്കുന്നത് കണ്ടെത്തിയത്. പ്രമേഹരോഗ ബാധിതനാണ് ഇദ്ദേഹം. 10 ദിവസം മുമ്പാണ് അവധിക്ക് നാട്ടിലേക്ക് പോയത്. ഡോക്ടറെ കണ്ട് തിരിച്ചു വന്നു. എന്നാൽ രോഗം മൂർച്ഛിച്ചതിനാൽ വിദഗ്ധ ചികിത്സക്കായി വീണ്ടും നാട്ടിൽ പോകാൻ തീരുമാനിച്ചു.

അങ്ങനെ ഞായറാഴ്ച രാവിലെ പോകാനുള്ള ഒരുക്കങ്ങളൊക്കെ പൂർത്തിയാക്കിയിരുന്നു.അതിനിടെയാണ് പോൾസണെ കിടക്കയിൽ മരിച്ച നിലയിൽ കാണപ്പെട്ടത്.  ഉടൻ തന്നെ സുഹൃത്തുക്കൾ പോലീസിൽ വിവിരം അറിയിക്കുകയും ചെയ്തു. 6 വർഷമായി സൗദിയിലുള്ള പോൾസൺ ഒരു പ്രിൻറിങ് പ്രസിൽ ജോലി ചെയ്യുകയായിരുന്നു.

റിയാദിലെ നവോദയ കലാസാംസ്കാരിക വേദി മൻഫുഅ യൂണിറ്റംഗമാണ് . മൃതദേഹം നാട്ടിലേക്ക് കൊണ്ടുപോകാൻ ആണ് തീരുമാനിച്ചിരിക്കുന്നത്. അതിന് വേണ്ടിയുള്ള നടപടിക്രമങ്ങൾ പൂർത്തിയാക്കി കൊണ്ടിരിക്കുകയാണ്. നവോദയ പ്രവർത്തകർ ആവശ്യമായ പ്രവർത്തനങ്ങൾക്ക് രംഗത്തുണ്ട്.  ഭാര്യ - റൂബി, മക്കൾ - അയോണ, അലന.