ഹിജ്റ പുതുവർഷാരംഭത്തിന്റെ (മുഹറം ഒന്ന്) ഭാഗമായി ഷാർജയിൽ നാലുദിവസത്തെ അവധി പ്രഖ്യാപിച്ചു. പൊതുമേഖലാ ജീവ:നക്കാർക്കുള്ള അവധിയാണ് ഹ്യൂമൺ റിസോഴ്‌സ് വകുപ്പ് പ്രഖ്യാപിച്ചത്.

ഈ മാസം 20-ന് ഹിജ്‌റ പുതുവത്സര അവധിയാരംഭിക്കും. 24 മുതൽ പ്രവൃത്തിദിവസം പുനരാരംഭിക്കും. ഷാർജ സർക്കാർ വകുപ്പുകൾ കഴിഞ്ഞവർഷം ജനുവരിയിൽ മൂന്നുദിവസത്തെ വാരാന്ത്യ അവധിയിലേക്ക് മാറിയിരുന്നു. ജീവനക്കാർക്ക് വെള്ളി, ശനി, ഞായർ ദിവസങ്ങളിലാണ് അവധി. അതുകൊണ്ട് വ്യാഴാഴ്ച ഹിജ്‌റ പുതുവത്സര അവധി പ്രഖ്യാപിച്ചതോടെ ജീവനക്കാർക്ക് നാലുദിവസത്തെ വാരാന്ത്യം ലഭിക്കും. ഷാർജയിലെ സ്വകാര്യമേഖലയുടെ അവധി വൈകാതെ പ്രഖ്യാപിക്കും.

അതേസമയം മറ്റ് എമിറേറ്റുകളിൽ ജൂലായ് 21-നാണ് പൊതു സ്വകാര്യ മേഖലകൾക്ക് ഔദ്യോഗിക അവധി പ്രഖ്യാപിച്ചിരിക്കുന്നത്. സ്വകാര്യ മേഖലയിലെ ജീവനക്കാർക്ക് ശമ്പളത്തോടുകൂടിയ അവധിയാണ്. കുവൈറ്റിലും ഒമാനിലും ജൂലായ് 19-നാണ് പൊതു അവധി.

സൗദി അറേബ്യയിലെ സ്വകാര്യ മേഖലയില്‍ ജോലി ചെയ്യുന്ന ജീവനക്കാർക്ക് ഈ വർഷത്തെ ബലിപെരുന്നാൾ അവധി സൗദി മാനവ വിഭവ ശേഷി, സാമൂഹിക വികസന മന്ത്രാലയം പ്രഖ്യാപിച്ചു. സ്വകാര്യ നോൺ - പ്രോഫിറ്റ് മേഖലയിലെ തൊഴിലാളികൾക്ക് നാലു ദിവസത്തെ പെരുന്നാൾ അവധിയായിരിക്കുമെന്ന് കഴിഞ്ഞ ദിവസം മന്ത്രാലയം അറിയിച്ചു.

ജൂൺ 27 (ദുൽഹജ്ജ് - ഒന്‍പത്) അറഫാ ദിനം മുതൽ 30 വരെയാണ് ജീവനക്കാർക്ക് അവധിക്ക് അർഹതയുണ്ടാവുകയെന്ന് മന്ത്രാലയം അറിയിച്ചു. ജൂൺ 30 വാരാന്ത്യ അവധി ആയതിനാൽ അതിന് പകരം മറ്റൊരു ദിവസം അവധി നൽകണം. ഇത് തൊഴിലുടമക്ക് തീരുമാനിക്കാം. പൊതുമേഖല ജീവനക്കാർക്ക് വാരാന്ത്യ അവധിയടക്കം രണ്ടാഴ്‌ചയോളം പെരുന്നാൾ അവധി ലഭിക്കും. അതേ സമയം സ്വകാര്യ നോൺ - പ്രോഫിറ്റ് മേഖലയിലെ തൊഴിലാളികൾക്ക് അറഫാ ദിനം മുതൽ ദുൽഹജ്ജ് 12 വരെയുള്ള നാലു ദിവസത്തെ അവധിയാണ് ലഭിക്കുന്നത്.