തിരുവനന്തപുരം വിമാനത്താവളത്തിൽ കഴിഞ്ഞ ദിവസം ദുബായിലേക്കുള്ള എയർ ഇന്ത്യ വിമാനം അടിയന്തരമായി തിരിച്ചിറക്കി. തിരുവനന്തപുരം- ദുബായ് എയർ ഇന്ത്യ എക്പ്രസ്സ് വിമാനമാണ് അടിയന്തിരമായി തിരിച്ചിറക്കിയത്. സാങ്കേതിക തകരാറിനെ തുടർന്നാണ് ഏതാണ്ട് ഒരു മണിക്കുറിന് ശേഷം വിമാനം തിരിച്ചിറക്കിയത്. ഉച്ചയ്ക്ക് 1: 19 ന് ആണ് വിമാനം പുറപ്പെട്ടത്. 3: 53 ന് ആണ് വിമാനം തിരിച്ചിറക്കിയത്. ‌175 യാത്രക്കാരുമായാണ് വിമാനം പറന്നുയർന്നത്. എസിയിലാണ് തകരാർ കണ്ടെത്തിയത് എന്നാണ് ലഭിക്കുന്ന വിവരം.

യാത്രക്കാരെല്ലാവരും സുരക്ഷിതരാണെന്ന് അധികൃതർ വ്യക്തമാക്കിരുന്നു. എയർ ഇന്ത്യൻ എക്സപ്രസിന്റേത് തന്നെ മറ്റൊരു വിമാനത്തിൽ യാത്രക്കാരെ ഉടൻ ദുബായിലേക്ക് കൊണ്ടുപോയി. അതേസമയം, എയർ ഇന്ത്യ വിമാനത്തിന്റെ ന്യൂഡൽഹി- തിരുവനന്തപുരം വിമാനം ഒമ്പത് മണിക്കൂർ വൈകിയാണ് ഞായറാഴ്ച തിരുവനന്തപുരത്ത് എത്തിയത്. ശനിയാഴ്ച്ച രാത്രി 9.45 ന് പുറപ്പെടേണ്ടിയിരുന്ന വിമാനം ഇന്നലെ രാവിലെ ആറ് മണിക്കാണ് പുറപ്പെട്ടത്.

ഇതോടെ യാത്രക്കാർ വലഞ്ഞു. പൈലറ്റില്ലാത്തതാണ് വൈകിയതിന് കാരണം എന്നാൽ, ഇക്കാര്യം മറച്ചുവച്ച എയർഇന്ത്യ, യാത്രക്കാർ കടുത്ത പ്രതിഷേധം ഉയർത്തിയ ശേഷമാണ് കാരണം അറിയിച്ചത്. താമസ സൗകര്യം ഏർപ്പെടുത്തി നൽകാത്തതിനാൽ സ്ത്രീകളും കൈക്കുഞ്ഞുങ്ങളുമടക്കം 175 യാത്രക്കാർക്ക് ഒൻപത് മണിക്കൂറോളം വിമാനത്താവളത്തിൽ കഴിച്ചു കൂട്ടേണ്ടി വന്നത്.

പല വിദേശരാജ്യങ്ങളിൽ നിന്നടക്കം ഡൽഹിയിലെത്തി കണക്ഷൻ വിമാനമായ എയർ ഇന്ത്യയെ ആശ്രയിച്ചവരും കൂട്ടത്തിലുണ്ടായിരുന്നു. യാത്രക്കാർ പ്രതിഷേധിച്ചപ്പോൾ ഒരു മണിക്കൂറിനുള്ളിൽ പുറപ്പെടുമെന്നായിരുന്നു അധികൃതർ ആദ്യം പറഞ്ഞത്. ആ സമയം കഴിഞ്ഞിട്ടും പുറപ്പെടാതായതോടെ യാത്രക്കാർ കടുത്ത പ്രതിഷേധം ഉയർത്തിയപ്പോഴാണ് പൈലറ്റില്ലെന്ന കാരണം അധികൃതർ പറയുന്നത്. രാത്രി 12ന് മുമ്പ് വിവരമറിയിച്ചാൽ താമസസൗകര്യം ഏർപ്പെടുത്തി നൽകേണ്ടിവരുമെന്നതു കൊണ്ടാണ് ഒരുമണിക്കുശേഷം വിവരമറിയിച്ചതെന്നാണ് ആക്ഷേപം.

കടുത്ത അലംഭാവമാണ് എയർ ഇന്ത്യയുടെ ഭാഗത്തുനിന്ന് ഉണ്ടായതെന്നും യാത്രക്കാരെ ബുദ്ധിമുട്ടിച്ചതിനെതിരെ പരാതി നൽകുമെന്നും വിമാനത്തിലുണ്ടായിരുന്ന പി.സി.വിഷ്ണുനാഥ് എം.എൽ.എ പറഞ്ഞു. വിശ്രമത്തിനിടെ റൂമിൽ പൈലറ്റ് ഉറങ്ങിപ്പോയതു കാരണം കഴിഞ്ഞ ദിവസം മുംബയിൽ നിന്ന് കോഴിക്കോടേക്കുള്ള എയർഇന്ത്യ വിമാനം മണിക്കൂറുകൾ വൈകി പുറപ്പെട്ടതും യാത്രക്കാരെ വലച്ചിരുന്നു. സാങ്കേതിക തടസങ്ങള്‍ മൂലം വിമാനം എമര്‍ജൻസി ലാൻഡിങ് നടത്തുന്ന സംഭവങ്ങള്‍ കഴിഞ്ഞ ഏതാനും മാസങ്ങളായി പതിവായിട്ടുണ്ട്.