യുഎഇയിൽ അസ്ഥിര കാലാവസ്ഥ തുടരുകയാണ്. കിഴക്കൻ മേഖലയിൽ ശക്തമായ കാറ്റും മഴയുമാണ് അനുഭവപ്പെടുന്നത്. അടുത്ത ദിവസങ്ങളിലും യുഎഇയുടെ വിവിധ പ്രദേശങ്ങളിൽ കാറ്റിനും മഴക്കും സാധ്യതയുണ്ടെന്നാണ് മുന്നറിയിപ്പ്. ഫുജൈറ മുതൽ അൽഐൻ വരെ കിഴക്കൻ തീരത്ത് ഓറഞ്ച്, യെല്ലോ അലർട്ടുകൾ തുടരുകയാണ്. മഴ ശക്തമായ പ്രദേശങ്ങളിൽ അപകടങ്ങൾ ഒഴിവാക്കാൻ അത്യാവശ്യങ്ങൾക്ക് മാത്രം വാഹനങ്ങൾ പുറത്തിറക്കിയാൽ മതിയെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.

റാസൽഖൈമ, ദുബൈ എമിറേറ്റിലെ ഹത്ത, അബൂദബിയിലെ അൽഐൻ എന്നിവിടങ്ങളിൽ രാത്രിയിലും കനത്ത മഴ തുടർന്നു. ഈ മേഖലയിലെ മലയോരങ്ങളിൽ ശക്തമായ മഴവെള്ളപാച്ചിലും അനുഭവപ്പെടുന്നതിനാൽ അത്യാവശ്യത്തിന് മാത്രം വാഹനങ്ങളിൽ പുറത്തിറങ്ങിയാൽ മതിയെന്ന് ദേശീയ കാലാവസ്ഥ നിരീക്ഷണ കേന്ദ്രം പുറപ്പെടുവിച്ച നിർദ്ദേശങ്ങളിൽ പറയുന്നു

അതേസമയം ചുട്ടുപൊളളിക്കുന്ന ചൂടിന് ആശ്വാസമായി സൗദിയിലും മഴയെത്താൻ സാധ്യത. തിങ്കള്‍ വരെ സൗദി അറേബ്യയുടെ വിവിധ പ്രവിശ്യകളില്‍ മഴയ്ക്ക് സാധ്യതയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. അസീര്‍, അല്‍ബാഹ, ജിസാന്‍, മക്ക എന്നിവിടങ്ങളില്‍ സാമന്യം ഭേദപ്പെട്ട മഴ ലഭിക്കും. റിയാദ്, കിഴക്കന്‍ പ്രവിശ്യ, തബൂക്ക്, നജ്‌റാന്‍, മദീന എന്നിവിടങ്ങളില്‍ നേരിയ തോതില്‍ മഴയുണ്ടാകുമെന്ന് പ്രതീക്ഷിക്കുന്നു. മഴയോടൊപ്പം പൊടിക്കാറ്റ്, ആലിപ്പഴ വര്‍ഷം എന്നിവയ്ക്കും സാധ്യതയുള്ളതായി കേന്ദ്രം മുന്നറിയിപ്പ് നൽകിയിട്ടുണ്ട്.