കുവൈറ്റ് അമീർ ശൈഖ് നവാഫ് അഹ്മദ് അൽ ജാബിർ അൽ സബ അന്തരിച്ചു. 86 വയസ്സായിരുന്നു. ഒരു മാസമായി ദേഹാസ്വാസ്ഥ്യത്തെ തുടർന്ന് ജാബിർ ആശുപത്രിയിൽ ചികിത്സയിലായിരുന്നു. കുവൈത്തിൻറെ പതിനാറാം അമീറായിരുന്നു ശൈഖ് നവാഫ് അഹ്മദ് അൽ ജാബിർ അൽ സബ. കുവൈത്ത് രാജകുടുംബത്തിലെ ഏറ്റവും മുതിർന്ന അംഗമാണ് ഷെയ്ഖ് നവാഫ്. 2020 സെപ്റ്റംബറിൽ ശൈഖ് സബ അഹ്മദ് അൽ ജാബർ അൽ സബ അന്തരിച്ചതിനു പിന്നാലെ കിരീടാവകാശിയായ ഷെയ്ഖ് നവാഫ് അൽ-അഹ്മദ് കുവൈത്ത് അമീറായി ചുമതലയേറ്റത്.

കുവൈത്തിലെ ശാന്തനായ ഭരണാധികാരിയായിട്ടാണ് ശൈഖ് നവാഫ് അറിയപ്പെടുന്നത്. ആരോഗ്യകാരണങ്ങളാല്‍ പലപ്പോഴും അദ്ദേഹത്തിന് കൂടുതല്‍ തിളങ്ങാന്‍ സാധിച്ചിട്ടില്ല. കഴിഞ്ഞമാസം ആരോഗ്യനില വഷളായതിനെ തുടര്‍ന്ന് അമീറിനെ ആശുപത്രിയില്‍ പ്രവശിപ്പിച്ചതായി വാർത്തകൾ വന്നിരുന്നു. എന്നാൽ പിന്നീട് ആരോഗ്യനില തൃപ്തികരമാണെന്ന് കുവൈത്ത് ഔദ്യോഗിക വാര്‍ത്ത ഏജന്‍സി റിപ്പോര്‍ട്ട് ചെയ്തു.

അടിയന്തര ആരോഗ്യ പ്രശ്‌നമാണെന്ന് സൂചിപ്പിച്ചെങ്കിലും എന്താണ് അസുഖമെന്ന് റിപ്പോര്‍ട്ടില്‍ പറഞ്ഞിരുന്നില്ല. 2020ല്‍ കുവൈത്ത് അമീര്‍ ആയി ചുമതലയേറ്റ ശേഷം പല തവണ ആരോഗ്യകാരണങ്ങളാല്‍ പൊതുരംഗത്ത് നിന്ന് വിട്ടു നിന്നിരുന്നു ശൈഖ് നവാഫ്. കിരീടവകാശിയാണ് രാജ്യത്തിന്റെ ദൈനംദിന ഭരണകാര്യങ്ങള്‍ നോക്കുന്നത്. നേരത്തെ ചികില്‍സയ്ക്ക് വേണ്ടി അദ്ദേഹം അമേരിക്കയില്‍ പോയിരുന്നു.

ശൈഖ് സബാഹ് അല്‍ അഹ്മദ് അല്‍ സബാഹിന്റെ മരണ ശേഷമാണ് ശൈഖ് നവാഫ് കുവൈത്ത് അമീര്‍ ആയി ചുമതലയേറ്റത്. 2021ല്‍ ശൈഖ് നവാഫ് എടുത്ത തീരുമാനം ആഗോളതലത്തില്‍ ചര്‍ച്ചയായിരുന്നു. വിമത സ്വരം ഉയര്‍ത്തിയ നേതാക്കള്‍ക്ക് പൊതുമാപ്പ് നല്‍കുകയും ജയില്‍ ശിക്ഷ കുറച്ചുകൊടുക്കുകയും ചെയ്തു അദ്ദേഹം. വിമതരെ ആശ്വസിപ്പിക്കുക എന്ന ലക്ഷ്യത്തോടെയായിരുന്നു ഈ നിക്കം.