പ്രവാസികളുടെ പ്രിയങ്കരനും ലുലുഗ്രൂപ്പ് എംഡിയും ചെയർമാനുമായ എം എ യൂസഫലി പ്രവാസലോകത്ത് അഞ്ച് പതിറ്റാണ്ട് പൂർത്തിയാക്കിയ സന്തോഷം പങ്കുവെച്ചിരുന്നു. ജീവിതത്തിനും പ്രവർത്തനങ്ങൾക്കുമുള്ള ആദരമായി അൻപത് കുട്ടികൾക്ക് സൗജന്യ ഹൃദയ ശസ്ത്രക്രിയ നൽകുമെന്ന് അദ്ദേഹത്തിന്റെ മരുമകനും ഹെൽത്ത് കെയർ ഗ്രൂപ്പായ ബുർജീൽ ഹോൾഡിങ്‌സിന്റെ ചെയർമാൻ ഡോ. ഷംസീർ വയലിൽ പ്രഖ്യാപിച്ചിരുന്നു. 'ഗോൾഡൻ ഹാർട്ട്' എന്ന പേരിലാണ് ഈ പദ്ധതി . ഇതുപ്രകാരം സൗജന്യ ഹൃദയ ശസ്ത്രക്രിയ്ക്ക് അപേക്ഷ ക്ഷണിച്ചിരിക്കുകയാണ് ബുർജീൽ ഹോൾഡിംഗ്‌സ്.

ജന്മനാ ഹൃദ്രോഗമുള്ള കുട്ടികളുടെ രക്ഷിതാക്കളിൽ നിന്നാണ് വിപിഎസ് ഹെൽത്ത് കെയർ അപേക്ഷ ക്ഷണിച്ചിരിക്കുന്നത്. hope@vpshealth.com എന്ന മെയിൽ വഴി അപേക്ഷകളും ആവശ്യമായ രേഖകളും സമർപ്പിക്കണമെന്ന് പ്രസ്താവനയിൽ പറയുന്നു. ആവശ്യമായ രേഖകളിൽ കുട്ടിയുടെ മെഡിക്കൽ റിപ്പോർട്ട് ഉൾപ്പെടുത്തണം. ഡോ. ഷംഷീറിൻ്റെ യുഎഇ, ഒമാൻ, ഇന്ത്യ എന്നിവിടങ്ങളിലെ ആശുപത്രികളിലാണ് ശസ്ത്രക്രിയ നടക്കുക. .കുട്ടികളിലെ ജന്മനാലുള്ള ഹൃദ്രോഗത്തിന് ശസ്ത്രക്രിയ നടത്താൻ ഭാരിച്ച ചിലവ് വരുന്നതിനാൽ സർജറി നടത്താൻ പ്രതിസന്ധി നേരിടുന്ന നിർധന കുടുംബങ്ങൾക്ക് കൈത്താങ്ങാണ് പദ്ധതി.

മനുഷ്യത്വപരമായ ഇടപെടലുകൾ കുടുംബത്തിൻ്റെ തന്നെ ഭാഗമാണെന്നും അതേ പാതയിലൂടെ യൂസഫലിയുടെ യുഎഇയിലെ അരനൂറ്റാണ്ട് അടയാളപ്പെടുത്താനാണ് ശ്രമമെന്നും ഡോ. ഷംഷീർ പറഞ്ഞിരുന്നു. എം എ യൂസഫലിയുടെ മൂത്ത മകളും വിപിഎസ് ഹെൽത്ത് കെയർ വൈസ് ചെയർപേഴ്‌സണുമായ ഡോ.ഷബീന യൂസഫലിയെയാണ് ഡോ.ഷംഷീർ വിവാഹം കഴിച്ചത്.

ഡോ. ഷംഷീറിന്റെ കുടുംബ ഓഫീസായ വിപിഎസ് ഹെൽത്ത്കെയർ നേതൃത്വത്തിലാണ് പദ്ധതി നടപ്പാക്കുന്നത്. യൂസഫലിയുടെ മരുമകനായ ഡോ. ഷംസീർ, റേഡിയോളജിസ്റ്റും യുഎഇയില്‍ ആരോഗ്യ സംരംഭകനുമാണ്. കൊച്ചിയിലുള്ള മള്‍ട്ടി സൂപ്പര്‍ സ്പെഷ്യാലിറ്റി ആശുപത്രിയായ ലേക്ക് ഷോർ ഹോസ്പിറ്റലിന്‍റെ ചെയര്‍മാനുമാണ്.