യുഎഇയിൽ നിന്ന് കാണാതായ പ്രവാസിയെ ഷാര്‍ജയിലെ മരുഭൂമിയില്‍ കൊന്ന് കുഴിച്ചു മൂടിയ നിലയില്‍ കണ്ടെത്തിയ സംഭവത്തിൽ കൂടുതൽ വിവരങ്ങൾ പുറത്തുവരികയാണ്. ജോലി സംബന്ധമായ മുന്‍ വൈരാഗ്യമാണ് കൊലയ്ക്ക് കാരണമെന്ന നിഗമനമാണ് പൊലീസിന്റേതെന്ന് ബന്ധുക്കൾ പറഞ്ഞു. കഴുത്ത് ഞെരിച്ച് കൊലപ്പെടുത്തിയ ശേഷം മരുഭൂമിയില്‍ കുഴിച്ചിടുകയായിരുന്നു. മൃതദേഹത്തിന്റെ മുഖം വികൃതമായിരുന്നു. അനിലിനെ കഴുത്തു ഞെരിച്ചാണ് കൊന്നതെന്നാണ് പോസ്റ്റ്മോർട്ടം റിപോർട്ടിൽ പറയുന്നത്. കൂടാതെ, നെഞ്ചിലും പരുക്കേറ്റിരുന്നു.

പ്രവാസിയെ കാണാനില്ലെന്ന പരാതിയെ തുടര്‍ന്ന് റാസല്‍ ഖോര്‍ പോലീസ് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. തിരുവനന്തപുരം കള്ളയം മുട്ടട സ്വദേശി അനില്‍ കുമാര്‍ വിന്‍സന്റിനെ കൊലപ്പെടുത്തിയ പ്രതിയായ പാക്കിസ്ഥാനി സ്വദേശിയെയും കൂട്ടുപ്രതികളായ മറ്റു രണ്ട് പേരേയും പൊലീസ് അറസ്റ്റ് ചെയ്തിരുന്നു. എന്നാൽ പ്രധാന പ്രതികളിലൊരാളും മൃതദേഹം മരുഭൂമിയിലെത്തിച്ച വാഹനത്തിന്റെ ഡ്രൈവറായ പാക്കിസ്ഥാനി സ്വന്തം രാജ്യത്തേയ്ക്ക് രക്ഷപ്പെട്ടുകളഞ്ഞു. അനിലിന്റെ സ്ഥാപനത്തിലെ ജീവനക്കാരാണ് പിടിയിലായ പാക് സ്വദേശികള്‍.

നേരത്തെ അനിലിനെ കാണാതായ വിവരം പുറത്തുവന്നപ്പോൾ അന്വേഷിക്കാൻ കേസിലെ പ്രതിയായ പാക്കിസ്ഥാനിയും ഉണ്ടായിരുന്നു. ഒടുവിൽ അന്വേഷണം തന്നിലേയ്ക്ക് നീളുമെന്നായപ്പോൾ ഇയാൾ ഒളിവിൽ പോയി. ഇവിടെ നിന്നാണ് ഇയാളെ അറസ്റ്റ് ചെയ്തത്. ദുബായിലെ ഒരു ടെക്സ്റ്റൈൽ കമ്പനിയിൽ കഴിഞ്ഞ 35 വർഷമായി പിആർഒ ആയി ജോലി ചെയ്തിരുന്ന അനിലിനെ ഈ മാസം 2നാണ് കാണാതായത്. അന്ന് റാസൽഖോറിലെ ഒരു കമ്പനിയിൽ ജോലി ആവശ്യാർഥം പോയതിൽ പിന്നെ ഇദ്ദേഹത്തെക്കുറിച്ച് ഒരു വിവരവുമില്ലായിരുന്നു. ഇതേ കമ്പനിയിൽ ജോലി ചെയ്യുന്ന അനിലിന്റെ സഹോദരൻ പ്രകാശ് വ്യാപകമായി അന്വേഷണം നടത്തിയെങ്കിലും കണ്ടെത്താനായില്ല.

ദിവസങ്ങൾ കഴിഞ്ഞിട്ടും അനിലിനെ കണ്ടെത്താനാകാത്തതിനെ തുടർന്ന് അദ്ദേഹത്തിന്റെ മകൻ നാട്ടിൽ നിന്ന് ദുബായിലെത്തി. സഹോദരനും മകനും ചേർന്ന് അടുത്തുള്ള പൊലീസ് സ്റ്റേഷനിൽ പരാതി നൽകിയതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് മൃതദേഹം കണ്ടെത്തിയത്. അതേസമയം അനിലിന്റെ മ‍ൃതദേഹം നാട്ടിലെത്തിച്ച് സംസ്കരിച്ചു. മുട്ടട ഹോളിക്രോസ് പള്ളി സെമിത്തേരിയില്‍ ആയിരുന്നു സംസ്കാര ചടങ്ങുകൾ. വിന്‍സന്റ്- റീത്ത ദമ്പതികളുടെ മകനാണ് അനില്‍കുമാര്‍, ബ്രിജില അനില്‍കുമാര്‍ ആണ് ഭാര്യ. ബിബിന്‍ അനില്‍ മകനാണ്.