അയോധ്യയിലെ പ്രാണപ്രഥതിഷ്ഠയുമായി ബന്ധപ്പെട്ട് ലോകത്തെ ഏറ്റവും ഉയരം കൂടിയ കെട്ടിടമായ ബുർജ് ഖലീഫയില്‍ വരെ ശ്രീരാമന്റെ ചിത്രം പതിഞ്ഞു എന്ന തരത്തിൽ വാർത്തയും ചിത്രവും കഴിഞ്ഞ ദിവസം സോഷ്യൽ മീഡിയയിൽ വ്യാപകമായി പ്രചരിക്കുകയുണ്ടായി. ഇത് സത്യമാണോ, അതോ വ്യാജമാണോ എന്നെല്ലാമായി പിന്നീടുള്ള ചോദ്യങ്ങൾ. എന്നാൽ ഈ പ്രചരിക്കുന്ന ചിത്രം വ്യാജമാണ്. ബുർജ് ഖലീഫയില്‍ അത്തരത്തിൽ ഒരു ചിത്രവും അധികൃതർ പ്രദർശിപ്പിച്ചിട്ടില്ല എന്നാണ് സത്യം.

അയോധ്യയിലെ പ്രാണപ്രഥതിഷ്ഠയുമായി ബന്ധപ്പെട്ട് ബുർജ് ഖലീഫയില്‍ രാമന്‍റെ ചിത്രം തെളിഞ്ഞുവെന്നായിരുന്നു ചിത്രം സമൂഹമാധ്യമ അക്കൗണ്ടുകളില്‍ പങ്കുവച്ച് പലരും കുറിച്ചത്. സമൂഹമാധ്യമങ്ങളിലെ ഇടപെടലുകളില്‍ ശക്തമായ നിയമമുളള രാജ്യമാണ് യുഎഇ. നിയമം ലംഘിച്ചാല്‍ പിഴയടക്കമുളള ശിക്ഷാനടപടികള്‍ നേരിടേണ്ടി വരും. വ്യക്തികളുടെ സ്വകാര്യത മാനിക്കുക, തെറ്റായ വിവരങ്ങൾ പങ്കുവെക്കാതെ ഇരിക്കുക, മറ്റുളളവരുടെ വിശ്വാസത്തെയും മതത്തെയും ബഹുമാനിക്കുക എന്നിവയെല്ലാം കൃത്യമായി പാലിക്കണം എന്ന് നിയമമുള്ള രാജ്യമാണ് യുഎഇ.

കുറ്റം ചെയ്ത പ്രതികളുടെ മുഖം പോലും വ്യക്തികളുടെ സ്വകാര്യത കാത്തുസൂക്ഷിക്കുന്നതിന്റെ ഭാഗമായി യുഎഇ പുറത്തുവിടാറില്ല. രാജ്യത്തെ മോശമാക്കുന്ന രീതിയിൽ ചിത്രങ്ങളോ, അഭിപ്രായപ്രകടനങ്ങളോ, ഭരണാധികാരികളെ പരസ്യമായി വെല്ലുവിളിക്കുകയോ നടത്തിയാൽ സെെബർ കുറ്റകൃത്യങ്ങളിൽ ഉൾപ്പെടും. ആർട്ടിക്കിൾ 20 മുതല്‍ 28 വരെയുളള നിയമങ്ങള്‍ അനുസരിച്ച് ഇത്തരം കുറ്റങ്ങൾ ചെയ്യുന്നവർക്ക് ശിക്ഷ ലഭിക്കും. 5 വർഷം വരെ തടവും 500,000 ദിർഹം വരെയുള്ള ശിക്ഷയായിരിക്കും ലഭിക്കുന്നത്.