ദുബായിയിലെ നിർമാണ മേഖലയിൽ ജോലി ചെയ്യുന്ന സാധാരണ തൊഴിലാളികള്‍ക്ക് അവിസ്മരണീയമായ അനുഭവമാണ് തൊഴിലാളി ദിനം ആഘോഷിക്കുന്നതിന്‍റെ ഭാഗമായി ഒരു മലയാളി കമ്പനി ഒരുക്കിയത്. വേൾഡ് സ്റ്റാർ ഹോൾഡിങ് കമ്പനി തങ്ങളുടെ തൊഴിലാളികൾക്ക് ഒരു ദിവസത്തേക്ക് രാജകീയമായ ഒരു ജീവിതം നൽകാൻ തീരുമാനിക്കുകയായിരുന്നു.

കഴിഞ്ഞ വർഷം മികച്ച പ്രകടനം കാഴ്ചവച്ച 16 തൊഴിലാളികൾക്കായിരുന്നു ഈ അപൂർവ്വാവസരം. തൊഴിലാളി ദിനത്തിൽ, മികച്ച പ്രകടനം കാഴ്ചവച്ച ഈ 16 തൊഴിലാളികളെയും 'ഗോൾഡൻ അച്ചീവ്‌മെന്‍റ്' അവാർഡ് നൽകി ആദരിച്ചു. പുതിയ വസ്ത്രങ്ങളും അവർക്ക് സമ്മാനമായി നൽകി. തുടർന്ന്, കോട്ടും സ്യൂട്ടും ധരിച്ച്, ഫെറാറി, ലംബോർഗിനി, ബെന്‍റ്ലി, ഫോർഡ് മസ്താങ്, കാർഡിലാക് തുടങ്ങിയ ആഡംബര കാറുകളിൽ ദുബായ് നഗരത്തിലൂടെ സഞ്ചാരം.

വൈകുന്നേരം, ദുബായ് ഹാർബറിൽ പ്രത്യേകമായി ഒരുക്കിയ സ്വകാര്യ ആഡംബര നൗകയിൽ കേക്ക് മുറിച്ച് തൊഴിലാളി ദിനാഘോഷം നടന്നു. തുടർന്ന്, തുടർന്ന് ഈ തൊഴിലാളികൾ കെട്ടിപ്പടുത്ത ദുബായിലെ പടുകൂറ്റൻ കെട്ടിടങ്ങളുടെ പശ്ചാത്തലത്തിൽ മനോഹരമായ കാഴ്ചകൾ ആസ്വദിച്ച് ആഡംബര നൗകയിൽ ഡിജെ പാർട്ടിയിൽ പങ്കെടുത്തു. അന്നേ ദിവസം ദുബായിയിലെ ഒരു ഫൈവ് സ്റ്റാർ ഹോട്ടലിൽ താമസിക്കാൻ അവസരവും ഇവർക്കായി കമ്പനി ക്രമീകരിച്ചിരുന്നു.

ഒരു ദിവസത്തെ കോടീശ്വരൻ' എന്ന ആശയത്തോടെ ഒരുക്കിയ ഈ പരിപാടി തൊഴിലാളികൾക്ക് ജീവിതത്തിൽ മികച്ച പ്രചോദനമാണ് നൽകിയത് എന്ന് കമ്പനി മാനേജിങ് ഡയറക്ടർ ഹസീന നിഷാദ് പറഞ്ഞു. മികച്ച തൊഴിലാളികൾക്കുള്ള അവാർഡ് വിതരണം ചെയ്തതും ഹസീനയാണ്. കഴിഞ്ഞ രണ്ടു തൊഴിലാളി ദിനത്തിലും ഇതുപോലുള്ള വ്യത്യസ്തമായ സമ്മാനങ്ങൾ തൊഴിലാളികൾക്ക് നൽകിയിരുന്നു. അത്കൊണ്ട് തന്നെ, ഇത്തവണ അവാർഡ് നേടിയെടുക്കാൻ ഓരോരുത്തരും ജോലിയിൽ മികച്ച പ്രകടനമാണ് കാഴ്ചവച്ചത്. അത് കമ്പനിയുടെ വളർച്ചയ്ക്ക് ഒരുപാട് സഹായകമായി.

നമ്മൾ തൊഴിലാളികളെ എത്രമാത്രം സന്തോഷിപ്പിക്കുന്നുണ്ടോ, അതിന്‍റെ ഇരട്ടി ഉത്പാദനക്ഷമത അവരിൽ നിന്നും ലഭിക്കും. ഈ വർഷം മുതൽ കമ്പനിയിൽ ജോലി ചെയ്യുന്ന നിർമാണ തൊഴിലാളികളുടെ മക്കളുടെ വിദ്യാഭ്യാസത്തിന്‍റെ കാര്യത്തിലും സഹായം ഉണ്ടാകുമെന്ന് കമ്പനി ചെയർമാൻ നിഷാദ് ഹുസൈൻ പറഞ്ഞു. തങ്ങളുടെ ബ്ലൂകോളർ തൊഴിലാളികളുടെ മക്കളെല്ലാവരും ഭാവിയിൽ വൈറ്റ് കോളർ തൊഴിലാളികളായി മാറണെമെന്നാണ് ആഗ്രഹം എന്ന് നിഷാദ് പറഞ്ഞു. ഷാർജ ആസ്ഥാനമായുള്ള കമ്പനിയാണ് കമ്പനിയാണ് വേൾഡ് സ്റ്റാർ ഹോൾഡിങ്

മുമ്പും തൊഴിലാളി ദിനത്തിൽ വേറിട്ട ശൈലി മുന്നോട്ട് വച്ച് വേൾഡ് സ്റ്റാർ ഹോൾഡിങ് ഞെട്ടിച്ചിട്ടുണ്ട്. മെയ് ദിനത്തിൽ തൊഴിലാളികൾക്ക് വിദേശ ഉല്ലാസയാത്രയ്ക്ക് അവസരം ഒരുക്കിയായിരുന്നു 2023ൽ മേയ് ദിനാഘോഷം വേറിട്ടതാക്കിയത്. പത്ത് തൊഴിലാളികൾക്ക് ജോർജിയയിൽ നാല് ദിവസം അവധി ആഘോഷിക്കാൻ അവസരം നൽകുകയായിരുന്നു.

വേനൽചൂടിൽ ഉരുകുന്ന യുഎഇയിലെ തൊഴിലിടത്തിൽ നിന്നാണ് മഞ്ഞ് മൂടികിടക്കുന്ന ജോർജിയയിലേക്ക് അന്ന് അവർ ഉല്ലാസ യാത്ര പോയത്. നാല് ദിവസം ജോർജിയയിൽ തൊഴിലാളികൾ അടിച്ചു പൊളിച്ചു. മഞ്ഞ് മൂടിയ ഗുഡൗരി മലയിലും പച്ചപ്പ് നിറഞ് സാൽക താഴ്‌വരയിൽ അവർ എല്ലാം മറന്ന് ഉല്ലസിച്ചു. ജോർജിയൻ തലസ്ഥാനമായ തിബിലിസിയിലായിരുന്നു തൊഴിലാളികളുടെ തൊഴിലാളി ദിനാഘോഷം.

കണ്‍സ്ട്രക്ഷന്‍ സൈറ്റുകളിലേക്കും തിരിച്ചുമുള്ള യാത്രക്കിടയില്‍ ലഭിക്കുന്ന സമയം ബസ്സിലിരുന്ന് കുടുംബങ്ങളുമായി വീഡിയോകോളിലൂടെ ബന്ധപ്പെടുവാനും, ടെലിവിഷന്‍ സ്‌ക്രീനുകളില്‍ പ്രദര്‍ശിപ്പിക്കുന്ന മ്യൂസിക് വീഡിയോകള്‍ ആസ്വദിച്ച് മനസ്സിനെ ശാന്തമാക്കുന്നതിലൂടെ ഏറ്റവും മികച്ച തൊഴിലാളികളാക്കി അവരെ മാറ്റിയെടുക്കാനും കഴിയുമെന്ന് വേള്‍ഡ് സ്റ്റാര്‍ ഹോള്‍ഡിങ് മാനേജിങ് ഡയറക്ക്റ്റര്‍ ഹസീന നിഷാദ് 2022ൽ നടത്തിയ പ്രതികരണം ഏറെ വൈറലായിരുന്നു. ലോകത്തിലാദ്യമായി തൊഴിലാളികള്‍ ജോലി ആവശ്യത്തിന് യാത്ര ചെയ്യുന്ന ബസുകളില്‍ സൗജന്യ വൈഫൈയും(free wifi), ടെലിവിഷന്‍ സ്‌ക്രീനുകളും സ്ഥാപിച്ച് വേള്‍ഡ് സ്റ്റാര്‍ ഹോള്‍ഡിങ് ഈ പദ്ധതിക്ക് തുടക്കം കുറിക്കുകയായിരുന്നു.