സമൂഹമാധ്യമമായ ഇന്‍സ്റ്റഗ്രാമിലൂടെ വിവാഹമോചനം പ്രഖ്യാപിച്ച് ദുബായ് രാജകുമാരി ഷെയ്ഖ മഹ്റ ബിന്ദ് മുഹമ്മദ് ബിന്‍ റാഷിദ് അൽ മക്തൂം. ദുബായ് ഭരണാധികാരിയും യു.എ.ഇ പ്രധാന മന്ത്രിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ മകളാണ് മഹ്റ. ഇന്‍സ്റ്റഗ്രാമില്‍ ഒരു കുറിപ്പ് പങ്കുവച്ചുകൊണ്ടാണ് മെഹ്റ മുത്തലാഖ് ചൊല്ലുന്നതായി പ്രഖ്യാപിച്ചത്.

ദുബായി രാ‍‍‍ജകുമാരി ഷെയ്ഖ മഹ്റ പങ്കുവച്ച കുറിപ്പ്:

'പ്രിയപ്പെട്ട ഭർത്താവേ, നിങ്ങൾ മറ്റ് കൂട്ടാളികളുമായി തിരക്കിലായതിനാൽ, നമ്മുടെ വിവാഹമോചനം ഞാൻ ഇതിനാൽ പ്രഖ്യാപിക്കുന്നു. ഞാൻ നിങ്ങളെ വിവാഹമോചനം ചെയ്യുന്നു, ഞാൻ നിങ്ങളെ വിവാഹമോചനം ചെയ്യുന്നു, ഞാൻ നിങ്ങളെ വിവാഹമോചനം ചെയ്യുന്നു. നല്ലത് വരട്ടെ. എന്ന് മുന്‍ ഭാര്യ' എന്നാണ് ഷെയ്ഖ മഹ്റ ഇന്‍സ്റ്റഗ്രാമില്‍ കുറിച്ചത്. മുത്തലാഖ് ചൊല്ലുന്നതിന് സമാനമായാണ് ഷെയ്ഖ മെഹ്റ ഇത്തരമൊരു കുറിപ്പ് പങ്കുവച്ചത്. പോസ്റ്റ് നിമിഷങ്ങള്‍ക്കകം തന്നെ വൈറലായി.

അതേസമയം ആദ്യത്തെ കുഞ്ഞ് ജനിച്ച് രണ്ടുമാസങ്ങള്‍ക്കുളളിലാണ് ദുബായ് രാജകുമാരിയുടെ വിവാഹമോചന പ്രഖ്യാപനം. ആഴ്ച്ചകള്‍ക്ക് മുന്‍പേ കുഞ്ഞുമൊത്തുളള ചിത്രം ഞങ്ങള്‍ രണ്ടുപേരും മാത്രം എന്ന അടിക്കുറിപ്പോടെ ഷെയ്ഖ മഹ്റ പങ്കുവച്ചിരുന്നു. അന്ന് മുതല്‍ക്കേ വിവാഹമോചന അഭ്യൂഹങ്ങള്‍ സമൂഹമാധ്യമങ്ങളില്‍ ഉയര്‍ന്നുതുടങ്ങിയിരുന്നു. എന്നാല്‍ കഴിഞ്ഞ ദിവസമാണ് ഇത് സംബന്ധിച്ച സ്ഥിരീകരണം ഷെയ്ഖ മഹ്റയുടെ ഭാഗത്ത് നിന്നും ഉണ്ടായത്. വിവാഹമോചന പ്രഖ്യാപനത്തിന് പിന്നാലെ ഷെയ്ഖ മഹ്റയ്ക്ക് പിന്തുണ അറിയിച്ച് നിരവധി പേരാണ് എത്തുന്നത്. നല്ല തീരുമാനമാണെന്നും മുത്തലാഖ് ചൊല്ലാന്‍ കാണിച്ച ധൈര്യത്തിന് ബിഗ് സല്യൂട്ട് എന്നുമാണ് സോഷ്യല്‍ ലോകത്തിന്‍റെ കമന്‍റുകള്‍. അതേസമയം ദുബായ് രാജകുമാരിയുടെ തീരുമാനത്തെ വിമര്‍ശിച്ചും ആളുകളെത്തി.

ഷെയ്ഖ് മന ബിൻ മുഹമ്മദ് ബിൻ റാഷിദ് ബിൻ മന അൽ മക്തൂമാണ് ഷെയ്ഖ മഹ്റയുടെ ഭര്‍ത്താവ്. ഈ വിഷയത്തില്‍ ഷെയ്ഖ് മന ബിൻ മുഹമ്മദ് ഇതുവരെ പ്രതികരണമറിച്ചിട്ടില്ല.