സൗദി അറേബ്യയിലെ തനിമ കലാസാംസ്‌കാരിക വേദി മുന്‍ ഭാരവാഹി മലപ്പുറം സ്വദേശി നിര്യാതയായി. മലപ്പുറം മേല്‍മുറി ആലത്തൂര്‍ പടി സ്വദേശി അസ്ഹര്‍ പുള്ളിയിലിന്റെ ഭാര്യ ഒതുക്കങ്ങല്‍ സ്വദേശിനി സാബിറ കുരുണിയന്‍ (58) ആണ് റിയാദിലെ ആശുപത്രിയില്‍ മരിച്ചത്.

ദീര്‍ഘകാലം ഭര്‍ത്താവിനോടൊപ്പം റിയാദില്‍ കഴിഞ്ഞ സാബിറ പ്രവാസം അവസാനിപ്പിച്ച് മടങ്ങിയശേഷം സൗദിയിലുള്ള മക്കളുടെ അടുത്തേക്ക് സന്ദര്‍ശന വിസയിലെത്തിയതായിരുന്നു.

രണ്ടാഴ്ച മുമ്പ് റിയാദിലുള്ള മകളുടെ അടുത്തെത്തി നാല് ദിവസത്തിന് ശേഷം പക്ഷാഘാത ബാധിതയായി റിയാദ് കെയര്‍ ആശുപത്രിയില്‍ വെന്റിലേറ്ററില്‍ കഴിയവേയാണ് വ്യാഴാഴ്ച രാത്രി 10.30നാണ് അന്ത്യം സംഭവിച്ചത്.

അസുഖ വിവരമറിഞ്ഞ് അന്ന് തന്നെ നാട്ടില്‍നിന്ന് അസ്ഹര്‍ പുള്ളിയില്‍ റിയാദിലെത്തിയിരുന്നു. റിയാദ് കെയര്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം നാട്ടിലെത്തിക്കും.