ദുബായിൽ രണ്ട് ടോൾ ​ഗേറ്റുകൾ ഈമാസം അവസാനത്തോടെ പ്രവർത്തനം തുടങ്ങും. അൽഖെയ്ൽ റോഡിൽ ബിസിനസ് ബേ ക്രോസ്സിം​ഗിലും ശൈഖ് സായിദ് റോഡിൽ അൽ സഫ സൗത്തിലുമാണ് പുതിയ സാലിക് ​ഗേറ്റുകൾ സ്ഥാപിച്ചത്. ഈമാസം 24 മുതൽ ഇവ പ്രവർത്തിച്ച് തുടങ്ങും. ഇതോടെ ദുബായ് ന​ഗരത്തിലൂടെ വാഹനമോടിക്കാൻ ഇനി ചെലവേറും.

അൽസഫ സൗത്ത്, നോർത്ത് എന്നീ സാലിക് ​ഗേറ്റുകൾ ഒരുമിച്ചാണ് പരി​ഗണിക്കുക.. ഒരു സാലിക്ക് ​ഗേറ്റിൽ പണം പിടിച്ചാൽ അടുത്ത ​ഗേറ്റിൽ പണം ഈടാക്കില്ല.അൽ ഇത്തിഹാദ് റോഡ്, മം​സാൽ ടോൾ ​ഗേറ്റ് എന്നിവയിലൂടെ കടന്നുപോകുമ്പോഴും ഏതെങ്കിലും ഒന്നിൽ മാത്രമാണ് പണം ഈടാക്കുക. സാലിക് ​ഗേറ്റിലൂടെ ഒരു തവണ വാഹനം കടന്നു പോകുമ്പോൾ നാലു ദിർഹമാണ് ഈടാക്കുന്നത്.

പുതിയ സാലിക് ​ഗേറ്റുകൾ പ്രവർത്തനം തുടങ്ങുന്നതോടെ അൽഖെയിൽ റോഡിലേക്ക് ഖിസൈസ് ഭാ​ഗത്ത് നിന്നും പോകുമ്പോൾ എയർപോർട്ട് ടണൽ, ബിസിനസ് ബേ ക്രോസ്സിം​ഗ് എന്നിങ്ങനെ രണ്ട് ടോളുകൾ ഉണ്ടാകും. അൽ ഖെയ്ൽ റോഡ്, ശൈഖ് സായിദ് റോഡ് എന്നിവിടങ്ങളിലെ വാഹനത്തിരക്ക് കുറയ്ക്കാൻ പുതിയ സാലിക്കുകൾ സഹായിക്കുമെന്നാണ് നടത്തിപ്പുകാരായ സാലിക് കമ്പനിയുടെ വിലയിരുത്തൽ.

കഴിഞ്ഞ വർഷം ദുബായിലെ എല്ലാ സാലിക് ​ഗേറ്റുകളിലും കൂടി 59 കോടി മുപ്പത് ലക്ഷത്തോളം തവണ വാഹനങ്ങൾ കടന്നു പോയെന്നാണ് കണക്ക്.. ഇക്കൊല്ലം ജൂൺ വരെയുള്ള കണക്കനുസരിച്ച് 23 കോടി 85 ലക്ഷം തവണ വാഹനങ്ങൾ കടന്നു പോയിട്ടുണ്ട്.