അധ്യാപകര്ക്ക് സന്തോഷവാർത്ത, സ്വകാര്യ സ്കൂളുകളിലെ അധ്യാപകര്ക്കായി ഗോള്ഡന് വിസ പദ്ധതി പ്രഖ്യാപിച്ച് റാസല്ഖൈമ
യുഎഇയിലെ റാസല്ഖൈമ എമിറേറ്റ് സ്വകാര്യ സ്കൂളുകളിലെ അധ്യാപകര്ക്കായി ഗോള്ഡന് വിസ പദ്ധതി പ്രഖ്യാപിച്ചു. രണ്ട് കാറ്റഗറിയിൽ ഉള്ളവര്ക്കാണ് ഗോള്ഡന് വിസ പ്രഖ്യാപിച്ചിരിക്കുന്നത്. ഒന്ന് സ്കൂളുകളിലെ പ്രധാനാധ്യാപകര്, വൈസ് പ്രിന്സിപ്പല്, സ്കൂള് ഡയറക്ടര്മാര് എന്നിവരടങ്ങുന്ന നേതൃ നിരയ്ക്കും രണ്ട് സ്കൂള് അധ്യാപകര്ക്കും. സ്പോണ്സറുടെ ആവശ്യം ഇല്ലാതെ ദീര്ഘകാല റെസിഡന്സി ലഭ്യമാക്കുന്നതാണ് പദ്ധതിയെന്ന് റാസല്ഖൈമ ഡിപ്പാര്ട്ട്മെന്റ് ഓഫ് നോളജ് അറിയിച്ചു. നിശ്ചിത മാനദണ്ഡങ്ങള് പ്രകാരം ഗോള്ഡന് വിസക്ക് അപേക്ഷിക്കാമെന്ന് റാക് ഡി.ഒ.കെ ബോര്ഡ് അംഗം ഡോ. അബ്ദുല്റഹ്മാന് നഖ്ബി പറഞ്ഞു.
വിദ്യാലയങ്ങളില് ഉയര്ന്ന പദവികള് അലങ്കരിക്കുന്നവരെയും മികച്ച സേവനം ചെയ്യുന്നവരെയും രാജ്യത്ത് നിലനിര്ത്താനും വിദ്യാഭ്യാസ മേഖലയില് നേതൃതലത്തില് പ്രവര്ത്തിക്കുന്ന ലോക പ്രതിഭകളെ യുഎഇയിലേക്ക് ആകര്ഷിക്കാനും ലക്ഷ്യമിട്ടാണ് ഗോള്ഡന് വിസ പ്രഖ്യാപനം.
വിദ്യാഭ്യാസ വകുപ്പായ റാക്ക് ഡിഒകെയിലാണ് അധ്യാപകര് അപേക്ഷ സമര്പ്പിക്കേണ്ടത്. യോഗ്യത പരിശോധിച്ച ശേഷം വകുപ്പ് ഐസിപിയിലേക്ക് കത്ത് നല്കും. പ്രത്യേക മാനദണ്ഡങ്ങളാണ് ഇതിനായി നിര്ദേശിച്ചിരിക്കുന്നത്. വിദ്യാലയത്തിന്റെ പ്രകടന നിലവാരം ഉയര്ത്തുന്നതില് സംഭവാനകള് നല്കുന്നവരും റാസല്ഖൈമയില് മൂന്നുവര്ഷമായി ജോലി ചെയ്യുന്നവരുമായ അധ്യാപകര്ക്ക് ഗോള്ഡന് വിസയ്ക്കായി അപേക്ഷിക്കാം.
https://www.facebook.com/Malayalivartha
