സൗദിയിൽ സുരക്ഷാ ഏജന്സികളുടെ നേതൃത്വത്തില് റെയ്ഡ്, നിയമലംഘകരായ 19,000ത്തിലേറെ പ്രവാസികള് അറസ്റ്റിൽ, നേരത്തേ അറസ്റ്റിലായി കരുതല് തടങ്കലില് കഴിഞ്ഞ 10,537 പേരെ നാടുകടത്തി...!!!
സൗദിയുടെ ഒരാഴ്ചയ്ക്കിടയില് നടത്തിയ പരിശോധനയിൽ നിയമലംഘകരായ 19,024 പ്രവാസികള് അറസ്റ്റിലായതായി ആഭ്യന്തര മന്ത്രാലയം അറിയിച്ചു. വിവിധ ഭാഗങ്ങളില് സുരക്ഷാ ഏജന്സികളുടെ നേതൃത്വത്തില് നടത്തിയ പരിശോധനകളില് വിസ, തൊഴില്, അതിര്ത്തി രക്ഷാ നിയമങ്ങള് ലംഘിച്ചതിനാണ് ഇത്രയേറെ പേര് പിടിയിലായത്.
ആഭ്യന്തര മന്ത്രാലയത്തിന്റെ നേതൃത്വത്തില് വിവിധ സുരക്ഷാ ഏജന്സികളുടെ സഹകരണത്തോടെ നവംബര് 21നും 27നും ഇടയിലുള്ള ദിവസങ്ങളില് വ്യാപാര സ്ഥാപനങ്ങളിലും തൊഴിലിടങ്ങളിലും വാഹനങ്ങളിലും പ്രവാസികളുടെ താമസ കേന്ദ്രങ്ങളിലും മറ്റും നടത്തിയ പരിശോനകളിലാണ് ഇത്രയേറെ പേര് പിടിയിലായത്. അറസ്റ്റിലായവരില് 11,268 പേര് രാജ്യത്തെ താമസ നിയമങ്ങള് ലംഘിച്ച് രാജ്യത്ത് കഴിയുന്നവരാണെന്ന് അധികൃതര് അറിയിച്ചു.
4,773 പേര് അതിര്ത്തി സുരക്ഷാ നിയമങ്ങള് ലംഘിച്ചതിനും 2,983 പേര് തൊഴില് നിയമങ്ങള് ലംഘിച്ചതിനും പിടിക്കപ്പെട്ടു. അതിര്ത്തി നിയമങ്ങള് ലംഘിച്ച് രാജ്യത്തേക്ക് അനധികൃതമായി പ്രവേശിക്കാന് ശ്രമിച്ചതിന് 1,212 പേരെയാണ് സുരക്ഷാ അധികൃതര് പിടികൂടിയത്. നേരത്തേ അറസ്റ്റിലായി കരുതല് തടങ്കലില് കഴിയുന്ന 10,537 പ്രവാസികളെ കഴിഞ്ഞ ഒരാഴ്ചയ്ക്കിടയില് സൗദിയില് നിന്ന് നാടുകടത്തിയതായും അധികൃതര് അറിയിച്ചു. പിടിയിലായവരിലും നാടുകടത്തപ്പെട്ടവരിലും ഇന്ത്യക്കാരായ പ്രവാസികളും ഉള്പ്പെടും.
നിയമലംഘകരെ സഹായിക്കുകയോ രാജ്യത്തേക്ക് പ്രവേശിക്കാന് സൗകര്യം നല്കുകയോ യാത്ര ചെയ്യാന് വാഹനം നല്കുകയോ താമസത്തിന് സൗകര്യം ഒരുക്കി നല്കുകയോ ജോലി നല്കുകയോ ചെയ്യുന്ന വ്യക്തികള്ക്കെതിരേ ശക്തമായ നടപടി സ്വീകരിക്കുമെന്നും ആഭ്യന്തര മന്ത്രാലയം മുന്നറിയിപ്പ് നല്കി.
https://www.facebook.com/Malayalivartha
