സൗദിയിൽ ബന്ധുക്കളെ സന്ദർശിക്കാൻ പോയ സ്വദേശി കുടുംബത്തിന്റെ കാർ അപകടത്തിൽപ്പെട്ട് ഏഴു പേർ മരിച്ചു. സൗദി പൗരന്‍ അലി ബിന്‍ മുഹമ്മദ് ബിന്‍ അവാക് ഹദാദി, ഭാര്യ ഐശ് ബിന്‍ത് അഹ്മദ് ബിന്‍ അലി ഹദാഹി, ഇവരുടെ മക്കളായ മുഹമ്മദ്, ഹുസാം, ജൂരി, ജൈദാ, ജിയാന്‍ എന്നിവരാണ് മരണപ്പെട്ടത്. അല്‍ഹസയിലെ ഖുറൈസ് റോഡിൽവെച്ചാണ് സൗദി ദമ്പതികളുടേയും ഇവരുടെ അഞ്ച് മക്കളുടേയും ജീവൻ നഷ്ടപ്പെടാൻ കാരണമായ വാഹനാപകടം ഉണ്ടായത്.

ബന്ധുക്കളെ കാണാൻ ജിസാനിൽ നിന്ന് റിയാദിലേക്ക് പോകവേ ട്രക്ക് നിയന്ത്രണം വിട്ട് കാറില്‍ കൂട്ടിയിടിക്കുകയായിരുന്നെന്ന് അലിയുടെ സഹോദരന്‍ യഹ്‌യ ഹദാദി പറഞ്ഞു. അപകടത്തിൽ കാര്‍ നിശ്ശേഷം തകര്‍ന്നു. ബന്ധപ്പെട്ട വകുപ്പുകള്‍ മേല്‍നടപടികള്‍ സ്വീകരിച്ച് മൃതദേഹങ്ങള്‍ ഉറൈറ പ്രിന്‍സ് സുല്‍ത്താന്‍ ആശുപത്രി മോര്‍ച്ചറിയിലേക്ക് മാറ്റി.