യാത്രക്കാർക്ക് ഇനി ഹാൻഡ് ബാഗേജിൽ അധിക സാധനങ്ങൾ കൂടി ഉൾപ്പെടുത്താനാകും വിധം ബാഗേജ് അലവൻസ് കൂട്ടി ബജറ്റ് എയർലൈൻ നിങ്ങൾ യാത്ര ചെയ്യുന്നത് എയർ അറേബ്യയിൽ ആണെങ്കിൽ കയ്യിൽ കരുതാവുന്നവയിൽ രണ്ട് ബാഗുകളിലായി 10 കിലോ കൊണ്ടുപോകാം. 10 കിലോയിൽ ഹാൻഡ് ബാഗിന് പുറമേ ഒരു പേഴ്സണൽ ബാഗ് കൂടി അനുവദിക്കും. ബാക്ക് പാക്ക്,ബ്യൂട്ടി ഫ്രീ ബാഗ്, ചെറിയ ബാഗ് എന്നിവയാണിത്. രണ്ട് ബാഗുകളും 10 കിലോയിൽ കൂടരുത്. ഇതിന് പുറമേ കുട്ടികൾ കൂടെയുണ്ടെങ്കിൽ മൂന്നു കിലോ കൂടി അധികം അനുവദിക്കും.

ഹാൻഡ് ബാഗിൻ്റെ ഭാരപരിധി മറ്റ് വിമാനക്കമ്പനികളിൽ ഏഴ് കിലോയാണ്. ആ സ്ഥാനത്താണ് എയർ അറേബ്യ ബാഗേജ് അലവൻസ് 10 കിലോയാക്കി ഉയര്‍ത്തിയിരിക്കുന്നത്. യുഎഇയിലെ മറ്റ് വിമാന കമ്പനികളായ എമിറേറ്റ്സ്, ഫ്ലൈ ദുബൈ, ഇത്തിഹാദ് എന്നിവയില്‍ ഹാന്‍ഡ് ബാഗേജ് പരിധി 7 കിലോയാണ്. അതിനാൽ പ്രവാസികൾക്ക് വലിയ ആശ്വാസമാണ് എയർ അറേബ്യയുടെ ഈ തീരുമാനം. നേരത്തേ ഹാൻഡ് ബാഗിന് പുറമെ അധിക ബാഗ് കയ്യിൽ വെക്കുന്നത് പല വിമാന കമ്പനികളും നിയന്ത്രിച്ചിരുന്നു.

ഹാന്‍ഡിലുകള്‍, പോക്കറ്റുകള്‍, ചക്രങ്ങള്‍ എന്നിവയടക്കം 55സെ.മി x 40സെ.മി x 20സെ.മി എന്നതാണ് കാരി-ഓൺ ബാഗിന്‍റെ പരമാവധി വലിപ്പം. വ്യക്തിഗത സാധനങ്ങളടങ്ങുന്ന രണ്ടാമത്തെ ബാഗിന്‍റെ വലിപ്പം 25സെ.മി x 33സെ.മി x 20സെ.മി ആകണം. യാത്രക്കാരുടെ സീറ്റിന് മുമ്പിൽ വെക്കാവുന്ന രീതിയിലുള്ള ബാഗ് ആകണം.

ഇത് കൂടാതെ ബഹ്‌റൈന്‍റെ ഔദ്യോഗിക വിമാനക്കമ്പനിയായ ഗൾഫ് എയർ യാത്രക്കാർക്ക് കൊണ്ടുപോകാവുന്ന ലഗേജിന്‍റെ അളവിൽ മാറ്റം വരുത്തിയിരുന്നു. ഇക്കണോമി ക്ലാസിൽ നിലവിൽ 23കിലോ ബാഗേജും 23 കിലോ ഹാൻഡ് ലഗ്ഗേജുമാണ് നേരത്തെ അനുവദിച്ചിരുന്നതെങ്കിൽ ഇപ്പോൾ ഇക്കണോമി ക്ലാസിൽ ഒരാൾക്ക് 46 കിലോ അനുവദിക്കുകയില്ല. ഇക്കണോമി ക്ലാസിൽ തന്നെ മൂന്ന് വിഭാഗങ്ങളായാണ് യാത്രക്കാരുടെ ബാഗേജുകളുടെ തൂക്കം അനുവദിച്ചിട്ടുള്ളത് .

ഇതിൽ ഇക്കോണമി ലൈറ്റ്: 25 കിലോഗ്രാം,ഇക്കോണമി സ്മാർട്ട്: 30 കിലോഗ്രാം ഇക്കോണമി ഫ്ലെക്സ്: 35 കിലോഗ്രാം എന്നിങ്ങനെയാണ് അനുവദിച്ചിട്ടുള്ള തൂക്കം. ബിസിനസ് ക്ലാസുകളിൽ ബിസിനസ് സ്മാർട്ടിൽ 40 കിലോഗ്രാമും ബിസിനസ് ഫ്ലെക്സിൽ 50 കിലോഗ്രാം ബാഗേജുമാണ് അനുവദിക്കുക. വെയ്റ്റ് അലവൻസിനുള്ളിൽ പരമാവധി 5 ബാഗുകൾ യാത്രക്കാർക്ക് കൊണ്ട് പോകാം.ഓരോ ബാഗുകളും മൊത്തം അളവിൽ 158 സെന്റിമീറ്ററിൽ കവിയാൻ പാടില്ല. കുട്ടികൾക്ക് 10 കിലോയും സ്ട്രോളറും കാർ സീറ്റും അനുവദിച്ചിട്ടുണ്ട്.50 ഇഞ്ച് വരെയുള്ള ടിവികൾ ശരിയായി പായ്ക്ക് ചെയ്താൽ സ്വീകരിക്കും. വലിയ ടിവികൾ ചരക്കുകളായി അയയ്ക്കും .ഒരു ലഗേജും 32 കിലോയിൽ കൂടാൻ പാടുള്ളതല്ല.അമിത ഭാരമുള്ള ബാഗേജിന് അധിക ഫീസ് ഈടാക്കും.