കുവൈത്തിലെ പ്രവാസികൾക്ക് അവരുടെ പാസ്‌പോർട്ട് വിവരങ്ങൾ ഓൺലൈനായി പുതുക്കുന്നതിനുള്ള പുതിയ സേവനം ആഭ്യന്തര മന്ത്രാലയം ആരംഭിച്ചു. ഏകീകൃത സർക്കാർ ആപ്പായ 'സഹേൽ' വഴിയാണ് ഈ സേവനം ലഭ്യമാകുക. ഇതോടെ പാസ്‌പോർട്ട് വിവരങ്ങൾ അപ്‌ഡേറ്റ് ചെയ്യുന്നതിനായി ഇനി മന്ത്രാലയത്തിന്റെ സേവന കേന്ദ്രങ്ങൾ സന്ദർശിക്കേണ്ടി വരില്ല.

ആഭ്യന്തര മന്ത്രാലയത്തിന് കീഴിലുള്ള ഇൻഫർമേഷൻ സിസ്റ്റം വിഭാഗവും റെസിഡൻസി അഫയേഴ്സ് വിഭാഗവും സംയുക്തമായാണ് ഈ സേവനം പുറത്തിറക്കിയത്.  സഹേല്‍ ആപ്പിലെ 'മിനിസ്ട്രി ഓഫ് ഇന്റീരിയര്‍' സേവനങ്ങളുടെ പട്ടികയിലാണ് പുതിയ സേവനം ഉള്‍പ്പെടുത്തിയിരിക്കുന്നത്. താമസരേഖയുമായി ബന്ധപ്പെട്ട നടപടിക്രമങ്ങള്‍ കൂടുതല്‍ സുതാര്യവും വേഗതയുള്ളതുമാക്കാന്‍ പുതിയ മാറ്റം സഹായിക്കുമെന്ന് ആഭ്യന്തര മന്ത്രാലയം വ്യക്തമാക്കി. ഡിജിറ്റൽ വൽക്കരണത്തിലൂടെ സേവനങ്ങൾ ലഘൂകരിക്കുന്നതിന്റെ ഭാഗമായാണ് മന്ത്രാലയം ഈ പുതിയ സംവിധാനം ഏർപ്പെടുത്തിയത്.

നടപടിക്രമങ്ങൾ ലളിതം സ്വന്തം രാജ്യങ്ങളുടെ എംബസികളിൽ നിന്ന് പാസ്‌പോർട്ട് പുതുക്കിയ ശേഷം, അതിന്റെ വിവരങ്ങൾ കുവൈറ്റ് ആഭ്യന്തര മന്ത്രാലയത്തിന്റെ റെക്കോർഡുകളിൽ രേഖപ്പെടുത്താനാണ് ഈ സേവനം ഉപയോഗിക്കേണ്ടത്. ഇതിനായി സഹേൽ ആപ്പിലെ സെക്യൂരിറ്റി സർവീസസ് (Security Services) വിഭാഗത്തിൽ പോയി വിവരങ്ങൾ സമർപ്പിക്കാവുന്നതാണ്.

നേരത്തെ പാസ്‌പോർട്ട് വിവരങ്ങൾ പുതുക്കുന്നതിനായി റെസിഡൻസി കാര്യാലയങ്ങളിൽ നേരിട്ട് എത്തണമായിരുന്നു. പുതിയ സേവനം നിലവിൽ വന്നതോടെ പ്രവാസികൾക്ക് സമയലാഭത്തോടൊപ്പം നടപടിക്രമങ്ങൾ വേഗത്തിലാക്കാനും സാധിക്കും.

കഴിഞ്ഞ ജൂലൈ 1 മുതൽ രാജ്യത്തിന് പുറത്ത് പോകണമെങ്കിൽ സ്വകാര്യ മേഖലയിലെ പ്രവാസികൾക്കും എക്സിറ്റ് പെർമിറ്റ് നിർബന്ധമാക്കിയിരിക്കുന്നു. ഈ  സാഹചര്യത്തിൽ  അധികൃതർ ആപ്പിൽ ഇംഗ്ലിഷ് ഭാഷ ഉൾപ്പെടുത്തിയിട്ടുണ്ട് .രാജ്യത്തെ സർക്കാർ ജീവനക്കാരായ പ്രവാസികൾക്ക് നേരത്തെ മുതൽ തന്നെ എക്സിറ്റ് പെർമിറ്റ് ആവശ്യമാണെങ്കിലും സ്വകാര്യ മേഖലയിലെ പ്രവാസികൾക്ക് ജൂലൈ 1 മുതലാണ് നിർബന്ധമാക്കിയത്

ശ്രദ്ധിക്കേണ്ട കാര്യങ്ങൾ
എംബസി വഴി പാസ്‌പോർട്ട് പുതുക്കിയവർക്ക് മാത്രമേ സഹേൽ ആപ്പിലൂടെ വിവരങ്ങൾ അപ്‌ഡേറ്റ് ചെയ്യാൻ സാധിക്കൂ.
മന്ത്രാലയത്തിന്റെ സിസ്റ്റത്തിൽ പുതിയ പാസ്‌പോർട്ട് നമ്പർ, കാലാവധി തുടങ്ങിയ വിവരങ്ങൾ ഇതോടെ കൃത്യമായി രേഖപ്പെടുത്തപ്പെടും.
പ്രവാസികളുടെ താമസ രേഖയുമായി (ഇഖാമ) ബന്ധപ്പെട്ട നടപടികൾ കൂടുതൽ സുതാര്യമാക്കുന്നതിന്റെ ഭാഗമായാണ് ആഭ്യന്തര മന്ത്രാലയത്തിന്റെ ഈ നീക്കം. സർക്കാർ ഓഫീസുകളിലെ തിരക്ക് കുറയ്ക്കാനും ഡിജിറ്റൽ സേവനങ്ങൾ പരമാവധി പ്രയോജനപ്പെടുത്താനും എല്ലാവരും സഹകരിക്കണമെന്ന് മന്ത്രാലയത്തിന്റെ സുരക്ഷാ മാധ്യമ വിഭാഗം അറിയിച്ചു.

പുതിയ പാസ്‌പോർട്ട് എടുക്കുമ്പോഴോ വിവരങ്ങളിൽ മാറ്റം വരുമ്പോഴോ 'സഹൽ' ആപ്പ് വഴി അത് സിസ്റ്റത്തിൽ രേഖപ്പെടുത്താം. സർക്കാർ ഓഫീസുകളിൽ നേരിട്ടെത്താതെ തന്നെ മിനിറ്റുകൾക്കുള്ളിൽ നടപടിക്രമങ്ങൾ പൂർത്തിയാക്കാം. കുവൈറ്റ് ഗവൺമെന്റിന്റെ സമ്പൂർണ്ണ ഡിജിറ്റലൈസേഷൻ നടപടികളുടെ ഭാഗമായാണ് ഈ പുതിയ പരിഷ്കാരം. ഇത് ചെയ്യുന്നത് വളരെ എളുപ്പമാണ്

നിങ്ങളുടെ ഫോണിൽ 'സഹേൽ' ആപ്പ് തുറക്കുക.

ആഭ്യന്തര മന്ത്രാലയത്തിന്റെ സേവനങ്ങൾ തിരഞ്ഞെടുക്കുക.

'Updating Passport Data' എന്ന ലിങ്കിൽ ക്ലിക്ക് ചെയ്ത് പുതിയ പാസ്‌പോർട്ട് വിവരങ്ങൾ നൽകി അപ്‌ഡേറ്റ് ചെയ്യുക.

നടപടിക്രമങ്ങളുടെ കാര്യക്ഷമത വർദ്ധിപ്പിക്കാനും പൊതുജനങ്ങൾക്ക് മികച്ച സേവനം നൽകാനും ഈ നീക്കം സഹായിക്കുമെന്ന് ആഭ്യന്തര മന്ത്രാലയം അറിയിച്ചു. പ്രവാസികൾക്ക് അവരുടെ ഇഖാമ പുതുക്കുന്നതിന് പാസ്‌പോർട്ട് വിവരങ്ങൾ അപ്‌ഡേറ്റ് ചെയ്യേണ്ടത് അനിവാര്യമാണ്.