2025ലെ സാമ്പത്തിക വർഷത്തിൽ 71,585 കോടി രൂപയുടെ റെക്കോർഡ് വരുമാനവുമായി ലുലു റീട്ടെയ്ൽ. 2025 സാമ്പത്തിക വർഷത്തിലെ രണ്ടാം പകുതിയിൽ 887.58 കോടി രൂപയുടെ ലാഭവിഹിതം പ്രഖ്യാപിച്ചു. ഇതോടെ 2025ലെ നിക്ഷേപകർക്കുള്ള ആകെ ലാഭവിഹിതം 1785 കോടി രൂപയായി ഉയർന്നു. ഇതേ വർഷത്തെ അറ്റാദായം 1856 കോടി രൂപയായി ഉയർന്നു. വിപുലമായ വികസന പദ്ധതികളും ഇ കൊമേഴ്സ് രം​ഗത്തെ മികച്ച വളർച്ചയുമാണ് ലുലുവിന്റെ നേട്ടത്തിന് കരുത്തേകിയത്. മികച്ച വളർച്ചാനിരക്കാണ് ലുലു രേഖപ്പെടുത്തുന്നത്.

2025ൽ മാത്രം 20 പുതിയ സ്റ്റോറുകളാണ് ലുലു തുറന്നത്. 2026 -2028 വർഷത്തിൽ 50 പുതിയ സ്റ്റോറുകൾ കൂടി ലുലു തുറക്കാനും ലക്ഷ്യമിടുന്നു. വിപുലമായ വികസന പദ്ധതികളാണ് ലുലു നടപ്പാക്കുന്നതെന്നും നിക്ഷേപകർക്ക് ഏറ്റവും മികച്ച നേട്ടം നൽകുമെന്നും ലുലു ഗ്രൂപ്പ് ചെയർമാൻ എം.എ യൂസഫലി പറഞ്ഞു. സുസ്ഥിരമായ വളർച്ചയിലൂടെ ദീർഘകാലാടിസ്ഥാനമാക്കിയുള്ള നയങ്ങളാണ് ലുലു നടപ്പാക്കുന്നതെന്നും അദേഹം കൂട്ടിച്ചേർത്തു.

ഓൺലൈൻ പ്ലാറ്റ്ഫോമുകളിൽ നല്ല വളർച്ചയാണ് ലുലു രേഖപ്പെടുത്തിയത്. ഇ കൊമേഴ്സ് വിൽപ്പനയിൽ മാത്രം 38.6 ശതമാനം അധിക വളർച്ചയോടെ ആകെ 51.8 ശതമാനത്തിന് അധിക വളർച്ച നേടി. 7.3 ശതമാനം അധിക ഓൺലൈൻ ഉപഭോക്താക്കളുടെ സാന്നിദ്ധ്യം പ്രകടമായി. 29.8 ശതമാനത്തിന്റെ വളർച്ച പ്രൈവറ്റ് ലേബൽ രേഖപ്പെടുത്തിയെന്നും പുറത്തുവിട്ട കണക്കുകൾ പറയുന്നു. ലുലുവിന്റെ ഹാപ്പിനെസ് ലോയൽറ്റി മെമ്പർഷിപ്പിച്ചിൽ അം​ഗങ്ങളാകുന്ന ഉപഭോക്താക്കളുടെ എണ്ണത്തിലും വർധനവുണ്ടായി. 8.4 മില്യൺ പേർ നിലവിൽ ലോയൽറ്റി പ്രോ​ഗ്രാം അം​ഗങ്ങളാണ്.
ഈ വർഷം, ലുലു അവരുടെ ഓമ്നിചാനൽ തന്ത്രത്തിന് പ്രത്യേക ഊന്നൽ നൽകുന്നു. തടസമില്ലാത്ത ഓൺലൈൻ ഓർഡറിംഗ്, ഹോം ഡെലിവറി, ക്ലിക്ക്-ആൻഡ്-കളക്റ്റ് സേവനങ്ങൾ എന്നിവ ഉറപ്പാക്കുന്നതിന് ഇ-കൊമേഴ്സ് പ്ലാറ്റ്ഫോമുകൾ ശക്തിപ്പെടുത്തും. എക്സ്‌ക്ലൂസീവ് ഡിജിറ്റൽ ഓഫറുകളുടെയും മെച്ചപ്പെടുത്തിയ ആപ്പ് അധിഷ്ഠിത ഷോപ്പിംഗ് അനുഭവങ്ങളുടെയും പിന്തുണയോടെ സ്റ്റോറുകളിലും ഓൺലൈനിലും ഉപഭോക്താക്കൾക്ക് റമദാൻ പ്രമോഷനുകൾ ലഭിക്കും.

അതിനിടെ യുഎഇ-ഒമാൻ അതിർത്തിക്കടുത്തുള്ള തന്ത്രപ്രധാനമായ സ്ഥലമായ റാസൽഖൈമയിലെ ഗലീല മാളിൽ ലുലു പുതിയ എക്‌സ്പ്രസ് സ്റ്റോർ തുറന്നു. റാസൽഖൈമ മേഖലയിലെ താമസക്കാർക്കും അതിർത്തി കടന്നുള്ള യാത്രക്കാർക്കും ഗുണനിലവാരമുള്ള പലചരക്ക് സാധനങ്ങളും ദൈനംദിന അവശ്യവസ്തുക്കളും എളുപ്പത്തിൽ ലഭ്യമാക്കുന്നതിനാണ് പുതിയ സ്റ്റോർ സജ്ജീകരിച്ചിരിക്കുന്നത്.

19,200 ചതുരശ്ര അടി വിസ്തീർണമുള്ള പുതിയ ലുലു എക്‌സ്പ്രസ്, പലചരക്ക് സാധനങ്ങൾ, പഴങ്ങളും പച്ചക്കറികളും, ബേക്കറി ഇനങ്ങൾ, മാംസം, സീഫുഡ്, വീട്ടുപകരണങ്ങൾ, സൗന്ദര്യവർദ്ധക വസ്തുക്കൾ തുടങ്ങി നിരവധി ഉൽപ്പന്നങ്ങൾ വാഗ്ദാനം ചെയ്യുന്നു. പ്രത്യേക പ്രമോഷണൽ ഓഫറുകളുള്ള റമദാൻ ഉൽപ്പന്നങ്ങളുടെ വിപുലമായ ശേഖരവും സ്റ്റോറിൽ ഉണ്ട്. കൂടുതൽ സൗകര്യാർത്ഥം, ഔട്ട്ലെറ്റിൽ സ്വയം ചെക്ക്ഔട്ട് കൗണ്ടറുകളും വിശാലമായ പാർക്കിംഗ് സൗകര്യങ്ങളും ഉൾപ്പെടുന്നു.

'റാസൽ ഖൈമയിലെ പുതിയ ലുലു എക്‌സ്പ്രസ് സ്റ്റോർ മേഖലയിലെ ഉപഭോക്താക്കൾക്ക് പ്രവേശനക്ഷമതയും സൗകര്യവും വർധിപ്പിക്കുന്നു. നഗരത്തിന്റെ പ്രാന്തപ്രദേശങ്ങളിലേക്കുള്ള ഞങ്ങളുടെ വിപുലീകരണം ആധുനിക റീട്ടെയിൽ മേഖലയെ സമൂഹങ്ങളിലേക്ക് അടുപ്പിക്കുന്നതിനും, പ്രാദേശിക വികസനത്തെ പിന്തുണയ്ക്കുന്നതിനും, യുഎഇയുടെ തുടർച്ചയായ സാമ്പത്തിക വളർച്ചയ്ക്ക് സംഭാവന നൽകുന്നതിനുമുള്ള ലുലുവിന്റെ പ്രതിബദ്ധതയെ പ്രതിഫലിപ്പിക്കുന്നു,' യൂസഫലി പറഞ്ഞു.