സൗദിയിലെ പ്രമുഖ വ്യവസായ നഗരമായ യാംബുവിൽ 16ാമത് പുഷ്പോത്സവത്തിന് വർണാഭമായ ചടങ്ങുകളോടെ തുടക്കമായി. പെരുന്നാൾ അവധി ദിനമായതിനാൽ സൗദിയുടെ വിവിധ ഭാഗങ്ങളിൽനിന്ന് നൂറുകണക്കിന് സന്ദർശകരാണ് ഉദ്ഘാടന ദിവസം മേള കാണാനെത്തിയത്.

ഉദ്ഘാടനത്തോടനുബന്ധിച്ച് പ്രവേശനം സൗജന്യമായിരുന്നു. വൈവിധ്യമാർന്ന സാംസ്‌കാരിക ഘോഷയാത്രകൾ, വിവിധ ഷോകൾ, കുട്ടികൾക്കായുള്ള പ്രത്യേക സ്റ്റേജ് പരിപാടികൾ എന്നിവ ആദ്യദിനത്തെ ആകർഷകമാക്കുകയും ചെയ്തു.

യാംബു റോയൽ കമീഷനിലെ യാംബു-ജിദ്ദ ഹൈവേ റോഡിനോട് ചേർന്ന അൽ മുനാസബാത്ത് ഉദ്യാനത്തിലാണ് മേള നടക്കുന്നത്. ഏപ്രിൽ 23 വരെ നീണ്ടുനിൽക്കുന്ന മേള എല്ലാ ദിവസവും വൈകുന്നേരം നാല്​ മുതൽ രാത്രി 12 വരെയാണ് പ്രവർത്തിക്കുക. അഞ്ച്​ റിയാലാണ് ടിക്കറ്റ് നിരക്ക്. കൂടാതെ 20 റിയാലിന്റെ സീസൺ ടിക്കറ്റും ലഭ്യമാണ്.

https://window.rcjy.gov.sa/RCJYReservation/ എന്ന വെബ്സൈറ്റിലൂടെ ടിക്കറ്റുകൾ മുൻകൂട്ടി ബുക്ക് ചെയ്യാവുന്നതാണ്. രണ്ട് വയസ്സിൽ താഴെയുള്ള കുട്ടികൾക്കും ഭിന്നശേഷിക്കാർക്കും പ്രവേശനം സൗജന്യമായിരിക്കും.