അബുദാബിയിലെ ഖലീഫ ഇക്കണോമിക് സോൺ (കെസാദ്) പരിസരത്ത് രണ്ട് ഇടങ്ങളിലായി തീ പിടുത്തമുണ്ടായി. സംഭവത്തിൽ അഞ്ച് ഇന്ത്യക്കാർക്ക് പരുക്കേറ്റു. യുഎഇ വ്യോമപ്രതിരോധ സംവിധാനം തകർത്ത ബാലിസ്റ്റിക് മിസൈലിന്റെ അവശിഷ്ടങ്ങൾ പതിച്ചതാണ് തീപിടിത്തത്തിന് കാരണമായതെന്ന് അധികൃതർ സ്ഥിരീകരിച്ചു.

പരുക്കേറ്റവർക്ക് അടിയന്തര ചികിത്സ ലഭ്യമാക്കിയിട്ടുണ്ട്. ഇവരുടെ പരുക്ക് ഗുരുതരമല്ലെന്നും നിസ്സാരമായ മുറിവുകളാണെന്നും ബന്ധപ്പെട്ട വൃത്തങ്ങൾ അറിയിച്ചു. മിസൈൽ ആക്രമണത്തെ വിജയകരമായി പ്രതിരോധിച്ചതായും സ്ഥിതിഗതികൾ നിയന്ത്രണവിധേയമാണെന്നും പ്രതിരോധ മന്ത്രാലയം വ്യക്തമാക്കി. സംഭവസ്ഥലത്ത് സിവിൽ ഡിഫൻസ് അടക്കമുള്ള സുരക്ഷാ വിഭാഗങ്ങൾ അടിയന്തര നടപടികൾ സ്വീകരിച്ചു വരികയാണ്.

യുഎഇയിൽ ഇന്നും കനത്ത മഴ തുടരുന്നു. വെള്ളിയാഴ്‌ചയും ശക്തമായ മഴ, ഇടിമിന്നൽ, ശക്തമായ കാറ്റ്, ആലിപ്പഴ വർഷം എന്നിവയുൾപ്പെടെയുള്ള തീവ്ര കാലാവസ്ഥ പ്രതീക്ഷിക്കുന്നതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. വ്യാഴാഴ്‌ച രാത്രി മുതൽ വെള്ളിയാഴ്‌ച പുലർച്ചെ (മാർച്ച് 27) വരെ പ്രധാന നഗരങ്ങളിൽ തീവ്ര കാലാവസ്ഥ അനുഭവപ്പെട്ടു.

ഇടിമിന്നലും പേമാരിയും ആഞ്ഞുവീശിയതായി താമസക്കാർ സാക്ഷ്യപ്പെടുത്തുന്നു. ന്യൂനമർദ്ദം സൃഷ്‌ടിച്ച അസ്ഥിര കാലാവസ്ഥയാണ് തുടർച്ചയായ മഴക്കും കാറ്റിനും ഇടിമിന്നലിനും കാരണമെന്ന് എൻസിഎം വിശദീകരിച്ചു. യുഎഇ അധികൃതർ അബുദാബിയിൽ പ്രത്യേകിച്ചും ജാഗ്രത പാലിക്കാൻ അഭ്യർത്ഥിച്ചു. ശനിയാഴ്‌ച മുതൽ കാലാവസ്ഥ മെച്ചപ്പെടുമെന്നും തെളിഞ്ഞ ആകാശവും തണുത്ത താപനിലയും പ്രതീക്ഷിക്കാമെന്നും അവർ അറിയിച്ചു.