ഹജ്ജിനായി കൊച്ചിയില്‍ നിന്നുള്ള ആദ്യ സംഘം ഇന്ന് പുറപ്പെടും. നെടുമ്പാശ്ശേരി വിമാനത്താവളത്തില്‍ നിന്ന് ഉച്ചയ്ക്ക് 2. 10 നാണ് 430 തീര്‍ത്ഥാടകരുമായി ആദ്യ വിമാനം പുറപ്പെടുക. സംസ്ഥാന ഹജ്ജ് ക്യാംപിന് നെടുമ്പാശ്ശേരിയില്‍ ഇന്നലെ തുടക്കമായിരുന്നു. കഴിഞ്ഞ വര്‍ഷം സൗദി എയര്‍ലൈന്‍സാണ് കൊച്ചിയില്‍ നിന്ന് സര്‍വീസ് നടത്തിയിരുന്നത്.

എന്നാല്‍ ഇത്തവണ ഫ്‌ലൈനാസ് എയര്‍ലൈന്‍സാണ് തീര്‍ത്ഥാടകരുമായി പോകുന്നത്. നെടുമ്പാശ്ശേരിയില്‍ നിന്ന് ഇക്കുറി 7943 തീര്‍ത്ഥാടകരാണ് യാത്ര തിരിക്കുന്നത്. കേരളത്തിലെ മൂന്ന് ഹജ്ജ് എംബാര്‍ക്കേഷന്‍ പോയിന്റുകളില്‍ നിന്നുമായി 13,194 തീര്‍ത്ഥാടകരാണ് ഹജ്ജിനായി യാത്ര തിരിക്കുക.

കണ്ണൂരില്‍ നിന്നുള്ള സര്‍വീസുകള്‍ മെയ് 6 മുതല്‍ 14 വരെയും, കോഴിക്കോട് നിന്നുള്ള യാത്രകള്‍ മെയ് 14 മുതല്‍ 17 വരെയുമാണ് ക്രമീകരിച്ചിട്ടുള്ളത്.