ഈ വർഷത്തെ ഹജ്ജ് തീർഥാടനത്തിനായി സംസ്ഥാന ഹജ്ജ് കമ്മിറ്റിക്ക് കീഴിലുള്ള ആദ്യ സംഘം മക്കയിലെത്തി. നെടുമ്പാശ്ശേരിയിൽ നിന്ന് പുറപ്പെട്ട 430 തീർഥാടകരാണ് ജിദ്ദ വിമാനത്താവളം വഴി പുണ്യനഗരിയിൽ എത്തിയത്.

മക്കയിലെത്തിയ ഹാജിമാർക്ക് ഇന്ത്യൻ ഹജ്ജ് മിഷൻ ഉദ്യോഗസ്ഥരും നൂറുകണക്കിന് മലയാളി സന്നദ്ധ പ്രവർത്തകരും ചേർന്ന് ഊഷ്മളമായ സ്വീകരണം നൽകി. ഈത്തപ്പഴവും ജ്യൂസും മധുരപലഹാരങ്ങളും നൽകിയാണ് തീർഥാടകരെ സ്വീകരിച്ചത്. അസീസിയിലെ 502-ാം ബിൽഡിങ്ങിലാണ് ആദ്യ സംഘത്തിന് താമസം സജ്ജമാക്കിയിട്ടുള്ളത്.

താമസസ്ഥലത്ത് എത്തിയ തീർഥാടകർ അല്പസമയത്തെ വിശ്രമത്തിന് ശേഷം ഉംറ നിർവഹിക്കാനായി ഹറമിലേക്ക് തിരിക്കും. വരും ദിവസങ്ങളിൽ കേരളത്തിൽ നിന്നുള്ള കൂടുതൽ വിമാനങ്ങൾ പുറപ്പെടും. നാളെ കൊച്ചിയിൽ നിന്ന് രണ്ടും മറ്റന്നാൾ മൂന്ന് വിമാനങ്ങളുമാണ് സർവീസ് നടത്തുന്നത്. വിവിധ ഇന്ത്യൻ സംസ്ഥാനങ്ങളിൽ നിന്നുള്ള തീർത്ഥാടകരും ഇന്നു മുതൽ ജിദ്ദ വഴി എത്തിത്തുടങ്ങുന്നതോടെ ഹജ്ജ് കർമ്മങ്ങൾക്കായി പുണ്യനഗരി സജീവമാവുന്നു.