ഔദ്യോഗിക പദവികളുടെയും സുരക്ഷാ പ്രോട്ടോക്കോളുകളുടെയും അകമ്പടിയില്ലാതെ സാധാരണക്കാർക്കിടയിലേക്ക് ഇറങ്ങിച്ചെല്ലുന്ന യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നേതൃശൈലി ഒരിക്കൽ കൂടി ലോകശ്രദ്ധ നേടുന്നു. ഈജിപ്ഷ്യൻ പ്രസിഡന്റ് അബ്ദൽ ഫത്താഹ് അൽ സിസിയുമായി ചേർന്ന് അബുദാബിയിലെ യാസ് മാളിൽ അദ്ദേഹം നടത്തിയ സന്ദർശനം ഇതിന്റെ ഏറ്റവും പുതിയ ഉദാഹരണമായി.

∙ ജനകീയനായ ഭരണാധികാരി; യാസ് മാളിലെ വിരുന്ന്
ജനങ്ങളോട് നേരിട്ട് സംവദിക്കാനും അവരുടെ വിശേഷങ്ങൾ ചോദിച്ചറിയാനും താൽപര്യപ്പെടുന്ന ഷെയ്ഖ് മുഹമ്മദിന്റെ രീതി അദ്ദേഹത്തിന്റെ പതിവ് ശൈലിയാണെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ് പറഞ്ഞു. ആഴ്ചതോറും നൂറുകണക്കിന് ആളുകൾ പങ്കെടുക്കുന്ന മജ്‌ലിസുകൾക്കും പൗരന്മാരുടെ വീടുകളിലെ സന്ദർശനങ്ങൾക്കും പുറമെയാണിത്. ജനങ്ങളോടുള്ള ഈ അടുപ്പവും ലാളിത്യവുമാണ് അസാധാരണ സാഹചര്യങ്ങളിൽ ഭരണകൂടത്തിലുള്ള വിശ്വാസം വർധിപ്പിക്കുന്നതെന്നും അദ്ദേഹം കൂട്ടിച്ചേർത്തു.


യാസ് മാളിലൂടെ നടന്നുനീങ്ങിയ ഇരുനേതാക്കളെയും ആവേശത്തോടെയാണ് സന്ദർശകർ സ്വീകരിച്ചത്. മാളിലെ ലബനീസ് റസ്റ്ററന്റിൽ ഭക്ഷണം കഴിക്കാനെത്തിയ പ്രസിഡന്റ് അവിടെയുണ്ടായിരുന്ന പ്രവാസികളുമായും സ്വദേശികളുമായും ഹസ്തദാനം ചെയ്യുകയും സൗഹൃദം പങ്കുവയ്ക്കുകയും ചെയ്തു. ഇതിന്റെ ദൃശ്യങ്ങൾ ഇതിനോടകം സമൂഹമാധ്യമത്തിൽ തരംഗമായിക്കഴിഞ്ഞു.