സലാലയിലെ വിവിധ പള്ളികളിലും ഈദ് ഗാഹുകളിലും പെരുന്നാൾ പ്രാർഥനകൾ നടന്നു. സുൽത്താൻ ഖാബൂസ് മസ്ജിദ് ഉൾപ്പടെയുള്ള പള്ളികളിൽ നടന്ന ഈദ് നമസ്കാരത്തിന് ആയിരങ്ങളെത്തി. ഇബ്രാഹിം നബിയുടെ പാത പിന്തുടർന്ന് അല്ലാഹുവിൽ സമർപ്പിക്കാനായി ഖത്തീബുമാർ ഉണർത്തി.വിവിധ മലയാളി കൂട്ടായ്മകളും ഈദ് നമസ്കാരവും ഈദ് ഗാഹും ഒരുക്കിയിരുന്നു.

ഐ.എം.ഐ സലാല ഫാസ് അക്കാദമി ഗ്രൗണ്ടിൽ ഒരുക്കിയ ഈദ് ഗാഹിന് കെ.അഷറഫ് മൗലവി നേത്യത്വം നൽകി. വനിതകൾ ഉൾപ്പടെ നൂറുകണക്കിനാളുകൾ പങ്കെടുത്തു. എസ്.ഐ.സി വിവിധ പള്ളികളിൽ ഈദ് നമസ്കാരം ഒരുക്കിയിട്ടുണ്ടായിരുന്നു. മസ്ജിദ് ഹിബ്റിൽ ഒരുക്കിയ ഈദ് നമസ്കാരത്തിന് അബ്‌ദുല്ലത്തീഫ്‌ ഫൈസി തിരുവള്ളൂരാണ് നേതൃത്വം നൽകിയത്.

ഐ.സി.എഫ് സലാല നാല് പള്ളികളിൽ ഈദ് നമസ്കാരം സംഘടിപ്പിച്ചു. മസ്ജിദ് ബാഅലവിയിൽ ഒരുക്കിയ ഈദ് നമസ്കരത്തിന് നാസർ ലത്വീഫി നേത്യത്വം നൽകി. ഒമാൻ ഇന്ത്യൻ ഇസ്ലാഹി സെന്റർ ഇത്തിഹാദ് ക്ലബ്ബ് മൈതാനിയിൽ ഒരുക്കിയ ഈദ് ഗാഹിന് ഡാനിഷ്‌ മദനിയാണ് നേത്യത്വം നൽകിയത്. ഈദ് അവധി ആഘോഷിക്കാൻ സലാലയിൽ എത്തിയ നിരവധി പേരും ഈദ് നമസ്കാരത്തിൽ പങ്കെടുക്കുകയും ചെയ്തു.