സംസ്ഥാന ഹജ്ജ് കമ്മറ്റിക്ക് കീഴിലെത്തിയ ഹാജിമാരുടെ ആദ്യ സംഘം ഹജ്ജ് കർമങ്ങൾ പൂർത്തിയാക്കിയശേഷം ഇന്ന് തിരികെയെത്തും. ഇന്ന് രാത്രി പതിനൊന്നരക്ക് കൊച്ചിയിലാണ് മദീനയിൽ നിന്നുള്ള ആദ്യ വിമാനമെത്തുക. ജൂൺ മുപ്പതോടെയാണ് മുഴുവൻ ഹാജിമാരും സൗദിയിൽ നിന്ന് മടങ്ങുക.

സൗദി സമയം ഉച്ചക്ക് 2:30നാണ് മദീനയിൽനിന്നുള്ള ആദ്യ വിമാനം. ഷോർട്ട് ഹജ്ജ് വിഭാഗത്തിലെത്തിയ 430 തീർഥാടകരാണ് ആദ്യ സംഘത്തിലുള്ളത്. മന്ത്രി എൻ. ഷംസുദ്ദീന്റെ നേതൃത്വത്തിൽ ആദ്യ വിമാനത്തിലെ തീർഥാടകരെ സ്വീകരിക്കും.

കുറഞ്ഞ കാലാവധിയുള്ള ഷോർട്ട് ഹജ്ജ് വിഭാഗത്തിലുള്ളവർ 3 ദിവസത്തെയും അല്ലാത്തവർ 8 ദിവസത്തെയും മദീന സന്ദർശനം പൂർത്തിയാക്കിയാണ് നാട്ടിലേക്ക് മടങ്ങുന്നത്. ഹജ്ജ് തീർഥാടനം കഴിഞ്ഞു മടങ്ങുന്ന എല്ലാ തീർഥാടകരും എബോള നിരീക്ഷണത്തിന്റെ ഭാഗമായി സെൽഫ് ഡിക്ലറേഷൻ ഫോം പൂരിപ്പിച്ചു നൽകണം. കേന്ദ്ര ആരോഗ്യ മന്ത്രാലയത്തിന്റെ ഇതിനായുള്ള ഫോം മദീനയിൽ വെച്ച് തന്നെ തീർഥാടകർക്ക് നൽകുന്നുണ്ട്.

ഈ മാസം 21 മുതൽ കണ്ണൂരേക്കും, 23 മുതൽ കോഴിക്കോട്ടേക്കുമുള്ള ഹാജിമാരുടെ മടക്കവും ആരംഭിക്കും. ജൂൺ 30നാണ് മലയാളി ഹാജിമാരുടെ മടക്കയാത്ര പൂർത്തിയാകുക