വെറ്ററിനറി കോളജിലെ വിദ്യാര്‍ഥി സിദ്ധാര്‍ഥന്റെ ദുരൂഹ മരണം... പ്രതികള്‍ക്കെതിരെ കൊലക്കുറ്റം ചുമത്തണമെന്നാവശ്യപ്പെട്ട് കെ.എസ്.യു നടത്തിയ മാര്‍ച്ചില്‍ സംഘര്‍ഷം
പൂക്കോട് വെറ്ററിനറി കോളജിലെ വിദ്യാര്‍ഥി സിദ്ധാര്‍ഥന്റെ ദുരൂഹ മരണവുമായി ബന്ധപ്പെട്ട കേസിലെ പ്രതികള്‍ക്കെതിരെ കൊലക്കുറ്റം ചുമത്തണമെന്നാവശ്യപ്പെട്ട് കെ.എസ്.യു നടത്തിയ മാര്‍ച്ചില്‍ സംഘര്‍ഷം. പ്രവര്‍ത്തകര്‍ക്ക് നേരെ പൊലീസ് ലാത്തിച്ചാര്‍ജ് നടത്തി. കണ്ണീര്‍വാതകം പ്രയോഗിച്ചു. പരിക്കേറ്റ അഞ്ച് പ്രവര്‍ത്തകരെ ആശുപത്രിയിലേക്ക് മാറ്റി. സ്ഥലത്ത് സംഘര്‍ഷാവസ്ഥ തുടരുകയാണ്. പൊലീസ് അതിക്രമത്തില്‍ പ്രയോഗിച്ച് പ്രതിഷേധക്കാര്‍ വെറ്ററിനറി കോളജിന് മുന്നില്‍ ദേശീയപാത ഉപരോധിക്കുകയാണ്.
ഉച്ചയോടെയാണ് കെ.എസ്.യു പ്രവര്‍ത്തകര്‍ പ്രതിഷേധ മാര്‍ച്ചുമായെത്തിയത്. വെറ്ററിനറി കോളജിന് പുറത്ത് മാര്‍ച്ച് പൊലീസ് ബാരിക്കേഡ് വെച്ച് തടഞ്ഞിരുന്നു. പ്രവര്‍ത്തകര്‍ ഇത് ചാടിക്കടക്കാന്‍ ശ്രമിച്ചതോടെ ആദ്യം ജലപീരങ്കി പ്രയോഗിച്ചു. എന്നാല്‍, പിന്തിരിയാതെ കെ.എസ്.യു പ്രവര്‍ത്തകര്‍ മാര്‍ച്ച് തുടര്‍ന്നതോടെ ലാത്തിച്ചാര്‍ജും കണ്ണീര്‍വാതക ഷെല്ലുകളും പ്രയോഗിക്കുകയായിരുന്നു. നിരവധി പ്രവര്‍ത്തകര്‍ക്കാണ് പരിക്കേറ്റത്. പൊലീസിന് നേരെ കല്ലേറുമുണ്ടായി.
നേരത്തെ എം.എസ്.എഫ്, ഫ്രറ്റേണിറ്റി പ്രവര്‍ത്തകരും കോളജിലേക്ക് മാര്‍ച്ച് നടത്തിയിരുന്നു. എം.എസ്.എഫ് മാര്‍ച്ചിന് നേരെ ജലപീരങ്കി പ്രയോഗിച്ചു. സംഘര്‍ഷ സാധ്യത കണക്കിലെടുത്ത് കനത്ത പൊലീസ് വിന്യാസം സ്ഥലത്ത് നടത്തിയിരുന്നു. സിദ്ധാര്‍ഥന്റെ കേസന്വേഷണത്തില്‍ യൂനിവേഴ്‌സിറ്റി ഉന്നതരുടെ പങ്ക് അന്വേഷണവിധേയമാക്കുക, സംഭവത്തില്‍ ജുഡീഷ്യല്‍ അന്വേഷണം നടത്തുക തുടങ്ങിയ ആവശ്യങ്ങളുന്നയിച്ച് സര്‍വകലാശാല കവാടത്തില്‍ യൂത്ത് ലീഗ് ഉപവാസ സമരം തുടരുകയാണ്.
https://www.facebook.com/Malayalivartha
