കേരളത്തില്‍ കു്ട്ടികള്‍ക്ക് നേരെയുള്ള അതിക്രമങ്ങള്‍ കൂടി വരുന്നു. 2017 ഏപ്രില്‍ മുതല്‍ 2018 മാര്‍ച്ച് വരെ മാത്രം 1,302 ലൈംഗികാതിക്രമ കേസുകളാണ് സംസ്ഥാനത്തെ 36 ചൈല്‍ഡ് ലൈന്‍ യൂണിറ്റ് വഴി പോലീസിനു കൈമാറിയത്. ഇവയില്‍ 93.5 ശതമാനത്തിലും പ്രതികള്‍ കുട്ടികള്‍ക്ക് പരിചയമുള്ളവരായിരുന്നു. അപരിചിതര്‍ വെറും 85 പേരും. 1019 പെണ്‍കുട്ടികളും 133 ആണ്‍കുട്ടികളും പീഡനത്തിനിരയായി. 67 കേസുകളില്‍ അച്ഛന്‍മാരായിരുന്നു പ്രതികള്‍. 34 കേസുകളില്‍ രണ്ടാനച്ഛന്‍മാരാണ് പെണ്‍കുഞ്ഞുങ്ങളെ ദ്രോഹിച്ചത്. മിക്ക കേസുകളും വില്ലന്‍ ലഹരിയും. കഴിഞ്ഞ വര്‍ഷം മാര്‍ച്ച്് വരെയുള്ള കണക്ക് ഇതാണെങ്കില്‍ അതിന് ശേഷമുള്ള കണക്കുകള്‍ അതിലും വലുതായിരിക്കും. ഏറ്റവും ഒടുവില്‍ റിപ്പോര്‍ട്ട് ചെയ്ത കേസില്‍ വരെ ചോദ്യം ചെയ്യുമ്പോള്‍ പ്രതി പറഞ്ഞത് ചെയ്യുന്നത് തെറ്റാണെന്ന് തനിക്ക് അറിയില്ലായിരുന്നു എന്നാണ്. മയക്കുമരുന്നിന് അടിമയായവരാണ് പലരും. സ്വന്തം മക്കളോട് കാട്ടിയത് പാതകമാണെന്ന തിരിച്ചറിവുപോലും പലര്‍ക്കുമില്ല.

വീട്ടുകാരും ബന്ധുക്കളും അയല്‍വാസികളും അടങ്ങുന്ന പരിചിതസമൂഹമാണ് പെണ്‍കുട്ടികളെ ലൈംഗികമായി ചൂഷണം ചെയ്യുന്നതില്‍ 90 ശതമാനവും. രാജ്യത്ത് പലപ്പോഴായി നടന്ന പഠനങ്ങളിലെല്ലാം ഇക്കാര്യം വ്യക്തമായിട്ടുണ്ട്. ബന്ധുക്കള്‍ പ്രതിസ്ഥാനത്ത് വന്നത് 261 കേസുകളിലാണ്. കുട്ടികളുടെ വീടുകളുമായി അടുത്തബന്ധമുള്ള 269 പേരും പ്രതികളായി. പ്രേമംനടിച്ചുള്ള ബലാത്സംഗങ്ങള്‍ 178. സൗഹൃദം ബലാത്സംഗത്തിലേക്ക് വഴിമാറിയത് 52 കേസുകളില്‍ 119 കേസുകളിലെ പ്രതികള്‍ അധ്യാപകരായിരുന്നു. കുട്ടികള്‍ ബലാത്സംഗം ചെയ്യപ്പെടുന്ന സംഭവങ്ങളില്‍ 10 ശതമാനം മാത്രമാണ് കേസാകുന്നതെന്നാണ് സന്നദ്ധ സംഘടനകളുടെ കണ്ടെത്തല്‍. ബാക്കിയെല്ലാം പല തലങ്ങളിലായി ഒതുക്കപ്പെടുന്നു. കുട്ടിയുടെ മാനം മുന്‍നിര്‍ത്തിയുള്ള വിലപേശലാണ് നീതിനിഷേധത്തിന് കാരണമാകുന്നത്. 2017 2018 വര്‍ഷങ്ങളില്‍ ലൈല്‍ഡ് ലൈന്‍ റിപ്പോര്‍ട്ട് ചെയ്ത പീഡനക്കേസുകളില്‍ പകുതിയോളം നടന്നത് കുട്ടികളുടെ വീടുകളില്‍ തന്നെയാണ്. ദേശീയതലത്തില്‍ തന്നെ ഇത്രയധികം കേസുകള്‍ റിപ്പോര്‍ട്ട് ചെയ്യപ്പെടുന്നത് കേരളത്തിലാണ്. സ്വന്തം സ്വാര്‍ഥതാത്പര്യങ്ങള്‍ നടപ്പാക്കാനും പ്രതികാരംചെയ്യാനും കുട്ടികളെ കരുവാക്കുന്ന കുടുംബാംഗങ്ങളും കുറവല്ല. പെണ്‍കുട്ടികളുടെ സംരക്ഷണത്തിനുവേണ്ടി ഉയരുന്ന മുറവിളികള്‍ക്കാപ്പം കുടുംബവഴക്കുകളില്‍ അവരെ ബലിയാടാക്കി വേണ്ടപ്പെട്ടവരെ മാനസികമായി പീഡിപ്പിക്കുന്നത് തടയാനുള്ള നടപടികൂടി വേണ്ടിയിരിക്കുന്നു.