വനിതാ മതില്‍ കെണിയായെന്ന് മുഖ്യസംഘാടകനായ വെള്ളാപ്പള്ളി നടേശന്‍ ആരോപിച്ചു. മതില്‍ ഗംഭീര വിജയമായിരുന്നെങ്കിലും അതിന്റെ തൊട്ടടുത്ത ദിവസം പൊലീസ് യുവതികളെ മലകയറ്റിയതോടെ മതില്‍ കെണിയായി മാറിയെന്നും പൊളിഞ്ഞെന്നും അദ്ദേഹം വ്യക്തമാക്കി. ശബരിമല വിഷയത്തില്‍ ബി.ജെ.പിക്ക് അവസരം മുതലെടുക്കാനായി. അത് അവരുടെ നേട്ടമാണ്. എന്നാല്‍ ലോക്‌സഭാ തെരഞ്ഞെടുപ്പ് വരെ കൂടെയുള്ളവരില്‍ ആരൊക്കെ കൊഴിഞ്ഞ് പോകും ആരൊക്കെ കൂടെ നില്‍ക്കും എന്ന് ഇപ്പോള്‍ പറയാനാകില്ല. അതിന് ശേഷമേ ശബരിമല വിഷയത്തിലൂടെ അവര്‍ക്ക് തെരഞ്ഞെടുപ്പില്‍ നേട്ടമുണ്ടാകാനാകുമെന്നും വെള്ളാപ്പള്ളി മാധ്യമങ്ങളോട് പറഞ്ഞു.

പ്രകാശാനന്ദ സ്വാമി അയ്യപ്പഭക്തസംഗമത്തില്‍ പങ്കെടുത്തല്ലോ എന്ന് മാധ്യമപ്രവര്‍ത്തകര്‍ ചോദിച്ചപ്പോള്‍ അദ്ദേഹം ശിവഗിരി മഠത്തിലെ മുന്‍ മഠാതിപധിയാണെന്നും ഇപ്പോഴത്തെ മഠാധിപതിയല്ലെന്നും പറഞ്ഞു. ലോക്‌സഭാ തെരഞ്ഞെടുപ്പിന് മുമ്പ് ബി.ഡി.ജെ.എസ് ബി.ജെ.പി സഖ്യം അവസാനിപ്പിക്കുന്നതിന്റെ വ്യക്തമായ സൂചന വെള്ളാപ്പള്ളി നല്‍കുകയും ചെയ്തു. തെരഞ്ഞെടുപ്പിന് മുമ്പ് ആരോക്കെ കൂടെ കാണും ആരൊക്കെ കൊഴിഞ്ഞ് പോകും എന്ന് പറഞ്ഞതിന്റെ പൊരുള്‍ അതാണ്. ശബരിമല വിഷയത്തിന്റെ മറവില്‍ ബി.ജെ.പി എന്‍.എസ്.എസിന്റെ നിലപാടുകളുമായി യോജിച്ച് പ്രവര്‍ത്തിച്ചതോടെയാണ് വെള്ളാപ്പള്ളി അകന്നത്. 

യവതീപ്രവേശനത്തിന് പിന്നാലെ വനിതാമതിലിനെതിരെ വെള്ളാപ്പള്ളി നടേശന്റെ ഭാര്യ പ്രീതി നടേശനും മകന്‍ തുഷാര്‍ വെള്ളാപ്പള്ളിയും ആരോപിച്ചിരുന്നു. സര്‍ക്കാര്‍ നടത്തിയത് തറ വേലയാണെന്ന് ബി.ഡി.ജെ.എസ് നേതാവ് തുഷാര്‍ ആരോപിച്ചിരുന്നു. സര്‍ക്കാര്‍ തങ്ങളെ വഞഢ്ചിക്കുകയായിരുന്നെന്ന് പ്രീതിനടേശനും ചൂണ്ടിക്കാട്ടിയിരുന്നു. അതിന് പിന്നാലെയാണ് വെള്ളാപ്പള്ളി നേടശന്‍ മതില്‍ പൊളിഞ്ഞെന്ന് പറഞ്ഞത്. അതേസമയം സര്‍ക്കാരിനെ പൂര്‍ണമായും തള്ളിക്കളയാനും അദ്ദേഹം തയ്യാറായില്ല എന്നത് ശ്രദ്ധേയമാണ്. മുഖ്യമന്ത്രിയെ അദ്ദേഹത്തിന്റെ ഉപദേശകര്‍ വഴിതെറ്റിക്കുന്നു എന്ന് വെള്ളാപ്പള്ളി തുറന്നടിക്കുകയും ചെയ്തു. ശബരിമല കോടതിവിധിയില്‍ സര്‍ക്കാര്‍ പെട്ട് പോയതാണെന്നും ചൂണ്ടിക്കാട്ടി.

നാമജപം നല്ലതാണെന്നും അത് രാഷ്ട്രീയമായി ഉപയോഗിക്കുന്നതിനോട് യോജിപ്പില്ലെന്നും വെള്ളാപ്പള്ളി വ്യക്തമാക്കി. എന്‍.എസ്.എസിന്റെ നേതൃത്വത്തിലാണ് നാമജപം തുടങ്ങിയത്. അത് ബി.ജെ.പി ഏറ്റെടുത്തതോടെ അക്രമം ഉണ്ടായി. തുടര്‍ന്നാണ് വെള്ളാപ്പള്ളി രംഗത്തെത്തിയത്. സര്‍ക്കാരിന് മുന്നില്‍ മറ്റ് മാര്‍ഗമില്ലെന്ന് എല്ലാവര്‍ക്കും അറിയാം. എന്നിട്ടും പലരും രാഷ്ട്രീയ മുതലെടുപ്പ് നടത്തുകയാണ്. പ്രതിപക്ഷനേതാവ് രമേശ് ചെന്നിത്തലയും ഇതില്‍ ഒട്ടും പിന്നിലല്ലെന്നും വെള്ളാപ്പള്ളി ആരോപിച്ചിരുന്നു. എന്‍.എസ്.എസിന്റെ അക്കൗണ്ടിലാണ് ചെന്നിത്തല ആഭ്യന്തരമന്ത്രിയായത്. സുകുമാരന്‍ നായര്‍ വെരട്ടിയപ്പോള്‍ മുഖ്യമന്ത്രിയായിരുന്ന ഉമ്മന്‍ചാണ്ടി വഴങ്ങി. എന്നാല്‍ മുഖ്യമന്ത്രി പിണറായി വിജയനെ അതിന് കിട്ടില്ല. അതുകൊണ്ടാണ് അദ്ദേഹത്തിനെതിരെ എല്ലാവരും തിരിഞ്ഞിരിക്കുന്നതെന്നും വെള്ളാപ്പള്ളി ആരോപിച്ചിരുന്നു.