ആവേശേത്തോടെ ബി.ജെ.പി... എന്‍.ഡി.എ തൃശൂര്‍ ലോക്സഭ സ്ഥാനാര്‍ത്ഥി സുരേഷ് ഗോപി റോഡ് ഷോയോടെ തിരഞ്ഞെടുപ്പ് പ്രചാരണത്തിന് തുടക്കമിട്ടു.... കഴിഞ്ഞ ദിവസം കേന്ദ്രനേതൃത്വം സ്ഥാനാര്‍ത്ഥിയായി സുരേഷ് ഗോപിയെ പ്രഖ്യാപിച്ചെങ്കിലും ഇന്നലെ വൈകിട്ട് മുതലാണ് ഔദ്യോഗിക പ്രചാരണം ആരംഭിച്ചത്.

കേരള എക്സ്പ്രസില്‍ തൃശൂര്‍ റെയില്‍വേ സ്റ്റേഷനില്‍ എത്തിയ സുരേഷ് ഗോപിയെ എന്‍.ഡി.എ നേതാക്കള്‍ സ്വീകരിക്കുകയും ചെയ്തു. തുടര്‍ന്ന് നിരവധി ബൈക്കുകളുടെ അകമ്പടിയില്‍ തുറന്ന വാഹനത്തില്‍ കുറുപ്പം റോഡ് വഴി മണികണ്ഠനാലില്‍ എത്തി. ആവേശേത്തോടെ ബി.ജെ.പി, എന്‍.ഡി.എ പ്രവര്‍ത്തകര്‍ സുരേഷ് ഗോപിയെ വരവേറ്റു.

തുടര്‍ന്ന് മണികണ്ഠനാലിലെ ഗണപതിയെയും സുബ്രഹ്മണ്യ സ്വാമിയെയും വണങ്ങിയ ശേഷം സ്വരാജ് റൗണ്ടില്‍ റോഡ് ഷോയ്ക്ക് തുടക്കമായി. പ്രവര്‍ത്തകര്‍ക്കൊപ്പം നടക്കുമെന്ന് അറിയിച്ചിരുന്നെങ്കിലും സമയം വൈകിയതും നേരമിരുട്ടിയതും കാരണം തുറന്ന വാഹനത്തില്‍ റോഡ് ഷോ നടത്തി.

സ്വരാജ് റൗണ്ടിനു ഇരുവശവും നിന്നവരെ കൈവീശി അഭിവാദ്യം ചെയ്തു.റൗണ്ട് ചുറ്റി കോര്‍പ്പറേഷന്‍ പരിസരത്ത് റോഡ് ഷോ സമാപിക്കുകയും ചെയ്തു. ബി.ജെ.പി സംസ്ഥാന വൈസ് പ്രസിഡന്റ് അഡ്വ. ബി.ഗോപാലകൃഷ്ണന്‍, സെക്രട്ടറി എ.നാഗേഷ്, സംസ്ഥാന കമ്മിറ്റി അംഗം സന്തോഷ് ചെറാക്കുളം, ബി.ജെ.പി ജില്ലാ പ്രസിഡന്റ് അഡ്വ. കെ.കെ.അനീഷ് കുമാര്‍, ബി.ഡി.ജെ.എസ് ജില്ലാ പ്രസിഡന്റ് അതുല്യഘോഷ് വെട്ടിയാട്ടില്‍ എന്നിവര്‍ നേതൃത്വം നല്‍കി. നൂറുക്കണക്കിനുപേര്‍ റോഡ് ഷോയില്‍ പങ്കെടുക്കുകയുണ്ടായി.