തിരുവില്ല കെ ജി എ എലൈറ്റ് കോണ്ടിനെന്റല്‍ ഹോട്ടലില്‍ നിന്നു ബിരിയാണി കഴിച്ച യുവാവിന് ഉണ്ടായത് ഞെട്ടിപ്പിക്കുന്ന ദുരനുഭവം. ബിരിയാണിയില്‍ നിന്നു ബിയര്‍കുപ്പിയുടെ ചില്ലു തൊണ്ടായില്‍ തറച്ചതായി യുവാവിന്റെ വെളിപ്പെടുത്തല്‍. ഷൈലേഷ് ഉമ്മന്‍ കുളത്തുങ്കല്‍ എന്ന യുവാവാണു ഫേസ്ബുക്കിലൂടെ തന്റെ ദുരനുഭവം തുറന്നു പറഞ്ഞത്.

ഭക്ഷണം കഴിക്കുന്നതിനിടയില്‍ തൊണ്ടയില്‍ എന്തൊ കുടുങ്ങിയതായി അനുഭവപ്പെട്ടു. ഇതു മൂലം ഛര്‍ദ്ദിച്ചപ്പോള്‍ രക്തവും കുപ്പിച്ചില്ലുമായിരുന്നു പുറത്തു വന്നത്.

യുവാവിന്റെ ഫേസ്ബുക്ക് പോസ്റ്റ് ഇങ്ങനെ;

ഞാൻ ഇവിടെ പ്രതിപാദിക്കുവാൻ പോകുന്ന വിഷയം എനിക്ക് വ്യക്തിപരമായി ഉണ്ടായ ഒരു ദുരനുഭമാണ്. വീണ്ടും മറ്റുള്ളവർക്ക് ഉണ്ടാകാതിരിക്കാനും ഇത്തരം കപട നാണയങ്ങളെ തുറന്നു കാട്ടുവാനും ഇത് എഴുതുന്നത്. 11 ഒക്ടോബർ 2017 ഞാനും കുടുംബവും ഹോട്ടൽ കെ.ജി.എ എലൈറ്റ് കോണ്ടിനെറ്റൽ തിരുവല്ല ഉച്ചഭക്ഷണത്തിന് കയറുകയും, കൂടെയുള്ളവർ മിൽസും ഞാൻ ഒരു ബിരിയാണിക്ക് ഓർഡർ ചെയ്യുകയും ചെയ്തു.

ബിരിയാണി ഞാൻ കഴിച്ചു കൊണ്ടിരിക്കുന്ന സമയത്ത് തൊണ്ടയിൽ എന്തോ കുടുങ്ങിയതായി എനിക്കു സംശയം തോന്നുകയും വേഗത്തിൽ ഞാൻ ഛർദ്ദിക്കുകയും ചെയ്തു. ശർദ്ദിന്റെ കൂട്ടത്തിൽ ബ്ലഡ് കണ്ടപ്പോൾ എനിക്ക് ഭയം അനുഭവപ്പെടുകയും ഞാൻ അത് ശ്രദ്ധിച്ചപ്പോഴാണ് എനിക്ക് മനസ്സിലായത് ഞാൻ കഴിച്ച ആഹാരം സാധനത്തിന്റെ കൂട് ഒരു വലിയ കഷണം ബിയർ ബോട്ടിൽ കുപ്പിച്ചില്ലും ഉണ്ടായിരുന്നുവെന്ന്.

സമചിത്തത വീണ്ടെടുത്ത് ഞാൻ ഈ കാര്യം ഹോട്ടൽ അധികാരികളുമായി സംസാരിക്കുകയും ഞാൻ പണം കൊടുത്തു മേടിച്ച ആഹാരത്തിൽ മരണം വരെ സംഭവിക്കാവുന്ന ഒരു അനാസ്ഥ ഹോട്ടൽ അധികാരികളുടെ ഭാഗത്തുനിന്ന് ഉണ്ടായിരുന്നു എന്ന് അവരെ വിനയപൂർവ്വം അറിയിക്കുകയും ചെയ്തു .പ്രശ്നം ഒതുക്കി തീർക്കുവാൻ അവർ പല വാഗ്ദാനങ്ങളും തന്നു. പക്ഷേ ഒരു ഉപഭോക്താവ് എന്ന നിലയിൽ എനിക്ക് ലഭിക്കേണ്ട ന്യായമായ നീതി അവിടെ നിഷേധിക്കപ്പെട്ടു .

ഒരു 4 സ്റ്റാർ ഹോട്ടൽ ആണ് അത് എന്ന് വിസ്മരിച്ചുകൂടാ.. കാരണം അതിൽ ഏറ്റവും പ്രധാനമായി ഹോട്ടൽ അധികാരികൾ പറഞ്ഞു ഒരു വാചകമാണ് .. ഹോട്ടൽ ഫീൽഡ് ഒക്കെ ആകുമ്പോൾ ഇതൊക്കെ പതിവാണ്.. ഇതാണ് എന്നെ ഇത്തരത്തിലുള്ളൊരു കുറിപ്പ് എഴുതുവാൻ പ്രേരിപ്പിച്ച ഘടകം. കഴിച്ച ആഹാരത്തിന്റെ പണം നൽകിയ ശേഷം വയറിന് അസ്വസ്ഥതയും ഉണ്ടായ ഞാൻ ആശുപത്രിയിൽ പോവുകയും ഡോക്ടർ പറഞ്ഞത് അനുസരിച്ച് രണ്ടു മണിക്കൂർ നിരീക്ഷണത്തിലും ആയിരുന്നു. മറ്റ് കുപ്പിച്ചില്ല്ന്റെ അംശം ഉദരത്തിൽ ഉണ്ടായിരിക്കാം എന്ന ആശങ്കയിൽ ഡോക്ടർ എനിക്ക് പരിശോധനയ്ക്ക് ഉള്ള മരുന്ന് തന്ന് കൂടുതൽ ബുദ്ധിമുട്ടുകൾ വല്ലതുമുണ്ടെങ്കിൽ തീർച്ചയായും വന്നു കാണണം എന്ന് പറഞ്ഞു .

എനിക്ക് ഉണ്ടായ ഈ ദുരവസ്ഥ നിങ്ങൾക്ക് ആർക്കും ഉണ്ടാകാതിരിക്കാനും ഇനിയുമൊരു ഹോട്ടൽ അധികാരികളുടെ ഭാഗത്തുനിന്ന് ഇത്തരത്തിലുള്ള വഞ്ചനയും ,അഹന്തയും കാണിക്കാതിരിക്കാൻ വേണ്ടിയാണ് ഞാൻ ഈ പോസ്റ്റ് എഴുതുന്നത്. ആ കുപ്പിച്ചില്ല് അബദ്ധവശാൽ വിഴുങ്ങി ഇരുന്നെങ്കിൽ ചിലപ്പോൾ എന്റെ ജീവൻ വരെ നഷ്ടപ്പെട്ടു എന്നു വരാം .

ഞാൻ ഈ വിഷയം ബന്ധപ്പെട്ട് സർക്കാർ അധികാരികളിൽ അറിയിക്കുകയും അവർ ന്യായമായ നടപടിയെടുക്കുകയും ചെയ്യും എന്നു വിശ്വസിക്കുന്നു .എന്റെ മൊബൈൽ നമ്പർ താഴെ കൊടുക്കുന്നു കൂട്ടത്തിൽ എനിക്ക് ലഭിച്ച കുപ്പി ചില്ലിന്റെ ഫോട്ടോകൾ ഇതോടൊപ്പം പോസ്റ്റ് ചെയ്യുന്നു. കസ്റ്റമർ ആണ് ഏറ്റവും വലിയ സമ്പാദ്യം എന്ന് ഓരോ ഹോട്ടലുടമകളും ചിന്തിക്കുവാൻ ഈ പോസ്റ്റ് ഉതകട്ടെ... 

മേൽപ്പറഞ്ഞ ഹോട്ടലിൽ നിങ്ങൾ എപ്പോഴെങ്കിലും ആഹാരം കഴിക്കുവാൻ കയറുന്നുവെങ്കിൽ തീർച്ചയായും സ്വന്തം ജീവനെ കരുതി ഒന്ന് ചിന്തിക്കണം.