മുഖ്യമന്ത്രിയുടെയും മന്ത്രിമാരുടെയും ഓഫീസ് കെടുകാര്യസ്ഥതതയുടെ ഉദാഹരണമാകുന്നു. പല മന്ത്രിമാർക്കും രാഷ്ട്രീയ നേതാക്കളാണ് പ്രൈവറ്റ് സെക്രട്ടറിമാർ. അവർക്ക് ഔദ്യോഗിക നടപടിക്രമങ്ങളെ കുറിച്ചറിയില്ല. സർക്കാർ ഉദ്യോഗസ്ഥരുമായി മന്ത്രിമാരുടെ ഓഫീസുകൾക്ക് നിയന്ത്രണം നഷ്ടപ്പെട്ടിരിക്കുന്നു. കഴിഞ്ഞ യുഡിഎഫ് മന്ത്രിസഭയുടെ കാലത്ത് മന്ത്രിമാരുടെ പരിചയക്കുറവിനെ മറികടന്നിരുന്നത് മന്ത്രിമാരുടെ ഓഫീസുകളാണ്. മന്ത്രിമാർക്ക് തെറ്റ് സംഭവിച്ചാലും അവരുടെ പ്രൈവറ്റ് സെക്രട്ടിമാർ അത് മറികടന്നിരുന്നു. ഇപ്പോൾ അത്തരമൊരു സംവിധാനം നിലവിലില്ല.

മന്ത്രിമാരിൽ അധികം പേരും തങ്ങളുടെ പോർട്ട് ഫോളിയയിൽ അജ്ഞരാണ്. രാഷട്രീയം മാത്രം നോക്കിയാണ് ഭരണം. പ്രവർത്തന പരിചയമുള്ള ഉദ്യോഗസ്ഥരെയെല്ലാം സ്ഥലം മാറ്റി. മാറി വന്നവർക്കാകട്ടെ ഒന്നിനെക്കുറിച്ചും ഒരു വിവരവുമില്ല.

ഓഖി ചുഴലിക്കാറ്റിനെ കുറിച്ച് മുന്നറിയിപ്പ് ലഭിക്കാൻ വൈകിയെന്നാണ് മുഖ്യമന്ത്രി പറഞ്ഞത്. ഒരാഴ്ചക്ക് മുമ്പ് തന്നെ മുന്നറിയിപ്പ് നൽകിയെന്നാണ് ബന്ധപ്പെട്ടവർ പറയുന്നത്. വള്ളങ്ങളിൽ പോയവർ സഹകരിക്കാൻ തയാറാകുന്നില്ലെന്നാണ് മുഖ്യമന്ത്രി പറയുന്നത്. 262 ബോട്ടുകളാണ് കടലിൽ കാണാതെ പോയിരിക്കുന്നത്.

ദുരന്തനിവാരണ അതോറിറ്റിക്ക് വീഴ്ച സംഭവിച്ചു എന്നാണ് പറയുന്നത്. അതോറിറ്റിക്ക് വീഴ്ച പറ്റിയെന്ന് പറഞ്ഞ് സർക്കാരും ഒഴിയുന്നു. ഒരാഴ്ചക്ക് മുമ്പേ അവർക്ക് വിവരം ലഭിച്ചു എന്നാണ് നിഗമനം. എന്നാൽ വ്യാഴാഴ്ച രാവിലെ മാത്രമാണ് മുഖ്യമന്ത്രിയും റവന്യുമന്ത്രിയും വിവരം അറിഞ്ഞത്. അത് ശരിയാണെങ്കിൽ ദുരന്തനിവാരണ അതോറിറ്റിക്കെതിരെ നടപടി വേണ്ടതല്ലേ? ചുഴലികാറ്റും പേമാരിയും ഉണ്ടാകുമെന്ന കാര്യം തങ്ങളെ അറിയിച്ചില്ലെന്ന് മത്സ്യതൊഴിലാളികളും പറയുന്നു. എന്നാൽ ന്യൂനമർദ്ദം പെട്ടെന്ന് കൊടുങ്കാറ്റായി മാറുകയായിരുന്നു എന്നാണ് വിദഗ്ദ്ധർ പറയുന്നത്. തങ്ങളെ കടലിനും ചെകുത്താനമിടയിലാക്കിയത് സർക്കാരാണെന്ന് മത്സ്യതൊഴിലാളികൾ പറയുന്നു. അവർ സർക്കാരിനെതിരെ സമരപാഥയിലാണ്.

ദുരന്തനിവാരണ അതോറിറ്റി റവന്യം മന്ത്രിക്ക് കീഴിലാണ് പ്രവർത്തിക്കുന്നത്. സർക്കാർ ഉദ്യോഗസ്ഥരാണ് ഇതിന്റെ മേലധികാരികൾ. കൊള്ളാവുന്ന ആരും ദുരന്തനിവാരണ അതോറിറ്റിക്ക് മുകളിലില്ല. കേരളത്തിൽ ദുരന്തനിവാരണം അത്ര ഗൗരവമായ കാര്യമല്ല. കേരളത്തിൽ ഇതാദ്യമായാണ് ഇത്രയധികം ദുരന്തം ഉണ്ടാകുന്നത്. എന്നാൽ അത് കാര്യക്ഷമമായി നേരിടാൻ കഴിഞ്ഞില്ല.കൂനിൻമേൽ കുരു എന്ന മട്ടിൽ സർക്കാരിന് പ്രതിസന്ധികൾ വന്നു ചേരുമ്പോൾ പരിചയസമ്പത്ത് വില്ലനാവുന്നു.