കേരളത്തില്‍ സംഭവിക്കാന്‍ പോകുന്ന കാര്യങ്ങള്‍ മുന്‍കൂട്ടി പ്രവചിച്ച യുവാവിന് ഇന്ന് സോഷ്യല്‍ മീഡിയയില്‍ വലിയ ആരാധകരാണുള്ളത്. മലയാളികളുടെ ഇഷ്ടതാരങ്ങളുടെ മരണവും, പ്രകൃതിക്ഷോഭവുമെല്ലാം അപ്പാടെ നടന്നതാണ് ഈ യുവാവിന്  ആരാധകരുടെ എണ്ണം വര്‍ദ്ധിക്കുവാനുള്ള കാരണം. ഇതേ സമയം പുതിയ പ്രവചനവുമായി രംഗത്ത് എത്തിയിരിക്കുകയാണ് അദ്ദേഹം.

ഇക്കുറി പ്രാര്‍ത്ഥിക്കാന്‍ ആവശ്യപ്പെട്ടിരിക്കുന്നത് പഴയ ബാബിലോണായ ഇറാഖിന് വേണ്ടിയാണ്. ഇറാഖ് ഇത് വരെ സാക്ഷ്യം വഹിച്ചിട്ടില്ലാത്ത വിധമുള്ള ദുരന്തങ്ങള്‍ക്കും, സഹനങ്ങളും നേരിടുമെന്ന് യുവാവ് അവകാശപ്പെടുന്നു. ഇവിടെ വലിയ ക്ഷാമമുണ്ടാകും, ഭരണാധികാരികള്‍ നിശബ്ദരായി നില്‍ക്കുന്ന സാഹചര്യം വന്നെത്തുമെന്നും യുവാവ് പുതിയ വീഡിയോയില്‍ പറയുന്നുണ്ട്.

താന്‍ ഈ പ്രവചനം വെളിപ്പെടുത്തുന്നത് കേവലം ഒരു സഭയുടെ പേരിലല്ല, ജാതി, മത, വ്യത്യാസമില്ലാതെ നമ്മള്‍ ഇറാഖിലെ മക്കള്‍ക്ക് വേണ്ടി പ്രാര്‍ത്ഥന നടത്തണമെന്നാണ് യുവാവ്  തന്റെ രണ്ടാം പ്രവചന വീഡിയോയില്‍ പറയുന്നത്. മുതിര്‍ന്ന നേതാവിന്റെ മരണവും, പ്രശസ്തരായ മറ്റു ചിലരുടെയും മരണവും പ്രകൃതി ക്ഷോഭവുമായിരുന്നു ഇദ്ദേഹത്തിന്റെ ആദ്യ വീഡിയോയിലെ പ്രവചനം. പ്രവചനം പോലെ നേതാക്കളും സംവിധായകനും നടനും മരണപ്പെട്ടിട്ടും പ്രവചനം വിശ്വസിക്കാന്‍ ജനം തയ്യാറായിരുന്നില്ല. പക്ഷേ പ്രവചനത്തിലുണ്ടായിരുന്ന പ്രകൃതി ക്ഷോഭം വന്നതോടെ യുവാവിന്റെ ദൃശ്യങ്ങള്‍ വലിയ ആവേശത്തോടെ ഷെയര്‍ ചെയ്യപ്പെടുന്നുണ്ട്.

ഇതുവരെയുള്ള തന്റെ പ്രവചനങ്ങളും വെളിപാടുകളും സത്യമായിത്തീര്‍ന്നത് ഇദ്ദേഹം ചൂണ്ടിക്കാട്ടുന്നു. ഐവി ശശി മരിച്ചതും ഉഴവൂര്‍ വിജയന്‍ മരിച്ചതും ഇദ്ദേഹം പ്രവചിച്ചിരുന്നുവെന്നത് ഇദ്ദേഹം തന്നെ വെളിപ്പെടുത്തുന്നതും വീഡിയോ കാണുന്നവരെ അത്ഭുതത്തിലാഴ്ത്തും. ഒരു രൂപ പോലും ആരില്‍നിന്നും വാങ്ങാതെയാണ് ഇദ്ദേഹം ഭാവി കാര്യങ്ങള്‍ വെളിപ്പെടുത്തുന്നത്. പണം വാങ്ങി ഭാവി പറയുന്ന തട്ടിപ്പുവീരന്മാരില്‍നിന്നും ഇദ്ദേഹം വേറിട്ടുനില്‍ക്കുകയാണ്.

ഇത്രത്തോളം കഴിവുകളുള്ള ഈ യുവാവിനെ ആളുകള്‍ വേണ്ടവിധത്തില്‍ ശ്രദ്ധിക്കുന്നുണ്ടോ എന്ന് സംശയിക്കേണ്ടിയിരിക്കുന്നു. സര്‍ക്കാര്‍ തലത്തില്‍ ഇദ്ദേഹത്തിന് പ്രവചിക്കാനുള്ള സൗകര്യം ഏര്‍പ്പാടാക്കിയാല്‍ അത് പൊതുസമൂഹത്തിനുതന്നെ ഉപകാരമായി ഭവിക്കും.

എന്നാല്‍ ഇത്രത്തോളം എളിമയും കഴിവുകളും നിറഞ്ഞ ഈ യുവാവിനെ തട്ടിപ്പുവീരന്‍, ആളെ പറ്റിക്കുന്നവന്‍ എന്നൊക്കെയുള്ള മോശം പദങ്ങളുപയോഗിച്ച് ചിലര്‍ സോഷ്യല്‍ മീഡിയയില്‍ അധിക്ഷേപിക്കുന്നുണ്ട്. പ്രവചനങ്ങൾ ഏതെങ്കിലും ഒരു കാര്യത്തില്‍ ഒതുക്കി നിര്‍ത്താതെ എല്ലാത്തരത്തിലും സമ്പൂര്‍ണമായ പ്രവചനമാണ് ഇദ്ദേഹത്തിന്റേത്.