കനത്തമഴയെ തുടര്‍ന്ന് മുംബൈ നഗരത്തില്‍ ഗതാഗതം സ്തംഭിച്ചു. നഗരത്തിന്റെ പ്രധാനഭാഗങ്ങളിലെല്ലാം വെളളം കയറിയിരിക്കയാണ്. മുംബൈയില്‍ നിന്നുള്ള ലോക്കല്‍ ട്രെയിന്‍ സര്‍വീസുകള്‍ നിര്‍ത്തിവെച്ചു. രാജ്യാന്തര സര്‍വീസുകള്‍ ഉള്‍പ്പെടെ നിരവധി വിമാനങ്ങള്‍ സമയം വൈകി. കേരളത്തില്‍ നിന്ന് കൊങ്കണ്‍ വഴി പോകുന്ന ട്രെയിനുകളെയും മഴ ബാധിച്ചിട്ടുണ്ട്.

ഡല്‍ഹിയിലേക്ക് പോകുന്ന മംഗള എക്‌സ്പ്രസ് ബോംബെ കല്യാണ്‍ ജങ്ഷനും ഗുസാവല്‍ ജങ്ഷനും ഇടയില്‍ വഴിതിരിച്ചുവിട്ടു. സിയോണ്‍, ദാദര്‍, മുംബൈ സെന്‍ട്രല്‍, കുര്‍ള, അന്തേരി, സാകിനാക തുടങ്ങിയ സ്ഥലങ്ങള്‍ വെള്ളത്തിനടിയിലാണ്. ഈ പ്രദേശങ്ങളില്‍ ഗതാഗതവും താറുമാറായി. മുംബൈ നഗരത്തില്‍ 30.92 മില്ലിമീറ്റര്‍ മഴയാണ് രേഖപ്പെടുത്തിയത്.

നഗരത്തിന്റെ കിഴക്കന്‍ മേഖലയില്‍ 15.56 മില്ലിമീറ്ററും പടിഞ്ഞാറന്‍ പ്രദേശങ്ങളില്‍ 12.42 മില്ലി മീറ്റര്‍ മഴയുമാണ് ലഭിച്ചത്. നഗരത്തില്‍ അടുത്ത 48 മണിക്കൂര്‍ കനത്ത മഴ തുടരുമെന്നും അപകടസാധ്യതകള്‍ നടപടികളെടുക്കണമെന്നും കലാവസ്ഥാ നിരീക്ഷണവകുപ്പ് ബ്രിഹാന്‍ മുംബൈ മുനിസിപ്പല്‍ കോര്‍പറേഷന് മുന്നറിയിപ്പ് നല്‍കി.